Genesis 46 - Iñupiatun Mumiksat Uqalugiksuat

Jacob Nanmiñiq Iḷaniḷu Egypt-muktut

¹ Jacob-gum usiḷḷiutivlugich suġalipayaani Beersheba-muktuq, tavrani aitchuiŋaniqsuq ikipkautinik God-iŋanun aapami Isaac-gum.

² God-im uqautiŋagaa qiñiqtuuraakun unnuami suli ququulavlugu, “Jacob, Jacob!” “Aaŋ, uvva uvaniittuŋa,” kiuŋagaa Jacob-gum.

³ “God-auruŋa, God-iŋa aapavich,” uqallaktuq. “Iqsisiqaġnak Egypt-muksaġuvich; kiŋuvaatin nunaqpaguqtinniaġitka taamani.

⁴ Aullaqatiginiaġikpiñ Egypt-mun, suli utqutilugich kiŋuvaatin mattumuŋa nunamun. Joseph-gum itqatiginiaġaatin tuquguvich.”

⁵ Jacob aullaqiŋaruq Beersheba-miñ. Iġñiŋisa inillakkaat, miqłiqtuurallu, suli tuvaaqatiŋich aksraktuuraligaanun usiaġutinun umialgata Egypt tuyuġiŋaraŋiññun.

⁶ Pamiqsaatiglu suli suġaliññaktaatiŋ Canaan-mi pivḷugich Egypt-muktut. Jacob-gum aullaqatigigaich iluqaisa kiŋuvaani:

⁷ iġñiġutiini, tutaaluuni aŋutit, paniutini, suli tutaaluuni aġnat.

⁸ Ukua Jacob-gum nanmiñiq iḷaŋi aullaqatigiŋaraŋich Egypt-mun: aŋayukłiq iġñiŋa Reuben

⁹ suli Reuben-gum iġñiŋich: Hanoch, Pallu, Hezron, Carmi-ḷu.

¹⁰ Simeon-gum suli iġñiŋich: Jemuel, Jamin, Ohad, Jachin, Zohar, Shaul-lu, iġñiŋa Canaan-miuguruam aġnam.

¹¹ Levi-m suli iġñiŋich: Gershon, Kohath, Merari-ḷu.

¹² Judah-m suli iġñiŋich: Shelah, Perez, Zerah-lu. (Judah-m allak iġñiŋik, Er-lu Onan-lu, tuquruak Canaan-mi.) Perez-gum iġñiġigaik Hezron-lu Hamul-lu.

¹³ Issachar-m suli iġñiŋich: Tola, Puah, Jashub, Shimron-lu.

¹⁴ Zebulun-gum suli iġñiŋich: Sered, Elon, Jahleel-lu.

¹⁵ Tavra taapkua iġñiŋich Leah-miñ aniŋaruat Jacob-mun Mesopotamia-mi, suli paniŋa Dinah. Katiłługich, kiŋuvaaŋich Leah-kun iñugiaktigiŋarut iñuiññaq qulit piŋasutun (33).

¹⁶ Gad-gum suli iġñiŋich: Zephon, Haggi, Shuni, Ezbon, Eri, Arod, Areli-ḷu.

¹⁷ Asher-m suli iġñiŋich: Imnah, Ishvah, Ishvi, Beriah, suli aniqataat aġnaq Serah. Beriah-m iġñiġigaik Heber-lu Malchiel-lu.

¹⁸ Ukua akimiaq atausiuruat (16) kiŋuvaaġigaich Jacob-gum Zilpah-kun, kivgauruaq aġnaq, Laban-gum qaiñŋaraŋa panigmiñun Leah-mun.

¹⁹ Jacob nuliaŋata Rachel-gum iġñiqaqtinŋagaa malġugnik: Joseph-miglu Benjamin-miglu.

²⁰ Egypt-mi Joseph malġugnik iġñiqaŋaruq, Manasseh-miglu Ephraim-miglu, Asenath-kun, panigiraŋa Potiphera-m, aŋaiyyuliqsiqpauruam Heliopolis-mi.

²¹ Benjamin-gum iġñiġigaich Bela, Becher, Ashbel, Gera, Naaman, Ehi, Rosh, Muppim, Huppim, Ard-lu.

²² Taapkua akimiaġutaiḷauruat (14) kiŋuvaaġigaich Jacob-gum Rachel-kun.

²³ Dan-gum iġñiŋalu Hushim.

²⁴ Naphtali iġñiŋiḷḷu: Jahzeel, Guni, Jezer, Shillem-lu.

²⁵ Taapkua tallimat malġuk kiŋuvaaŋich Jacob-gum Bilhah-kun, kivgauruaq qaiñŋaraŋa Laban-gum panigmiñun Rachel-mun.

²⁶ Iñugiaktilaaŋat nanmiñiq kiŋuvaaŋisa Jacob Egypt-muktuat piŋasukipiaq itchaksratun (66) inŋarut, kisiuqatigigaluaġnagi iġñiġutiiŋisa tuvaaqatiŋich.

²⁷ Malġuk iġñiŋik Joseph aniŋaruak Egypt-mi, piŋasukipiaq quliŋŋuqługich (70) Jacob qitunġaŋich taavuŋaqtuat.

Jacob Iḷaŋiḷu Egypt-mi

²⁸ Jacob-gum tiligaa Judah apiqsruġiaquvlugu Joseph kasuquvlutiŋ Goshen-mi. Tikiñmata,

²⁹ Joseph ikuvluni aksraktuuramiñun Goshen-mugniqsuq kasuġiaqługu aapani. Kasuutikamiŋ, Joseph-gum iqittauraqługu aapani quŋusiŋagun suli qiasuiqsuaŋaruq.

³⁰ Jacob uqallaktuq Joseph-mun, “Itqanaiqsuŋa tuquniksramnun, tautuanikkapkiñ suli iñuuniqavitsuli.”

³¹ Tavraasii Joseph-gum uqallautigai aniqatiini suli iluqaisa aapagmi iḷaŋich, “Aullaqtuksrauruŋa aasii uqallautisaqtuġlugu umialik inna: ‘Aniqatiitkalu iluqaġmiglu aapagma iḷaŋich, iñuuniaqtuaguruat Canaan-mi, qaiŋarut uvamnun.’

³² Uqallautiniaġiga imnaiḷiqirauniḷusi suli qaunaksrisuuniḷusi pamiqsaanik suli qaġġisuutiniḷugich iñugiaktuat niġrutisi suli kanŋuuruat supayaurallu suġaliġirasi.

³³ Umialigum ququulappasi aasii apiġilusi sunik savaaqaġuutilaavsiññik,

³⁴ uqallautipiaġumagiksi qaunaksrauniḷusi niġrutinun iñuuniqtutilaavsiññi, maŋŋuuvsi piusiatitun. Tainnaġuvsi iñuuniallapkaġniaġaasi Goshen-mi.” Joseph-gum tainna uqautiniġaich qanukkii Egypt-miut suunnaġilaitkaich imnaiḷiqiraummata iñuich.