Genesis 45 - Iñupiatun Mumiksat Uqalugiksuat

Joseph-gum Uqallautigaich Aniqatiini Kiutilaamiñik

¹ Joseph irrusiñi nalunaqtilguiḷigaa takkuanni kivgami, tavraasii tiligaich iluqaisa anitquvlugich inimiñ. Alla iñuk inŋaitchuq Joseph-gum kiligmagich aniqatiini kiutilaamiñik.

² Qiagami nipatuvaił̣ł̣uni Egypt-miut tusaaŋagaat, aasii tusaayugaat tikiñŋagaat umialigum igluqpaŋa.

³ Joseph uqallaktuq aniqatiimiñun, “Uvaŋauvva Joseph-guruŋa! Aapagasuli iñuuva?” Aglaan aniqatiiŋisa tusaagamirruŋ taamna, iqsitchakpaił̣ł̣utiŋ kiuyumiñaiñŋagaat.

⁴ Joseph-gum aasii uqallautigai, “Qalliḷaaġitchi.” Qalliḷaaqtut, aasii uqallaktuq, “Uvaŋauvva aniqatiksi Joseph, tuniŋaraqsi Egypt-mun.

⁵ Iłuiḷḷiuġnasi naakka pasiñasi ilivsiññun tuniŋatilaamnik mauŋa. God-im uvva aullaqtinŋagaaŋa sivuvsiññi annautitquvlugich iñuggutiŋich iñuich.

⁶ Uvva ukiut igḷuvaallukkaat niqaiḷḷiuġniksrat nunami; tallimanisuli imma ukiuni nauyumiññaksaaġumiñaitkaat naakkaunnii kivluiḷutiŋ.

⁷ God-im uvva tiliŋagaaŋa sivuvsiññi annautitquvlusi kamanaqtuakun suli kiŋuvaasiḷu iñuullatquvlusi.

⁸ Tavra ilivsi tiliŋaitkivsiŋa mauŋa, aglaan God-im. Siḷġiqsuqtiliutiŋagaaŋa Pharaoh-mun, qaukłiġuutivluŋa iluqaiññun igluqatiimiñun suli aŋalatchiriġuqłuŋa Egypt-mun.

⁹ “Qilamiksruaġlusi utiġitchi aapamnun aasii uqallautilugu innaġniḷugu iġñiŋa Joseph: ‘God-im qaukłiḷiutiŋagaaŋa iluqaanun Egypt, qaiñ uvamnun; aannagutaaġnak.

¹⁰ Iñuuniaġumiñaqtusi nunaŋani Goshen Egypt-mi, qanitchumausi uvamnun—ilivsiḷu, miqłiqtusiḷu, tutaaluusiḷu, imnaisiḷu, nagruligaallu, pamiqsaasiḷu, suli iluqaqpiuraŋisa sut pigirasi.

¹¹ Goshen-miitkuvsi, qaunagiyumiñaġivsi. Immasuli tallimani ukiuni niqaiḷḷiuġnaq inniaqtuq; ilivsiḷu, iḷasiḷu suli pamiqsaasi kaaksiulusi tuqutquŋitkivsi.’”

¹² Joseph uqavsaaqtuq, “Iluqavsi, ilviḷḷu Benjamin, qiñiġivsiñŋa Joseph-gupiaqtilaamnik.

¹³ Uqallautilugu aapaga qisiksrautiqaqtilaamnik maani Egypt-mi suli uqallautilugu supayaamik tautuktavsiññik. Qilamiqsruaġlusiasii qaġġisilugu mauŋa.”

¹⁴ Iqimmalaaġaa nukaaluni Benjamin aasii qianagutivluni; Benjamin-tauq qiammiuq iqimmiḷḷaan.

¹⁵ Tavra, qiallaġmi, iqittaallaagaich aniqatiini suli kunikługich. Taaptuma aquagun, aniqatiiŋisa uqaqatigiuraallasigaat.

¹⁶ Tusaayugaat tikiñmata Pharaoh-m igluqpaŋanun, Joseph aniqatiiŋich qaiñivḷugich, umialiglu qaukłiurauruallu iviġaumaŋarut.

¹⁷ Uqallaktuq Joseph-mun, “Uqautikkich aniqatiitin usiḷḷiitqulugich niġrutiŋich aasii utiġlutiŋ nunaŋanun Canaan.

¹⁸ Aikł̣iġḷich aapamignik suli qitunġamignik aasii utiġlutiŋ mauŋa. Aitchuġniaġitka nunagigñiqtamik Egypt-mi, iḷaŋaniiqsuallaniaqtut iñuuniaġumiŋ.

¹⁹ Uqallautilugich aksraktualigaanik usiaġunnaligaaqulugich Egypt-miñ, aasii qaġġisilugich tuvaaqatitiŋ miqłiqtuuratiŋ aapaktiglu.

²⁰ Uŋiaritquŋiḷḷugich unitchiñiaġumiŋ suġautamignik; pigigñiqtauruat nunapayaaŋani Egypt piginiaġaich.”

²¹ Jacob iġñiġutiiŋich kamaksrirut uqallausiamignik. Joseph-gum aksraktualigaanik usiaġutiksritkaich, umialgum piraksriusiatun, suli taquaksrił̣ł̣ugich niqinik iglauniksraŋanni.

²² Aitchuqługiḷḷu iluqaisa annuġaatqiutiksraŋiññik, aglaan Benjamin aitchuġaa 300-tun iñugiaktigiruanik qatiqtuanik manigñik suli tallimanik annuġaatqiutiksraŋiññik.

²³ Tuyuŋaġaa aapani quliñik kakaktinik usiaqtuanik nakuuniqtaŋiññik Egypt suġaliŋiñik suli quliñik aġnasallunik kakaktinik usiaqtuanik palauvaksranik, punniġnik, suli allanik niqinik taquaksraŋiññik.

²⁴ Aullaqtitkai aniqatiini aasii aullaqisaġmata, uqallaktuq iliŋiññun, “Qanaaġnasi iglaullavsi.”

²⁵ Egypt-miñ aullaqtut aisaqłutiŋ aapamignun Jacob-mun Canaan-miittuamun.

²⁶ “Joseph iñuumaruqsuli!” uqallautigaat. “Qaukłiġuutiŋamaruq iluqaanun Egypt-mun!” Jacob qaallaummiruq suli ukpiġiŋitkaich.

²⁷ Aglaan uqallautimmanni iluqaanik Joseph uqaluŋiññik ilimignun, suli tautukługich aksraktualigaat usiaġutit Joseph tuyuġiraŋich aullautisaqpanni Egypt-mun, tupaummiŋaiġataqtuq.

²⁸ “Iġñiġa Joseph iñuumaruqsuli!” ilaa uqallaktuq. “Aarigaa, taamna naamaruq! Tautugiaqtuksraġigiga tuquŋaiñŋaġma.”