Genesis 44 - Iñupiatun Mumiksat Uqalugiksuat

Piitchuaq Qallun

¹ Joseph-gum piraksriġaa kivgauruaq qaukłiuvluni igluani, “Immiqsaġitin aŋutit puuŋich niqinik tigumialgutilauraŋisitun, aasii iḷiḷugich iñullaam maniŋich qaaŋannun puuŋisa.

² Iḷuanuglugu qallutiga qatiqtuamik manigmik piḷiaq nukaqłiuruam aniqatiŋata puuŋanun, maniŋalu palauvaksraqtaaŋiñun.” Ilaa kamaksriŋaruq uqallausiamisun.

³ Uvlaatchaurami aniqatigiich aullaqtitkaich kakaktiŋiḷḷu.

⁴ Aullaqianigmiullu uŋasiksigaluaġnagu iniqpak, Joseph uqallaktuq kivgauruamun qaukłiuvluni igluani, “Qilamik malikatakkich taavapkua aŋutit. Aŋugupkich, apiġisaġitin, ‘Summan uvva akisaqpisi pigiitchuamik nakuuruamun?

⁵ Summan uvva tiglikpisiuŋ umialigma qallutaa qatiqtuamik manigmik piḷiaq? Imiġvigisuuraŋa, atuġuuraŋalu iḷitchuġisukkami nalautitchumaaqtuanik. Piaġiipiaġataqtuamik uvva savaktusi!’”

⁶ Kivgauruam aŋugamigich, uqallausiġitqiŋagaich iliŋiññuñ.

⁷ Iliŋisa kiugaat, “Sumik uvva sivuniqaqługu uqaqpich, aŋuun, tainna uqaqavich? Tainnasimik uvagut savaŋaipiaġataqtugut.

⁸ Iḷisimarutin utqurriŋatilaaptinnik nunaŋaniñ Canaan manigñik paqittaptinnik qaaŋanni puuġirapta. Summan suli tigligniaġmivisa qatiqtuanik naakka kaviqsuanik manigñik qaukłiqpich igluaniñ?

⁹ Aŋuun, nalliptinni paqitauniqpan, ilaa tuqutauyumauq, aasii uvagut kivgaġuġniaqtugut iliŋnun.”

¹⁰ Ilaa uqallaktuq, “Iłuaġigiga; aglaan kisimi piŋaruaq qallunmik kivgaġuġniaqtuq, aasii ilivsi aullaġumiñaqtusi atanniqsimaraiḷḷusi.”

¹¹ Tavraasii atqaqtualukkaich puutiŋ nunamun, aasii iñullaam agmaqługu puuġirani.

¹² Joseph-gum kivgaŋa ivaqłiñagutiruq qaunakłaaqhuni, aŋayukłiġmiñ aasii aqulliġivlugu nukaqłiq, aasii qallun paqiłługu Benjamin-gum puuġiraŋani.

¹³ Aniqatigiiksuaguruat aliganagutigaich annuġaatiŋ isumaaqhutiŋ, usiḷḷiivḷugich kakaktitiŋ, aasii utiqhutiŋ inauruamun.

¹⁴ Judah-lu aniqatiiniḷu qaimmata Joseph igluanun, tavraniinniqsuqsuli. Puttut sivuġaanun,

¹⁵ aasii Joseph uqallaktuq, “Sumik imña savagniqpisi? Naluvisi tavra iñuk inimni ittuaq iḷitchuġiyumiñaqtilaaŋanik ilivsigun atuġlugu nalautchuġaġniq sunik iḷisimasuktuni?”

¹⁶ “Sumik uqallautiksraqaġumiñaqpisa iliŋnun, aŋuun?” Judah-m kiugaa. “Qanuġluta kiggutiqaġniaqpisa? Qanuġluta patchisaiġñiaqpisa uvaptinnik? God-im uvva taluiġaa killukkuaġutikput. Iluqata uvva kivgaġiliutigivsigut suli kisianŋił̣aaq qallunmik paqirvigiraa.”

¹⁷ Joseph uqallaktuq, “Naumi! Tainna uvaŋa piyumiñaipiaqtuŋa! Kisian qallutiqaqtuaq kivgaġiniaġiga. Ilivsiasii utiġumiñaqtusi aapavsiññun surruiḷḷusi.”

Judah Apiqsriruq Benjamin Pisigivlugu

¹⁸ Judah-m ullakługu Joseph uqallaktuq, “Apiġigikpiñ aŋuun, uqaqatigillaglakpiñ. Uumisuutinaŋa; ilvich uvva ilaatun umialiktun ittutin.

¹⁹ Aŋuun, apiġiravsigut, ‘Aapaqaqpisi naakka allamik aniqatiqaqpisi?’

²⁰ Kiuŋagiptigiñ, ‘Aapaqaqtugut utuqqanaaġuŋaruamik suli nukaaluqaqłuta, ilaanun aniŋaruamik utuqqalianikkami. Nukatpiaġruum aniqataa tuquŋaruq, aasii uvva kisimi iñuuruq aakami miqłiqtuŋigñi; aapaŋata nakuaġiqpakkaa.’

²¹ Aŋuun, ilvich uvva qaġġisuutitquran mauŋa, tautugukługu,

²² kiuŋagiptigiñ nukatpiaġrugmun unitchumiñaiññivḷugu aapani, unisuaqpani, aapaŋa tuquniaqtuq.

²³ Tavraasii uqallaŋarutin, ‘Isitqikkumiñaitchusi sivuġamnun nukaqłiq aniqatiksi qaiqatigiŋaunnagu.’

²⁴ “Utiqapta aapaptinnun, uqautiŋagikput uqalugiraġnik.

²⁵ Tavra ilaata uqallautiŋagaatigut utiġluta tauqsiġiaquvluta niqiłauranik.

²⁶ Kiuŋagikput, ‘Aullaġumiñaitchugut; isiqtitchumiñaitkaatigut aŋutim sivuġaanun piqatigiŋitkuptigu nukaalukput nukaqłiq. Aullaġumiñatualuktugut nukaqłium nukaalupta aullaqatigikpatigut.’

²⁷ Aapapta uqallautigaatigut, ‘Iḷisimarusi tuvaaqanma Rachel iġñiqaqtinŋagaaŋa malġutualuugnik.

²⁸ Igḷuata imma unisaniŋagaaŋa. Imma siqumitauŋasugnaqtuq qavsiułługu niġrułłuktigun, qanukkii uvva tautuŋaitkiga aullaġmanqaŋa.

²⁹ Aullautituaġuvsiuŋ una paŋmami aasii sum pimaqłukpauŋ, isumaaqtitkuvsiŋa tuqusiññauruŋa, utuqqaliqpaŋavluŋa.’”

^30-31 Judah uqavsaaqtuq, “Tavraasii, aŋuun, utiġuma aapamnun piqatigiŋiḷḷugu nukatpiaġruk, tautupqauraġumi nukatpiaġruk piqatigiŋisilaaŋanik uvamnun, tuquniaqtuq. Iñuusimiñi iñuggutigitualukkaa nukatpiaġruni, utuqqaliŋavaił̣ł̣uni isumaaqtitaugumi tuquniaqtuq.

³² Uvvasuli, unniqsuqłiisigiŋagiga uvaŋa iñuggutiga aapamnun nukatpiaġruum iñuggutaanun. Uqallautigiga utqutiŋisuaġupku nukatpiaġruk ilaanun, uvaŋa patchisauniaqtuŋa iñuuniqtutilaaptun.

³³ Aasii tavra, aŋuun, Uvaŋa maaniinniaqtuŋa kivgauluŋa iliŋnun inaani nukatpiaġruum; utiqłi aniqatiiñilu.

³⁴ Qanuġluŋa utiġniaqpik aapamnun nukatpiaġruk piqatigiŋiḷḷugu? Manimmiḷguniaŋitkiga iłuiḷḷiuġutiqpak igḷutuaqsikpauŋ aapagma.”