Genesis 43 - Iñupiatun Mumiksat Uqalugiksuat

Joseph Aniqatiiŋich Utiqtut Egypt-mun Benjamin Piqatigivlugu

¹ Niqaiḷḷiuġnaq iŋattaqsiŋaruq Canaan-mi,

² tavraasii nanmiñiq iḷaŋi Jacob-gum niġianigmatigik iluqaisa palauvaksrat qaġġisiŋaraŋich Egypt-miñ, Jacob uqallaktuq iġñiġutiimiñun, “Utiġlusi tauqsiutisaqtuqsigut niqivsaałłauranik.”

³ Judah-m uqallautigaa, “Aŋutim taluġnaqłuni kiliŋagaatigut ullautiyumiñaiññivḷuta sivuġamiñun aniqatikput piqatigiŋisuaġuptigu.

⁴ Aullaqatigitquyumagupku aniqatikput, aullaġniaqtugut niqiksraqsiyyautilutin.

⁵ Tainna piyumaŋitkuvich, aullaġniaŋitchugut, qanukkii aŋutim uqallautiŋagaatigut isiqtinniaŋiññivḷuta sivuġamiñun nukaalukput piqatigiŋaunnagu.”

⁶ Jacob uqallaktuq, “Summan uvva siġḷiġniuġutiqpagmik pipkaqpisiŋa uqallautivlugu aŋun nukaaluqaġnivḷusi allamik?”

⁷ Iliŋisa kiuŋagaat, “Aŋutim apiqsruqtaqpaŋagaatigut uvaptigun suli iḷaptigun, ‘Aapaksisuli iñuuva? Allamiksuli aniqatiqaqpisi?’ Kiuruksraġiŋagivut apiqqutiŋich. Qanuġuta iḷisimaniaqpisa uqallautiniaqtilaaptinnik qaġġisitqulugu nukaalukput?”

⁸ Judah-m uqallautigaa aapani, “Aullaqatigipkaġuŋ nukatpiaġruk uvapkun, aasii aullautigillaaġniaqtugut. Nallivut unnii kaaglutiŋ tuquŋitchumaut.

⁹ Iñuggutiga uvaŋa unniqsuqłiisiginiaġiga, qaunaginiaġiga uvaŋa. Utqutiŋitkupku surruiḷḷugu suli nakuulugu, patchiñ uvamnun tunŋasuuniaqtuq.

¹⁰ Utaqqivaiñŋaitkuptauvva, taavuŋaaniŋanayaqtugut utiġlutalu malġuiqsuaġluta.”

¹¹ Aapaŋata uqallautigai, “Tainna inniaqpan, aullaurriḷusi nakuuruaŋiññik nunam puukatavsiññun aitchuutiksranik qaukłiuruamun: mikiruamik quġlia-mik, honey-łauramik, avuuġutinik, myrrh-nik, pistachio nuts-nik suli almonds-nik.

¹² Maniḷigaaġlusi malġuullugi, qanukkii uvva utqutiruksraġigisi puukatavsiññutqiŋaraŋich. Iḷaanni imma killukkuaŋasugnaqtut.

¹³ Nukaaluksi piqatigilugu utiqsauraġitchi.

¹⁴ Qanuqtuq Sapiġñaqtuam God-im naglikkutiqaqtilliuŋ aŋun ilivsiññun, qaitqikkumagaik Benjamin-lu allalu aniqatiksi ilivsiññun. Aasiiḷiuvva uvaŋa, tammairuksrauguma qitunġamnik, tammairuksraġigitka.”

¹⁵ Tavraasii aniqatigiiksuat aitchuutiksrallu suli malġuułługi maniich, aullaŋarut Egypt-mun Benjamin piqatigivlugu. Iliŋich aullautigillaaŋarut aasii sivuġaanukłutik Joseph-gum.

¹⁶ Joseph-gum tautukkamiuŋ Benjamin piqatiginiġmarruŋ, uqallautigai kivgani qaunaksrauruat iglumiñik, “Ukua aŋutit iglumnuutikkich. Tuqutchiḷusi niġrunmik aasii itqanaiġḷugu, niqinaqiyumaugut uvluq qitiqqaqpan.”

¹⁷ Kivgauruaq savaŋaruq piraksriusiamisun suli aniqatiiŋi Joseph igluanuutivlugich.

¹⁸ Igluanuutisaġmatiŋ, iqsiŋarut suli isumarut, “Mauŋautigaatigut uvva pisigivlugich maniich utiqtinŋaraŋich puukataptinnun sivulliġmi. Tavraŋŋatchiaq uvva maksrigviginiaġaatigut, kakaktivut piḷugich, aasii kivgaliutiluta ilimiñun.”

¹⁹ Tavraasii upkuaŋanukkamiŋ iglum, uqallaktut kivgamun aŋalatchiruamun,

²⁰ “Aŋuun, uvva sivuani qaiŋaruagut mauŋa tauqsiġiaqłuta niqinik.

²¹ Nullaqapta aisaqłuta, agmaqaptigik puuvut, tavra iñullaam paqitkai maniñi qalliuruat puumigni—iluqatiŋ inniqsut. Utqutiŋagivut uvva ilivsiññun.

²² Qaġġirrivsaaŋarugut uvva manigñik tauqsiutivsaaksraptignik niqinun. Nalurugut kimun iḷitilaaŋiññik manivut puuptinnun.”

²³ Kivgauruaq uqallaktuq, “Uŋiariñasi. Iqsisiqaġnasi. God-igiravsi, God-iŋata aapavsi, iḷiŋasugnaġaich maniich puuvsiññun. Akuqtuŋagitka akiḷiutisi.” Tavraasii qaġġisigaa Simeon iliŋiññun.

²⁴ Kivgauruam aniqatigiich itqutigaich iglumun. Imiksrinŋagaich isigaŋisa iqaġiviksraŋiññik, suli niġipkaqługich kakaktiŋich.

²⁵ Itqanaiġaich aitchuutiligaatiŋ Joseph-mun qaitchukługich tikitpan uvluq qitiqqaqpan, kiligusiaqaŋavlutiŋ niġiqatiginiaġnivḷugu.

²⁶ Joseph aimman, itqutigaich aitchuutitiŋ iglumun ilaanun suli pułłutiŋ nunamun sivuġaanun.

²⁷ Apiġigaich qanuqinmagaisa suli uqallakhuni, “Uqallautiravsiñŋa utuqqaliŋaruakun aapavsigun—qanuġitpa? inuuvasuli? nakuuva?”

²⁸ Kiuŋagaat, “Ilvich piuniaŋitchuaq kivgaġiran, aapakput, iñuuruqsuli nakuuruġlu.” Aasii sitquġvigigaat suli pułłutiŋ sivuġaanun.

²⁹ Joseph-gum tautukkamiuŋ aniqatini Benjamin, aakaŋata igñiŋaptauq, uqallaktuq, “Tavraliqaa una nukaqłiq nukaaluksi, uqautigiraqsi uvamnun. God-im quviasaaġusiġḷisin, iġñiiŋ.”

³⁰ Joseph aniḷiqtuq qilamiqsruqhuni, qanukkii uummataa siḷivinŋavluni piqpakkunmik nukaalugmiñun. Qiasunŋuliqhuni, tavra inimiñukłuni qiaġutiŋaruq.

³¹ Iqaġianikkamiuŋ kiiñani, aniruq, irrusiñi qanuġiḷitchaiḷivlugu, piraksriiruq niqłiqsuquvlugich.

³² Joseph niqłiqsuŋagaat ilaagun niġġivigmun aasii aniqatiiŋich ilimikkun. Egypt-miuguruat suli niqłiqsuqługich iliŋisigun, qanukkii naġġunapiaġataqtuaguvluni iliŋiññi niġiqatiqaġniq Hebrew-guruanik.

³³ Aniqatigiich aquvinŋarut niġġivigmun, sivuġamigni qiñiqługu Joseph, saniġaqłiġiiksinŋavlutiŋ aŋayukłiġmiñ nukaqłiġmuaglaan. Tautukkamiŋ qanuq aquvititilaamignik, qiñiġutiŋarut avanmun aliuġusukhutiŋ.

³⁴ Niqłiqsuŋaġaich Joseph-gum niġġivianiñ, aglaan Benjamin niqiksrinŋagaat tallimatun aŋiłhaaqługich iḷaŋiñiñ. Tavraasi niġiŋarut suli imiqhutiŋ piqatigivlugu Joseph iḷaŋaniiqhutiŋ.