Genesis 40 - Iñupiatun Mumiksat Uqalugiksuat

Joseph-gum Mumiksisimmagik Tigutaaqtak Siññaktuŋigñik

¹ Qakugulimman umialgata Egypt, qaukłiuruak wine-nullu igariñullu isummaaŋiñŋaniġaak umialik.

² Uumitchautiŋagaik malġuuruak qaukłiurak

³ aasii tigutaaqługik igluanun aullarrauruam munaqsriñun, irvigiraŋanuttauq Joseph-gum.

⁴ Sivisuruamik tigutaaġvigmiinŋaruk, aasii aullarrim kivgaliutiŋaniġaa Joseph taapkugnuŋa.

⁵ Unnuat iḷaŋanni tavrani tigutaaġvigmi wine-liqirilu qaukłiuruaġlu igariñun, siññaktullaaŋaruk, suli siññaktuŋik allagiigñik sivuniqallaavlutiŋ.

⁶ Joseph-gum ullakkamigik uvlaami, iḷitchuġiniġaik isumaaluktilaaŋigñik.

⁷ Apiġigaik, “Qanuq imña isumaalukpisik uvlupak?”

⁸ Kiugaak, “Siññaktullaaruaguk, aasii uvva kimik unnii iñuitchuq maani sivuniqsipkaiyumiñaqtuamik sumik siññaktuvuk sivuniqaqtilaaŋiññik.” “God ilaa mumiksipkaiḷḷaruq siññaktunik.” Joseph uqallaktuq. “Uqallautisiñŋa siññaktuvsigñik.”

⁹ Wine-liqiri qaukłiuruaq uqallaktuq, “Siññaktumni grape-gich napaaqtuayaaŋat saamniisimaruaq

¹⁰ piŋasunik qisiqsiutiqaqłuni. Akutuqpalgich nuisaġluqqaaqtut, nauriat nuirut, aasii grape-gich nalautiłłutiŋ.

¹¹ Tigumiaġimaraġa umialgum qallutaa; tavraasii grape-gich ivsaiqł̣ugich ivsaŋat qallunmugniqsaġa aasii qaił̣ł̣ugu ilaanun.”

¹² Joseph uqallaktuq, “Uvva inna sivuniqaqtuq: piŋasut qisiqsiutit piŋasuurut uvlut.

¹³ Piŋasuni uvlianikpata umialgum anipkaġniaġaatin suliqutigiŋaiġḷutin, aasii savaaġnun utiqtillutin. Qaiññiaġiñ qallutaa piusikaaqtun wine-tuqtitkapku.

¹⁴ Aglaan itqaumayumagiŋma sunapayaaq igliġluataliqpan iliŋnun, suli ikayuġumiñaġumŋa umialik uqallautilugu uvapkun aasii ikayuġluŋa aniḷḷasiyumauŋa mattumaŋŋa tigutaaġvigmiñ.

¹⁵ Qanukkii uvva, nunurivḷuŋa aullautiŋagaanŋa nunaŋanniñ Hebrew-guruat, suli maaniunnii Egypt-mi sumik savaaqaŋaitchuŋa paliumaruamun nivviamuktitauyumiñaqsiḷuŋa.”

¹⁶ Igarit qaukłiŋata tusaakamiuŋ siññaktuŋa wine-liqirim iviġaumanaqtuakun mumigmauŋ, uqallautiŋagaa Joseph, “Siññaktuġmiruaŋa; tigumiaġniqsuaŋa niaqqumni qalliġiiñik punniġnik aguummaŋni.

¹⁷ Qalliġmi aguummagmi qanusiḷimaat kukiat umialigmun inniqsuat, aasii tigmiaġruich niġimaraŋich.”

¹⁸ Joseph-gum kiugaa, “Uvva inna sivuniqaqtuq: piŋasuuruat aguummaich piŋasuurut uvlut.

¹⁹ Piŋasuni uvluni Pharaoh-m anipkaġniaġaatin—aasii niaquiqsillutin! Suli niviŋŋaġniaġaa timin napaqsramun, aasii tigmiaġruich niġiñiaġaat timin.”

²⁰ Piŋasut uvlut pianiŋmata annivimiñi umialik niqinaqipkaiŋaruq iluqaiññun savaktimi qaukłipayaaŋiñun; anipkaŋagaik wine-liqirit qaukłiŋat suli qaukłiŋat igarit aasi sivuġaannuktiłługik qaukłiurat.

²¹ Utiqtinŋagaa wine-liqirit qaukłiŋat sivuani savaaġiŋaraanun,

²² aglaan tuqułługu qaukłiŋat igarit. Iluqani nalautinŋaruq Joseph uqallausiatun.

²³ Aglaan wine-liqirit qaukłiŋat itqaumagiŋaiñŋagaa Joseph; piiguŋaniġaa.