Genesis 39 - Iñupiatun Mumiksat Uqalugiksuat

Joseph-lu Potiphar-m Tuvaaqataalu

¹ Tavra Ishmael-miuguruat Joseph Egypt-muutiŋagaat aasii tunivḷugu Potiphar-mun, iḷagiraŋannun umialgum qaukłiuraŋisa, qaukłiuruaġli igluqpaum munaqsriŋiñun.

² Atanġum itqatigisimaaŋagaa Joseph suli piḷḷuatautiqaqtiłługu. Iñuuniqsuq Egypt-mium igluani ataniġiraġmi,

³ qiñiŋagaa Ataniġmun itqatigitilaaŋa Joseph suli piḷḷuatautiqaqtiłługu supayaamik savaaqaġaluaġman.

⁴ Potiphar-m iviġaumagiŋagaa suli ilimiñun kivgaliutivlugu; tavra qaukłiġuŋagaa iglumiñun suli suġalipayauramiñun.

⁵ Tavraŋŋaaglaan, Joseph pisigivlugu Atanġum piḷḷuatautiqaqtinŋagaa igluqatiiŋi Egypt-miuguruam suli sunapayaaq pigiraŋa iglumiñi nunaŋiññilu.

⁶ Potiphar-m Joseph qaunaksriliutiŋagaa supayaanun ilaata pigiramiñun suli isumaaluutiqayuiñŋaruq sumik aglaan niqit niġirani kisiisa. Joseph suaŋaŋaruq timimiñi suli aŋutigikhuni,

⁷ aasii aquvatigun ataniġiraŋata nuliaŋan kaviuġiliŋaniġaa Joseph suli apiġivlugu tuttaaqatigisukługu.

⁸ Aglaan ilaa pisuŋiñŋaruq aasii uqallautivlugu, “Uvvahii, ataniġiraġa isumaaluutiqalaitchuq sumik iglumiñi, qanukkii uvaŋa maaniiłłuŋa. Ilaatauvva qaukłiḷiutiŋagaaŋa supayauranun pigiramiñun.

⁹ Uvva ataniġnaqutiqaqtuŋa maani iglumi ilaatuttauq, suli aitchuġuŋiñŋaitkaaŋa sunik aglaan iliŋnik. Qanuġluŋaasii tainnatun pigiiḷḷiqunmik savagniaġniqpik suli piḷuusiqiluŋa paaqłaglugu God?”

¹⁰ Apiqsruqtaġaluaġmani Joseph uvlutuaġman, ilaata tuttaaqatigiŋaitkaa naakkaunnii itqatigilugu.

¹¹ Aglaan uvlut iḷaŋanni Joseph iglumun savagialgiñman, nalliat unnii iglumi kivgauruat tavraniinŋaiñŋaruq.

¹² Aġnam tiguŋagaa annuġaaŋagun aasii uqallakłuni, “Qaiñ tuttaaqatigiŋŋa.” Aglaan qimakłuni suli aqpamik aniŋaruq, uniññiġaa qaliġuani argaŋiñun.

¹³ Aġnam tautukkamiuŋ unisilaaŋanik qaliġuaŋa aasii aqpamik anivḷuni iglumiñ,

¹⁴ ququulaŋagai iglumi kivgatiŋ aasii uqaqhuni, “Uvva una tautuksiuŋ! Uuma uvva Hebrew-m, tuvaaqanma qaġġirraŋata igluptinnun, pisaaŋagaatigut. Isiqłuni uvva inimnun payariñiatakkaaŋa nalaqatigisukłuŋa, aglaan avaalaruaŋa nipatutilauraptun.

¹⁵ Tusaakamiŋa avaalaruaŋa, aqpamik aniruq, unił̣ł̣ugu una qaliġuani saniġamnun.”

¹⁶ Aġnam pigiŋagaa qaliġuaŋa Joseph-gum ataniġiraŋa aiḷġataqtillugu.

¹⁷ Tavraasii uqautigaa quliaqtuaġiramiñik. “Aptuma Hebrew-guruam kivgam qaġġisiŋaran mauŋa isiqtuaq inimnun aasii kipagivluŋa.

¹⁸ Aglaan avaalakama, aqpamik aniruq, unił̣ł̣ugu una qaliġuani saniġamnun.”

¹⁹ Potiphar qinnaliqpaŋaruq tusaagamiuŋ quliaqtuaġman nuliani Joseph-mun qanuq aŋatilaamiñik.

²⁰ Aasii Joseph tigupkaqługu suli tigutaaġvigmukługu umialgum isiqtaŋisa irviannun, tavra tavraniinŋaruq.

²¹ Aglaan Atanġum itqatigiŋagaa Joseph suli nagliktuqsimaaqługu, tainnamik isiqtanik qaunaksrim iviġaumagisuuŋagaa.

²² Joseph qaunaksriḷiutiŋagaa isiqtapayaanun suli savaaksrił̣ł̣ugu piraksraupayaaqtuanik tigutaaġvigmi.

²³ Qaunaksri tigutaaġvigmi munaqsriḷḷaiñŋaruq sunik Joseph-gum savaaġiraŋiññik, qanukkii Atanġum itqatigivlugu Joseph suli piḷḷuatautiqaqtiłługu supayaamik savaaqaġman.