Genesis 38 - Iñupiatun Mumiksat Uqalugiksuat

Judah-lu Tamar-lu

¹ Tamaani samma Judah-m uniññiġai aniqatiini nayuġiaqługu iñuk atiqaqtuaq Hirah-mik, inauvianiñ Adullam ittuaq.

² Tavrani Judah-m kasuŋagaa nutaġaq Canaan-miuguruaq aġnaq aapaŋa atiqaqtuaq Shua-mik. Tuvaaqasiutiŋagaa aasii siñiqatigivlugu;

³ siŋaiyauŋaruq aasii iġñiqaqłuni, Judah-m atchiŋagaa Er-mik.

⁴ Siŋaiyauvsaaŋaruq aasii iġñiqavsaaqhuni suli atchiqł̣ugu Onan-mik.

⁵ Iġñiqavsaalgiññami atchiŋagaa Shelah-mik. Judah Achzib-miinŋaruq aŋutaiyaaq animman.

⁶ Aŋayukłiq iġñini Er, Judah-m tuvaaqatiksraŋagaa atiqaqtuamik Tamar-mik.

⁷ Er-mguuq piḷġusiŋa pigiitchuaguŋaruq, aasii iviġaŋiñŋaniġaa Atanġum, tavraasii Atanġum tuqunŋagaa.

⁸ Tavraasii Judah uqallaŋaruq Er-m aniqataanun Onan-mun, “Siñiqatigisaqtuaġuŋ aniqarvich uiḷgaŋaruaq aġnaat. Piraksrautin nalautillugu tuvaaqataa aniqatigikapku, aniqatin kiŋuvaaqallayumauq.”

⁹ Aglaan Onan iḷisimaŋaruq miqłiqtut ilaata pigiyumiñaisilaaŋiññik, tavraasii siñiqatigikamiuŋ aniqanmi uiḷgaŋa, nauraksrani maqipkaŋagaa nunamun, miqłiqsiyumiñaiqsaqługu aniqanni.

¹⁰ Savaaġiraŋata iviġaŋaiñŋagaa Ataniq, aasii Atanġum tuqunmiñiġaaptauq.

¹¹ Tavraasii Judah-m uqallautiŋagaa ukuani Tamar, “Utiġiñ aapavich igluanun aasii uiḷgaŋaruagulutin iġñiġa Shelah agliḷġataqtillugu.” Tainna uqallaŋaruq sivuuġavluni Shelah-ptauq tuqutauniaġasugilugu, aniqatiimisun. Tavra Tamar utiŋaruq aimmivigmiñun.

¹² Qakugulimman Judah-m tuvaaqataa tuquŋaruq. Qivġuŋaiġataqami, ilaalu avilaitqatiniḷu Hirah Adullam-miu Timnah-muŋaruk, imnaiġmi qiuqtirviannun.

¹³ Iñuum uqallautigaa Tamar aaparuaŋa Timnah-muksaġnivḷugu qiuġiaqługich imnaiñi.

¹⁴ Tavraasii mattaqługich uiḷgaŋaruam annuġaaŋich atuqtani, matuvlugu kiiñani, aquvinniqsuq isiqsaġiaŋanun Enaim, ini Timnah-muksaġiamiittuaq. Iḷitchuġilluataŋaruq, Judah-m nukaqłiq iġñiŋa Shelah aglianiŋatilaaŋa, naakkauvva qaiñŋaitkaat katititqulugu ilaanun.

¹⁵ Judah-m tautukkamiuŋ, akiitchuunasugiŋagaa, qanukkii kiiñani matuŋavlugu.

¹⁶ Naluvluni ukuaġitilaaŋanik, ullaŋagaa apqutim saniġaani aasii uqallautivlugu, “Siñiqatigilakpiñ.” Apiġigaa aġnam, “Aasii sumik aitchuġniaqpiŋa siñiqatigigupkiñ?”

¹⁷ Ilaata kiugaa, “Tuyuġniaġikpiñ nuġġaġmik nagruligmik niġrutautimniñ.” Tamar-m apiqsruġaa, “Ki, sumik aitchullakkumiñaqpiŋa tigummiraksramnik tuyuġataqtillutin nagruligmik?”

¹⁸ “Sumik aasii aitchuġniaqpigiñ nalupqinaiyautiksramnik?” Judah-m apiġigaa. Tamar-m kiugaa, “Nalunaiñŋutaġnik akłunaaŋalu suli ayauppian tigumiaqtan.” Qaitkai ilaanun. Tavraasii nalaqatigiiŋaruk tavrani, aasii siŋaiyausaŋaruq.

¹⁹ Tamar aiñiqsuq, matuni piiqł̣ugu, atitqikł̣ugich uiḷgaŋaruam annuġaaŋich.

²⁰ Judah-m tiliŋagaa avilaitqatini Hirah aatquvlugu nagrulik suli tasuquvlugich aġnamiñ unniqsuqłiigutirani, aglaan Hirah-m paqinŋiñŋagaa.

²¹ Apiġiniġai aŋutit Enaim-mi, “Sumiitpaimña god-aiḷat nanġaivianniitchuuruaq akiitchuq apqutit saniġaanniittuaq?” “Akiitchuqaġataŋaitchuq god-aiḷat nanġaivianniitchuuruamik maani,” uqallaktut.

²² Utiŋaruq Judah-mun aasii uqaqhuni, “Paqinŋiḷḷakkiga. Aŋutit taavaniittuat uqallaktut akiitchuqaŋaitchugguuq qaŋaunnii taavani.”

²³ Judah uqallaktuq, “Pigiligich taipkua. Iñugnun iglautigitquŋitchugut. Akiḷiññiḷukkaluaġiga, aglaan paqinŋitkiñ.”

²⁴ Piŋasulluunnii tatqich pianigmata iñuum kilikkaa Judah, “Uvvahii, ukuan Tamar akiitchutun iḷiuqhuni, siŋaiyaumaruaq.” Judah piraksriiruq, “Annisilugu ikipkaġlugu tuqutchiuŋ.”

²⁵ Annisuurraullaġmi, kiliktitchaqtuŋaġaa aaparuani. “Siŋaiyauruŋa aŋunmiñ ukuniŋa piqaqtuanik. Tautukkich kimun pigimmagaisa—una nalunaiñŋutaligaaq akłunaaq suli ayauppiaq.”

²⁶ Judah-m iḷisaġivlugich uqallaktuq, “Ilaa iluakkuaqtuq. Piraksrautikkaluaġa uvaŋa ilaanun piŋaitkiga—qaiññiaġaluaqtaġa ilaanun iġñiġa Shelah tuvaaqasiutitqulugu.” Judah-m nalaqatigitqiŋaiñŋagaa.

²⁷ Iġñisuliġman, iḷitchuġiŋarut malġitilaaŋanik.

²⁸ Saŋŋitqatautinagutimmauŋ, igḷuata talliñi aninŋagaa; iġñipkairim tiguvlugu, qiḷiqsiŋaruq kaviqsuamik ivalumik, aasii uqallakłuni, “Taamna aniqqaaqtuaq.”

²⁹ Aglaan talliñi isitqiŋagaa, aasii aniqataa aŋutaiyaaq aniqqaaqhuni. Tavraasii iġñipkairi uqallaktuq, “Tavra ai tainnaqhutin anirutin!” Tavra atchiŋagaat Perez-mik.

³⁰ Aasiiḷi aniqataa aniŋaruq kaviqsuamik ivalumik taliġmiutaqaqhuni, aasii atchiŋaniġaat Zerah-mik.