Genesis 36 - Iñupiatun Mumiksat Uqalugiksuat

Kiŋuvaaŋich Esau-m

¹ Ukua kiŋuvaaġigaich Esau-m, taggisiqaqtuamtauq Edom-mik.

² Esau tuvaaqatchiŋaruq aġnanik Canaan-miuguruanik: Adah, pania Elon-gum Hit-miuguruam; Oholibamah, pania Anah-m iġñiġiraŋata Zibeon-gum Hiv-miuguruam;

³ suli Basemath, pania Ishmael aniqataa Nebaioth-gum.

⁴ Adah iġñiŋaruq Eliphaz-mik; Basemath iġñiŋaruq Reuel-mik;

⁵ aasiiḷi Oholibamah iġñiŋaruq Jeush-mik, Jalam-mik, suli Korah-mik. Iluqaġmiŋ taapkua iġñiġutiiŋich Esau-m aniŋarut nunaŋani Canaan.

⁶ Tavraasii Esau-m pivḷugich tuvaaqatiini, iġñiġutiini, paniutini, suli iluqaisa iñuich iglumiitqatini, iḷagivlugich iluqaisa pamiqsaagutini suli suġaliññaktaaġiŋarani nunaŋani Canaan. Aullaġniqsuq aniqanmiñiñ Jacob-miñ allamun nunamun.

⁷ Aullaŋaruq qanukkii nuna ilaatalu Jacob-guvlu iñuuniaġvigiraŋak naamaŋaiqhuni iñuuniaġutiksraŋigñun; iluqatik pamiqsaagukkaqpaił̣ł̣utik atautchimiilguiḷiŋaruk.

⁸ Tavraasii Esau, atiqaġmiruaq Edom-mik, iñuuniaŋaruq qimiġaŋiñi nunaŋata Seir-m.

⁹ Tavra ukua kiŋuvaaŋich Esau-m, maŋŋuuruam Edom-miunun qimiġaŋiñi nunaŋata Seir-m.

^10-13 Esau-m tuvaaqataa Adah iġñiqaŋamaruq atausimik, Eliphaz-mik, aasii Eliphaz tallimanik iġñiqaqłuni: Teman-mik, Omar-mik, Zepho-mik, Gatam-mik, Kenaz-miglu. Aasiisuli allakun tuvaaqatimigun, Timna-kun, atausivsaamik iġñiqaqłuni Amalek-mik. Esau-m tuvaaqataa Basemath iġñiqaŋamaruq atausimik, Reuel-mik, aasii Reuel iġñiqaqłuni sisamanik: Nahath, Zerah, Shammah, suli Mizzah.

¹⁴ Esau-m tuvaaqataa Oholibamah, panigiraa Anah-m tutaaluŋa Zibeon-gum, iġñiŋaruq piŋasunik: Jeush-mik, Jalam-mik, Korah-miglu.

¹⁵ Tavra taapkua maŋŋuuruat kiŋuvaaŋich Esau-m. Esau-m aŋayukłiq iġñiŋa Eliphaz maŋŋuuŋaruq ukunuŋa kiŋuvaaguruanun: Teman, Omar, Zepho, Kenaz,

¹⁶ Korah, Gatam, suli Amalek. Taapkua iluqaġmiŋ kiŋuvaaġiŋagaich Esau-m tuvaaqataata Adah-m.

¹⁷ Esau-m iġñiŋa Reuel maŋŋuuŋaruq ukunuŋa: Nahath, Zerah, Shammah, suli Mizzah. Iluqaġmiŋ taapkua kiŋuvaaġiŋagaich Esau-m tuvaaqataata Basemath-gum.

¹⁸ Ukuali maŋŋuuruat kiŋuvaaġiŋagaich Esau-m tuvaaqanmigun Oholibamah-kun, panigiraŋa Anah-m: Jeush, Jalam, suli Korah.

¹⁹ Iluqaġmiŋ taapkua maŋŋuuruat kiŋuvaaŋiŋagaich Esau-m.

Kiŋuvaaŋich Seir-m

^20-21 Ukua Seir-m, Hor-miuguruam, iġñiġiŋagaich, iñuuniaŋaruat taamani: Lotan, Shobal, Zibeon, Anah, Dishon, Ezer, suli Dishan. Taapkua iġñiġiŋagaich Seir-m Edom-mi, Hor-mi qaukłiuŋarut.

²² Lotan maŋŋuuŋaruq iġñiŋiñun Hori-m suli Heman. (Lotan aniqatiqaŋaruq aġnamik atiqaqtuamik Timna-mik.)

²³ Shobal maŋŋuuŋaruq iġñiŋiñun Alvan, Manahath, Ebal, Shepho, suli Onam-gum.

²⁴ Zibeon iġñiqaŋaruq malġugnik, Aiah suli Anah. (Tavra taamna Anah paqinŋaruaq uunaqłutiŋ suvliktuanik nunagluktuami qaunaksriḷḷaġmi aapami kakaktiŋiñik.)

^25-26 Anah aapagigaa Dishon-gum, maŋŋuuruaġli maŋŋuqatigiigñun Hemdan, Eshban, Ithran, suli Cheran. Anah paniqaŋammiuq atiqaqtuamik Oholibamah-mik.

²⁷ Ezer maŋŋuġigaat iġñiŋisa Bilhan, Zaavan, suli Akan.

²⁸ Dishan maŋŋuuŋaruq iġñiŋiñun Uz suli Aran.

^29-30 Ukua uvva Hor-miut maŋŋuġiraŋich nunaŋani Edom: Lotan, Shobal, Zibeon, Anah, Dishon, Ezer, suli Dishan.

Umialgich Edom-mi

^31-39 Umialiqaŋaiñŋaisa Israel-mi, ukua umialguŋarut nunaŋani Edom aquliġaġiikł̣utiŋ: Bela iġñiŋa Beor-m Dinhabah-miñ Jobab iġñiŋa Zerah-m Bozrah-miñ Husham nunaŋaniñ Teman Hadad iġñiŋa Bedad Avith-miñ (akiisinŋaraŋich Midian-miuguruat aŋuyagmata nunaŋani Moab) Samlah Masrekah-miñ Shaul Rehoboth-miñ Kuugmiittuamiñ Baal Hanan iġñiŋa Achbor-m Hadad Pau-miñ (tuvaaqatiqaŋaruaq Mehetabel-mik, pania Matred suli tutaalugivlugu Mezahab-gum)

^40-43 Esau maŋŋuġiŋagaat ukua Edom-miuguvlutiŋ qaukłiuruat: Timna, Alvah, Jetheth, Oholibamah, Elah, Pinon, Kenaz, Teman, Mibzar, Magdiel, suli Iram. Nuna iñuuniaġvigillaaraŋat taapkua maŋŋuuruat taggisiqaġaġniqsuq nanmiñiq iḷami atillaaŋanik maŋŋuuruam. Tavra taapkua kiŋuvaaġigaich Esau-m, aapagiraŋat Edom-miut.