Genesis 35 - Iñupiatun Mumiksat Uqalugiksuat

God-im Qaitchimmauŋ Piḷḷuatautiksraŋanik Jacob Bethel-mi

¹ God-im uqallautigaa Jacob, “Mayuġiñ Bethel-mun, aasii iñuuniaġlutin taamani. Nappaiyumautin ikipkaiviksraġnik uvamnun taikani, God niptaŋaruaq iliŋnun qimaagavich aniqatigniñ Esau-miñ.”

² Tavraasii Jacob uqallaŋamaruq igluqatigiramiñun iluqaiññun itqatigiramiñullu, “Igitchigik allaŋŋaqtat god-auruat pigirasi; salummaġlusi ilivsiññun suli salumaruanik annuġaaġlusi.

³ Aullaġniaqtugut maaŋŋa aasii Bethel-mugluta, taamani nappaiñiaqtuŋa ikipkaiviksramik God-mun ikayuqtigiŋaramnun isumaaluutimni suli itqatigivluŋa sumun aullaġaluaqama.”

⁴ Tavraasii qaiñŋagaich Jacob-mun allaniŋŋaqtat god-itiŋ pigiratiŋ suli siutiġutit atuqtatiŋ. Sauŋaniġaich ataanun oak napaaqtum qaniŋani Shechem.

⁵ Jacob iġñiġutiiŋiḷḷu aullaqsaġmata, sivuuġatchakpaŋamarut iñuuruat qanittuani nunaaqqiñi, suli iliŋisa piyumigilugich maliksaŋaiñŋagaich.

⁶ Jacob Luz-muŋaruq piqatigivlugich iluqaisa iñugirani, paŋmami Bethel-mik pisuuraŋannun, nunaŋani Canaan.

⁷ Nappaiŋaruq ikipkaivigmik tavrani suli atchiqł̣ugu God-iŋanun Bethel-gum, qanukkii God-im niptaġvigiŋavlugu ilaa tavrani qimaamman aniqanmiñiñ.

⁸ Rebekah-m qaunaksrauraŋa Deborah tuquŋaruq aasii iḷuviŋagaat ataanun oak napaaqtum siḷataani Bethel. Tavraasii atchiŋagaat “Napaaqtuŋa Qivġuvik (Oak).”

⁹ Jacob utiġman Mesopotamia-miñ, God-im niptaġvigivsaaŋagaa suli qaitchivḷugu quviasaaġusiaksraŋanik.

¹⁰ God-im uqallautigaa, “Atiqaqtutin Jacob-mik, aglaan tavraŋŋaaglaan atiġiniaġiñ Israel.” Tavra God-im atchiŋagaa Israel-mik.

¹¹ God uqallaŋaruq ilaanun, “Uvaŋa uvva Sapiġñaqtuaq God. Iñugiaktuanik miqłiqtuqaġumautin. Nunaqpaich kiŋuvaaġiniaġitin, suli maŋŋuuniaqtutin umialiguruanun.

¹² Aitchuġniaġikpiñ nunamik qaiñŋaramnik Abraham-mun Isaac-mullu suli qaiññiaġmigiga kiŋuvaaġiniaqtaġnun aqukkun.”

¹³ Tavraasii God mayuŋaruq tavraŋŋa uqaġvimigniñ.

¹⁴ Tavrani, God-im uqaqatigiŋammani, Jacob-gum napaqutchiŋagaa itqautikaaksramik uyaġagmik suli ilaaguaqtauvlugu inillakkamiuŋ kuviŋagaa wine-mik suli olive uqsruanik.

¹⁵ Atchiŋagaa taamna ini Bethel-mik atakkii God-im uqautiŋagaa Jacob tavrani.

Tuqumman Rachel

¹⁶ Jacob nanmiñiq iḷagiich aullaŋarut Bethel-miñ, aasii uŋasiguraŋŋaġmiksuli Ephrath-miñ, Rachel aulayyautiŋagaa siŋaiyaaŋata, tavraasii siġġaqiŋaruq iġñisuliqami.

¹⁷ Saŋŋitqataġniŋich suaŋasiviuraqtillugich, iġñipkairim uqallautigaa, “Sivuuġanak, Rachel; aŋutaiyaagumaruq aasi.”

¹⁸ Aglaan isukłiññiuraaliŋaruq, aasii aniqsaaġuiqsaaqami, atchiŋagaa iġñini Benoni-mik, aglaan aapaŋata atchiŋagaa Benjamin-mik.

¹⁹ Rachel tuqumman, iḷuviŋagaat saniġaanun apqutim Ephrath-muksaġiam, paŋmami Bethlehem-guruam.

²⁰ Jacob nappaiŋaruq nalunaiñŋutaksraŋanik uyaġagmik tavruŋa, nalunaiñŋutauruqsuli Rachel iḷuviŋanun paŋmamun aglaan.

²¹ Israel aullaqitqiŋaruq aasii nullaqłutiŋ avuŋatchianun nasiqsruġviŋata Eder-m.

Iġñiġutiiŋich Jacob (Israel)

²² Israel iñuuniaqtillugusuli tamattumani nunami, Reuben siñiqatiqaŋaruq Bilhah-mik, iḷaŋannik aapami nukaġaŋisa; Israel tusaakami qinnalipiaġataŋaruq. Jacob iġñiqaŋaruq qulit malġugnik (12).

²³ Leah-m iġñiġiŋagaich Reuben (Jacob-gum iġñiŋa aŋayukłiq), Simeon, Levi, Judah, Issachar, suli Zebulun.

²⁴ Iġñiŋigli aasii Rachel-gum Joseph-lu Benjamin-lu.

²⁵ Rachel-gum kivgaŋa Bilhah-vli iġñiġigaik Dan-lu Naphtali-ḷu.

²⁶ Leah-vli aasii kivgaŋa Zilpah-m iġñiġigaik Gad-lu Asher-lu. Taapkua iġñiŋich aniŋarut Mesopotamia-mi.

Isaac Tuqumman

²⁷ Jacob ullautiŋaruq aapamiñun Isaac-mun Mamre-mi, qaniŋani Hebron, Abraham-lu Isaac-guvlu iñuuniaġvigiŋaraŋagnun.

²⁸ Isaac iñuuŋaruq 180-tun ukiunikłuni

²⁹ suli tuquŋaruq utuqqalipiallakhuni; aasii iġñiŋiksa Esau-vlu Jacob-guvlu iḷuviŋagaak.