Genesis 34 - Iñupiatun Mumiksat Uqalugiksuat

Dinah Payarivḷugu Atuġmarruŋ Timaa

¹ Uvlut iḷaŋanni Dinah, paniŋak Jacob-guvlu Leah-vlu, isiqattaaŋaruq aġnanun Canaan-miuguruanun.

² Shechem iġñiŋata Hamor-m Hiv-miuguruam, qaukłiuruam nunaŋannun, tautukkamiuŋ Dinah, aasii payarivḷugu atuŋagaa.

³ Aglaan niviaqsiaq aġnaġikhuni piqpagiliqł̣ugu nakuaqqiutiŋagaa suli nakuaġiliqsinniuraaġaluaŋaruq ilaanun.

⁴ Shechem-gum uqallautiŋagaa aapani, “Dinah-mik nuliaksraġumagigma.”

⁵ Jacob iḷitchuġiŋaruq paniñi atuqtauŋatilaaŋanik payarivḷugu, aglaan iġñiġutiiŋi avani pamiqsaamigni iłłutiŋ, suŋaitchuq qaiḷġataqtillugich.

⁶ Shechem-gum aapaŋa Hamor uqaqatiqaġiaŋaruq Jacob-mun,

⁷ tikiayaammiullu Jacob iġñiŋi avaŋŋa nunamiñ. Tusaakamirruŋ, qaallaŋarut suli qinnalipiaġataqłutiŋ Shechem tainna savaŋaniġman suli pisaaŋŋatikun aŋalanniġmagich iñuŋich Israel payarivḷugu nalaqatigivlugu Jacob pania.

⁸ Hamor-m uqallautigai, “Iġñiġma Shechem uvva nakuaqqiutipiaġataġaa paniiñ; apiġigikpiñ, tuvaaqasiutipkaġuŋ ilaanun.

⁹ Sivunniuqatigiigḷuk tuvaaqatigiiksillasiḷugich avanmun iñugiravullu iñugiratillu.

¹⁰ Tavraasii maaniillayumausi nunaptinni piqatigiluta; sumipayaaq iñuuniaġumiñaqtusi, simmiqsuutillasiḷusiḷu isumavsisun, nunannallasilusiḷu.”

¹¹ Shechem uqallaktuq Dinah-m aapaŋanullu aniqatiiŋiññullu, “Iviġaumagiguvsiuŋ taamna, aitchuġniaġivsi sumik piqaġupayaaġuvsi.

¹² Uqallautiluŋa sunik aitchuusiaqaġukkuvsi, suli inillaglugu akiḷiutiksraq nuliaksraunmun qanutupayaaq isumavsisun; aitchuġniaġivsi supayaamik apiqsriaġiravsiññik, tuvaaqatigiliutipkaġumiñaġuvsiuŋ uvamnun.”

¹³ Shechem-gum kanŋunaqtuakun salumaiḷipkaŋammauŋ aniqatiktiŋ Dinah, Jacob iġñiŋisa kiuŋagaat Shechem aapaŋalu Hamor pisaasuġmiaġutikun.

¹⁴ Uqallautigaat, “Tuvaaqasiqsitchumiñaitkikput aniqatikput aŋunmun nalunaiḷutchiqsauŋaitchuamun. Taamna kanŋunaqsiḷiġutauniaqtuq uvaptinnun.

¹⁵ Iviġaumagitualugniaġikput uumuuna kisian ilivsi uvaptiktuttauq nalunaiḷutchiqsillugich aŋutipayaasi.

¹⁶ Tavraasii iviġaumaginiaġikput tuvaaqatiniktullasiñiġmun avanmun. Inillagniaqtugut akunnavsiññun suli atausiŋŋuqatigilusi.

¹⁷ Aglaan akuqtuġuŋitkuvsigik apiqsriavut suli nalunaiḷutchiqsauŋiḷḷusi, aullautiniaġikput ilaa.”

¹⁸ Uqalugiraŋich iviġaumagiŋagaich Hamor-m iġñiŋatalu Shechem-gum,

¹⁹ tavraasii nukatpiaq tavrauvvaa kamaksriŋaruq pitquraŋannik, qanukkii piqpakkiutiŋavlugu Jacob pania. Ilaa nuimaruagułhaaqtuatun inŋaruq nanmiñiq iḷamiñi.

²⁰ Hamor iġñiniḷu Shechem kasimavigmuŋaruk iniqpaum upkuaqpaŋanun suli uqautivlugich iñuŋich inauruam:

²¹ “Ukua iñuich iñugiksut; iñuuniaġlich nunami piqatigiluta suli kukiḷullalutiŋ isumamiktun. Nuna aŋiruq naamaruq iliŋiññullu. Tuvaaqasiutilavut paniŋich suli uvagut qaiḷḷugich panivut iliŋiññun tuvaaqasiutilugich.

²² Aglaan uvva taapkua iñuich iñuuqasiutiyumiñatualuktut akunnaptinnun suli atausiŋŋuqatigiluta kisiatualuk iluqaisa nalunaiḷutchiġuptigich iḷavut aŋutauruat, iliŋisitun nalunaiḷutchiqsauŋaruatitun.

²³ Pamiqsaaġiraŋich suli iluqaisa suġautaġiraŋich piginiaŋitpisigik uvagut? Tainnamik aŋiġlavut iñuuniaġumiñaġniḷugich akunnaptinni.”

²⁴ Iluqapayauraġmiŋ iñuuniaqtuaguruat tavrani inimi iviġaŋarut piyumisaaġutigiraŋagnik Hamor-vlu Shechem-guvlu, tavraasii aŋutipayaurat nalunaiḷutchiqsauŋarut.

²⁵ Piŋasut uvlut pianigmata, aŋutit kiiqsiuŋŋaisasuli nalunaiḷutchiqsauniġmigniñ, malġuk Jacob iġñiŋik, Simeon-lu Levi-ḷu, aniqatiiŋik Dinah-m, savikpatik pivḷugik, iniqpagmuŋaruk suiḷaurivḷutiŋ, aasii tuqułługich iluqaisa aŋutit,

²⁶ taputivlugik Hamor-lu iġñiŋalu Shechem. Tavraasii pivḷugu Dinah Shechem igluaniñ aullaqhutiŋ.

²⁷ Tuquttaiganigmagnik Jacob-gum allat iġñiŋich tigligaiŋamarut nunaaqqimi pisigivlugu aniqatiktiŋ kanŋunaqsiḷiŋammarruŋ.

²⁸ Piŋagaich niġrutit, pamiqsaat, kakaktit, suli sunapayauraq nunaaqqimittuat suli taavani nunaŋani.

²⁹ Piññaktaaġiŋagaich suġalipayaaŋich, suli iluqaisa aġnallu miqłiqtullu, suli tigligaivḷugich igluŋisa suġauttaŋi.

³⁰ Jacob-gum uqallautiŋagaik Simeon-lu Levi-ḷu, “Isumaalugnamun iḷigivsiñŋa; tavra Canaan-miuguruat, Periz-miuguruallu, kialiqaalu nunamiittuam uumigiliġñiagaanŋa. Iñugiaktuanik iñuqaŋiñmiuŋa; katillutiŋ amillutisaqpanŋa aŋuyagluŋa, iluqaġmiŋ nanmiñiq iḷavut suksraunġiqsauniaqtut.”

³¹ Aglaan iliŋiksa kiuniġaak, “Aŋalatinniaŋitkikpuk aniqatikpuk akiitchualuktun.”