Genesis 33 - Iñupiatun Mumiksat Uqalugiksuat

Jacob-gum Kasuġaa Esau

¹ Jacob-gum tautuŋagaa Esau qairuaq 400 iñuni piqatigivlugich, aasii avikługich miqłiqtuni Leah-mullu, Rachel-mullu, suli aġnagnun kivġamiñun.

² Sivulliġuutiŋagaik nuliaġmi kivgaŋik suli miqłiqtuŋich, aquatigun aasii Leah-lu miqłiqtuŋiḷu, aasii aqulliġuutivlugik Rachel-lu Joseph-lu.

³ Jacob sivulliġuutiŋaruq aasii pułłuni nunamun tallimat malġugni qallikamiuŋ aniqatini.

⁴ Aglaan Esau-m aqpałłuni kasuġiaqsauraŋagaa, iqimmalaaqługu, suli kunikł̣ugu. Iluqatik qiaġutiŋaruk.

⁵ Esau-m qiviaqługich tautukkamigich aġnallu miqłiqtullu, apiġigaa, “Kitkut makkua iñuich piqatigivich?” “Tamarra, aŋuun, miqłiqtut God-im nagliktuutiqpagmiñi qaisaŋich uvamnun,” Jacob-gum kiugaa.

⁶ Aasii aġnak kivgak qaivḷutiŋ miqłiqtutiglu punŋarut;

⁷ Leah-suli miqłiqtuniḷu qaiŋarut pułłutik aasii; suli aqulliqpiaguvlutik Joseph-lu Rachel-lu punŋammiuk.

⁸ Esau apiqsriruq, “Allat aasii apkua kasuqtatka? Sumik sivuniqaqpat?” Jacob-gum kiugaa, “Iviġaumagiliquvluŋa iliŋnun.”

⁹ Aglaan Esau uqallaktuq, “Naamaruŋa, aniqatiiŋ; pigikkich ilvich pigiratin.”

¹⁰ Jacob uqallaktuq, “Naumi, apiġigikpiñ, iviġaumagiliŋagumŋa, akuqtuġuŋ aitchuutiga. Tautukkapku kiiñan uvamnun tautugmatun God-im kiiñaŋanik ittuq, iḷammiulluatautiqaqavich uvamnun.

¹¹ Akuqtuqupiaġiga taamna aitchuutiligaaġa iliŋnun; God-im nagligisimaaqłuŋa suli aitchuŋagaaŋa supayaamik pigiraksraġiramnik.” Jacob-gum kiiqsruġmani akuqtuŋagaa.

¹² Esau uqallaktuq, “Itqanaiyaġluta aullaqta. Sivulliuniaqtuŋa.”

¹³ Jacob-gum kiugaa, “Iḷisimarutin miqłiqtut piḷguitchut, suli isummatigiraksraġigitka pamiqsaat ivaaqaqtuat. Igliqtuiññaqtitaugumiŋ atausimiunnii uvlumi, iluqaġmiŋ pamiqsaat tuquniaqtut.

¹⁴ Aullaqiiñ sivumni, maliġiniaġikpiñ sukaiḷaamik, iglauniaqtuŋa sukatilaaŋatitun pamiqsaallu miqłiqtullu aŋulġataġlutin Seir-mi.”

¹⁵ Esau uqallaktuq, “Uniḷḷagiñmi iñugma iḷaŋich iliŋnun.” Aglaan Jacob-gum kiugaa, “Tainnaunnii piŋiḷḷutin qanuq uvva iviġaummatigitqusiññaqtuŋa iliŋnun.”

¹⁶ Tavraasii Esau utiqsaŋaruq Seir-mun.

¹⁷ Aglaan Jacob-li aullaŋaruq Sukkoth-mun, tavrani aasii igluliŋaruq ilimiñun suli uqqiyviksriuqługich pamiqsaaġirani. Tainnaqługu taamna ini atchiŋagaat Sukkoth-mik.

¹⁸ Utiqami Mesopotamia-miñ (Paddan Aram) Jacob tikiñŋaruq surruił̣ł̣uni Shechem-mun nunaŋani Canaan aasii nullaqłuni nunamun qaniŋanun inauruam.

¹⁹ Tauqsiŋagaa iḷaŋa nunam kiŋuvaamiñiñ Hamor-m aapaŋata Shechem tallimakipiatun (100) manigñik qatiqtuanik.

²⁰ Nappaiŋaruq ikipkaivigmik tavrani suli atchiqł̣ugu El-mik, God-iŋa Israel.