Genesis 32 - Iñupiatun Mumiksat Uqalugiksuat

Jacob-gum Kasuqsaġumaalliġaa Esau

¹ Jacob aullaqimmiuġlu, isaġulgich kasuŋagaat.

² Tautukkamigich, uqallaktuq, “Uvvauna God-im nullaummiviginiġaa”; tavraasii atchiqł̣ugu Mahanaim-mik.

³ Jacob kiliksiyyaqtitchiŋaruq sivumiñi aniqanmiñun Esau-mun, Seir-m nunaŋani, nunaqpaŋani Edom.

⁴ Piraksriŋagaich inna uqallaquvlugich: “Uvaŋa, Jacob, kamaksrisuuruaq kivgaġiran, uqaqtuŋa umialimnun Esau-mun itqatigiŋagiga uvva Laban suli utiqsakaŋiñŋaruŋa uvva akkupagmuaglaan.

⁵ Pamiqsaaqaqtuŋa, kakaktinik, imnaiñik, nagrulignik, suli kivganik. Uvva tilisiruŋa uqautitquvlutin, aŋuun, iviġaummatiniqugaluaqłutin uvamnun.”

⁶ Kiliksiyyaqtuat utiġamiŋ Jacob-mun, uqallaktut, “Ullaktaqput aniqatin Esau, aasii amma qaisaaniktuq kasuġiaqsaqłutin. Piqatiqaqtuq 400-tun iñugiaktigiruanik aŋutinik.”

⁷ Jacob iqsiḷiŋaruq suli isumaalutchakhuni; aviŋagaich piqatigirani iñuich malġuigułługich, suli imnaich, nagrulgich, pamiqsaat, suli pikukturuat.

⁸ Isumaruq, “Esau-m qaiḷuni aŋuyakpagich sivulliuruat, alġaiŋich pigruġlutiŋ qimallaniaġugnaqtut.”

⁹ Tavraasii Jacob aŋaiyyuŋaruq, “God-auruatiin aappaalumnun Abraham-mun suli God-auruatin aapamnun Isaac-mun, tusaaŋŋa! Uqallautiŋagiŋma, Ataniiq, utiquvluŋa nanmiñiq nunagiramnun suli iḷamnun, suli ilvich sunapayaaq iluaġlugu itinniaġniŋagiñ uvamnun.

¹⁰ Nalliummatiŋitchuŋa iluqaanun nakuuniġnun suli piŋitqataaŋiññiġnun maniraġnun uvamnun, kivgauruamun iliŋnun. Ikaaŋagiga Jordan sumik piqaŋił̣ł̣uŋa allaagun ayauppiaġiraġma, tavraasii uvva utiqtuŋa piqatigivlugich ukua malġuiguruat.

¹¹ Annautiŋŋa, aŋaiyyuruŋa, aniqatimniñ Esau-miñ. Iqsiruŋa—sivuuġaruŋa qaiñasugalugu suksraunġiġiaġluta iluqata, aġnallu miqłiqtullu.

¹² Itqaumalutin unniqsuqłiiŋagiŋma sunapayaaq iłuaġlugu uvamnun inniaġnivḷugu suli iñugiaktuanik kiŋuvaanigniaġnivḷuŋa kia unnii kisitanikkumiñaisaŋiññik, iñugiaktigilutiŋ qaviatun taġium siñaaniittuatun.”

¹³ Unnuiganikami tavrani, Jacob naliġaŋaruq pamiqsaagutimiñiñ aitchuutiksramiñik aniqanmiñun Esau-mun:

¹⁴ 200-nik aġnasallunik nagrulignik, iñuiññatun (20) iñugiaktigiruanik aŋusallunik, 200-nik aġnasallunik imnaiñik, iñuiññatullu (20) iñugiaktigiruanik aŋusallunik,

¹⁵ iñuiññaq quliñik (30) pikukturuanik, miluktitchiruanik, piqatigivlugich piayaaŋich, malġukipianik (40) immulivigñik, quliniglu aŋusallunik, iñuiññatun (20) iñugiaktigiruanik aġnasallunik kakaktinik quliñiglu aŋusallunik.

¹⁶ Qavsiuttaqługich iliŋiguallaaniġaich aasii kivgaġiramiñik qaunaksriḷiḷḷaavlugich. Uqallautiŋaniġaich, “Sivulliusitchi uvamniñ aullaġitchi, akunniqallaalugich kanŋullaat aquliġaġiiksuat.”

¹⁷ Piraksriiruq sivulliuruamun kivgamun, “Aniqatigma Esau-m kasuqpasi suli apiġilusi, ‘Kiña umialigiviuŋ? Sumuaqsivisi? Kia makua niġrutiŋich sivuqqavsiññiittuat?’

¹⁸ kiuruksraġigiñ, ‘Pigigaich kivgaġiraqpich Jacob-gum. Tuyuġigaich aitchuutigisaqługich umialigmiñun Esau-mun, Jacob amma ilaa aquuraptinniittuq.’”

¹⁹ Tainnasuli piraksriŋagaa tugliġiraŋa, piŋayuallu, suli iluqaisa aullariruat kanŋuuruanik: “Inna uqallautiruksraġigiksi Esau kasuġuvsiuŋ.

²⁰ Uqallakkisirusi, ‘Aaŋ, kivgaġiraqpich Jacob-gum aquliraġaatigut.’” Jacob isumaruq, “Qinnaŋaipayaaqtinniaġiga aitchuutigirapkun, aasii kasuġupku, suagguuq suliqutigiŋaiġñiaġaaŋa.”

²¹ Aullaqtinŋagaich aitchuutigirani sivumiñi aasii unnuivḷuni nullaqłutiŋ.

Jacob Suġuqatiqaġman Peniel-mi

²² Tavrani unnuami Jacob makinŋaruq, kaluqługik nuliagni, malġuk aġnak kivgagni, suli qulit atausiq (11) miqłiqtuni, aasii ikaaqługu Jabbok River.

²³ Ikaaqtitanikamigich, ikaaqtinŋamiñigaich iluqaisa ilaata suġaliġirani,

²⁴ aglaan ilaa uniktinŋaruq, kisiŋŋuqłuni. Tavraasii aŋun qaiŋaruq aasii suġuqatigiaqsivḷugu uvlaaġiaġataqtillugu.

²⁵ Aŋun iḷitchuġikami akimaniaŋisilaamiñik, anaugaa Jacob sivyaaŋagun, aasii uniuqtiłługu.

²⁶ Aŋutim uqallautigaa, “Pilinŋa; uvluaqsiruq imma.” “Pilinniaŋitkikpiñ, aitchuŋaunnaŋa piḷḷuatautiksramnik,” Jacob-gum kiugaa.

²⁷ “Kimik atiqaqpich?” aŋutim apiqsruġaa. “Jacob,” ilaata kiugaa.

²⁸ Aŋun uqallaktuq, “Atiġiŋaiġñiaġiñ Jacob. Suġuqatiqaŋarutin uvva God-mik suli iñugnik, aasii akimavlutin; tavraasii atiqaġniaqtutin Israel-mik.”

²⁹ Jacob uqallaktuq, “Uqallautiŋŋali ilvich atiġnik.” Aglaan ilaata kiugaa, “Summan iḷisimasukpiuŋ atiġa?” Tavraasii qaitchiŋagaa quviasaaġunmik Jacob tavrani.

³⁰ Jacob uqallaktuq, “Qiñiŋagiga God tavruŋa, suli uvva iñuuvluŋasuli”; tavraasii atchiŋagaa taamna ini Peniel-mik.

³¹ Siqiñiq nuiḷġataŋaruq Jacob aullaqimmiuġlu Peniel-miñ, aasii tusianŋaruq pisigivlugu sivyaani.

³² Paŋmamuaglaan kiŋuvaaŋisa Israel niġiḷaiñŋagaat niqaa mumiġum navyaaŋanun ataruam kuutchiñagmun, qanukkii tavruuna nukiŋagun Jacob anaurauŋavluni.