Genesis 30 - Iñupiatun Mumiksat Uqalugiksuat

¹ Aglaan Rachel-gum qitunġiŋaiñŋagaa Jacob, aasii saŋiagiliqł̣ugu aataurani suli uqallautigaa Jacob, “Miqłiqtuqaqtinŋisuaġumŋa tuquniaqtuŋa.”

² Jacob-gum uumitchautiŋagaa Rachel suli uqallakhuni, “God inaŋiġumiñaitkiga. Ilaata tavra qitunġiḷaisitkaatin.”

³ Uqallautigaa, “Uvva kivgaġa Bilhah; siñiqatigisaġiñ, miqłiqtuqautiyumagaaŋa. Taaptumuunaaqługu aakaġuġumauŋa ilaagun.”

⁴ Tavraasii qaiñŋagaa kivgani Bilhah uimiñun tuvaaqasiutiruatun, aasii siñiqatigiŋagaa.

⁵ Bilhah siŋaiyauŋaruq aasii iġñiqaqhuni Jacob iġñiŋanik.

⁶ Rachel uqallaktuq, “God-im isivġiutimiñi iviġaumagiŋagaaŋa. Tusaavlugu aŋaiyyutiga iġñiksritkaaŋa”; tavraasii atchiŋagaa Dan-mik.

⁷ Bilhah siŋaiyauvsaaqhuni igḷugaa Jacob iġñiŋa.

⁸ Rachel uqallaktuq, “Siġġaqivluŋa suġuqatigiŋagiga aatauraġa, aglaan akimaruŋa”; tavraasii atchiŋagaa Naphtali-mik.

⁹ Leah miqłiqsiḷḷaiġñiqami, qaiñŋagaa kivgani Zilpah Jacob-mun nuliaġitquvlugu.

¹⁰ Zilpah iġñiqaŋaruq Jacob-miñ.

¹¹ Leah uqallaktuq, “Piḷḷuataqtuaguruŋa”; aasii atchiŋagaa Gad-mik.

¹² Zilpah iġñivsaaŋaruq Jacob-miñ,

¹³ aasii Leah uqallaktuq, “Quviasupiallaktuŋa! Tavra aġnauruat quviasuktualiullasigaanŋa”; tavraasii atchiŋagaa Asher-mik.

¹⁴ Kivluiñaqsimman palauvaksranik Reuben nautchiaqaġvigñukkami paqinŋaruq nauruanik mandrake-nik, aasii aakamiñuutivlugich Leah-mun. Rachel-gum uqallautigaa Leah, “Aitchullaŋŋa iġñiqpich mandrake-gutiŋiññiñ.”

¹⁵ Leah-m kiugaa, “Naamaŋitpa uigiŋakamŋa? Naaggasuli uvva pisuaqsimmigitin iġñiġma mandrake-gutiŋich.” Rachel uqallaktuq, “Aitchuġumŋa iġñiqpich mandrake-ŋiññik, siñiqatigiyumiñaġiñ Jacob unnuapak.”

¹⁶ Jacob qaimman nautchiaqaġvigñiñ anaqammagu, Leah-m paaqługu uqallautigaa, “Siñiqatiginiaġiŋma unnuapak qanukkii akiḷiqsauŋarutin uvva iġñiġma mandrake-gutiŋiññik.” Tavraasii nalaqatigiŋagaa taaptumani unnuami.

¹⁷ God-im kiuŋagaa Leah-m aŋaiyyutaa, aasii siŋaiyauvluni tallimmiŋagai iġñiġutini Jacob-miñ.

¹⁸ Leah uqallaktuq, “God-im akiḷiusiaqaqtitkaaŋa, qanukkii qaiñŋakapku kivgaġa uimñun”; aasii atchiŋagaa iġñini Issachar-mik.

¹⁹ Leah aasii siŋaiyauvsaaqłuni itchaksraŋŋuŋagai iġñiġutini Jacob-miñ.

²⁰ Ilaa uqallaktuq, “God-im aitchulluataŋagaaŋa. Tavra uigma akuqtullasigaaŋa, qanuq uvva itchaksranik iġñiniktitkiga”; tavraasii atchiŋagaa Zebulun-mik.

²¹ Aquvatigun paniqaŋaruq, atchiqsamiñik Dinah-mik.

²² Tavra God-im itqaumaŋagaa Rachel; kiuŋagaa aŋaiyyutaa aasii miqłiqsiḷḷasivḷugu.

²³ Siŋaiyausaŋaruq aasii iġñiqaqhuni. Uqallaktuq, “God-im piiġaa kanŋunaqtuaq uvamniñ iġñiqaqtiłłuŋa.

²⁴ Atanġumtuq iġñiksrivsaaġliŋa”; aasii atchiŋagaa Joseph-mik.

Jacob-gum Sivunniuqatigimmauŋ Laban

²⁵ Joseph anianiŋman Jacob-gum uqallautigaa Laban, “Aullaqtinŋa, utiġumauŋa aimaaġvimñun.

²⁶ Qaiḷḷugich tuvaaqatitka suli miqłiqtutka akiññaktaaġiŋaratka savautivlutin, aullaġumauŋa. Iḷisimarutin qanutun savalluataŋatilaamnik ilignun.”

²⁷ Laban-gum uqallautigaa Jacob, “Uumiŋa uqallallaglaŋa: Iḷitchuġiŋaruŋa nalautitchumaaqtuanik Atanġum piḷḷuatautiqaqtinmaŋa ilvich pisigivlutin.

²⁸ Qanutun akiññaktaġukkuvich taisiḷutin, akiḷiġñiaġitka.”

²⁹ Jacob-gum kiugaa, “Iḷisimarutin qanutun savaŋatilaamnik iliŋnun suli niġrutitin piḷḷuataŋatilaaŋiññik qaunagikapkich.

³⁰ Iñugiakitkaluaqtuat pigiratin qaiŋaiñŋaġma iñugiaksipiaġataŋarut, suli Atanġum piḷḷuatautiqaqtitkaatin sugnamukkaluaqama. Paŋmami uvvali savaŋnaqsiruŋa igluqatiitka savautilugich.”

³¹ “Sumik akiḷiġñiaqpigiñ?” Laban apiġigaa. Jacob-gum kiugaa, “Akiññaktaagiḷḷuŋaunnii. Qaunaginiaġitkasuli niġrutitin una iviġaumaginiaġupku:

³² Iluqaisa pamiqsaaġiratin qimilġuuġlagich uvlupak aasii piiqługi aglakulaatuallu naakka miŋuġluktuallu imnaipayaat suli maŋaqtaagulaaqtuallu imnaiyaapayaat suli miŋuġluktuallu naakka aglakulaaqtuallu nagruligit. Tavra taapkuatualuich akiḷiusiaġisuktatka.

³³ Qakugu siġġaġnaiḷḷugu iḷitchuġiyumiñaqtutin pitqiksiġautaiñŋatilaamnik. Qimilġusaqtuaġupkich akiññaktaatka, nagrulignik piqaġniġuma aglakulaaŋitchuanik naakka miŋuġluktuaguŋitchuanik suli imnaiyaañik maŋaŋitchuanik, tavra iḷisimaniaqtutin tigliktaagutilaaŋiññik.”

³⁴ Laban-gum kiugaa, “Iviġaumagigiga taamna. Tainna piñiaġniqsuguk uqallausiqtun.”

³⁵ Aglaan taaptumani uvlumi Laban-gum piiŋagaich aŋusallut nagrulgich quvluayuuligaat naakka aglakulaaqtuat suli aġnasallupayaat aglakulaaqtuat naakka miŋuġluktuat naakka qatiqtaaqapayaaqtuallu; piiġmiñiġaisuli iluqaisa maŋaqtuat imnaich. Iġñiġutiini qaunaksriḷiutiŋagaich taapkunuŋa.

³⁶ Aullautiŋagaich Jacob-miñ pamiqsaagutini ayuulgutilaamisun piŋasuni uvluni. Jacob-gum qaunaginiġaich Laban-gum pamiqsaaŋich unitchaŋich.

³⁷ Jacob suŋaaqtaanik qisiqsiutiksraŋaruq poplar-nik, almond-nik, suli plane-git napaaqtuŋiññiñ aasii qaaŋat iḷaŋagun piiyaqługu qisiqsiutit qatiqtaaŋa qiñiġnaqsivḷugu quvluayuuqłuni.

³⁸ Inillakługich aasii tamatkua qisiqsiutit sivuġaannun pamiqsaat imiġviŋisa. Tavruŋa inillaŋagaich, qanukkii niġrutit nulliġuummata imiġiaqamiŋ.

³⁹ Tavraasii nagrulgich nulliġmata sivuġaanni qisiqsiutit, piayaaliraqtut miŋuaġniġulaaqtuanik, aglakulaaqtuanik, suli miŋuġluktuanik.

⁴⁰ Jacob-gum imnaich iliŋiguaqsimaaŋagaich nagruligniñ aasii saatiłługich tuŋaanun miŋuaġniġulaatun ittuanun suli maŋaqtaanun niġrutiŋisa Laban pamiqsaaŋisa. Tainnaqłuni naupkaŋagaich ilaata pamiqsaagutini aasii iliŋisiguaŋavlugich Laban-gum pamiqsaaŋiññiñ.

⁴¹ Suaŋaruat niġrutit nulliġmata, Jacob-gum qisiqsiutit iḷiraġigaich sivuġaannun imiġiaġviich, nuliquvlugich akunġanni qisiqsiutit.

⁴² Aglaan iḷiḷaitkaich qisiqsiutit sivuġaannun sayaitchuat niġrutit. Qakugumman Laban niġrutiniŋaruq iluqaiññik sayaitchuanik, aasii Jacob iluqaiññik sayyaġikhutiŋ niqqaġiksuanik.

⁴³ Tainnaqhuni tavra Jacob umiallapiaġataŋaruq. Iñugiaktuanik pamiqsaaqaŋaruq, aġnallu aŋutillu kivgaŋich, pikukturuanik, suli kakaktinik.