Genesis 3 - Iñupiatun Mumiksat Uqalugiksuat

Iñuk Kamaksriŋiñman

¹ Nimiġiagguuq pisaasuġniqsrauŋaruq niġrun Atanġum God-auruam savaaġiŋaraŋiññiñ. Nimiġiam apiġigaa aġnaq, “God-im tavra uqallautipiaqpatin niġitquŋił̣ł̣utin nallipayaaŋanniñ napaaqtut nautchiaqagvigmi?”

² “Niġiyumiñaqtuguk siiġñaŋiñiñ nallipayaaŋisa napaaqtut nautchiaqaġvigmi,” aġnam kiugaa,

³ “aglaan napaaqtumiñ qitqaniittuamiñ. God-im uqallautiŋagaatiguk niġitquŋił̣ł̣unuk siiġñaŋanik, aksiquŋitkaa unnii; niġituaġumnugguuq, tuquniaqtuguk.”

⁴ Nimiġiam kiugaa, “Taamna iḷumun inŋitchuq; tuquniaŋitchusik.

⁵ God uqallaŋaruq tainna qanukkii iḷisimaruq niġiguvsik irrasik agmaġniaqtut, aasii iḷiñiaqtusik God-itun iḷisimallasiḷusik nakuuruamiglu nakuuŋitchuamiglu.”

⁶ Aġnam tautuŋagaa qanutun qiñiyunaqtilaaŋa napaaqtuq qanutullu siiġñaŋich nakuuniaqtilaaŋich niġiruni, suli isumaŋaruq aliuġnaqtuaguniaqtilaaŋa isumaturuaġuġumik. Tavraasii tigusivḷuni siiġñamik iḷaŋa niġiŋagaa. Aitchuqługuasii iḷaŋanik uiñi, piqatigirani, aasii uiŋata niġimmigaa.

⁷ Niġianigluqqaaqtumiŋ, kaŋiqsimmatiniŋaruk iḷitchuġivlutiglu annuġaisilaamignik; tavraasii miquŋagaich akutuqpaŋich fig-gich atautchimun aasii taluvlutik ilimignun.

⁸ Tavra tusaagaak Ataniq God pisuaqtuaq nautchiaqaġvigmi anaqamman aasii iriŋaruk akunġannun napaaqtut.

⁹ Aglaan Atanġum God-im ququulagaa aŋun, “Sumiitpich?”

¹⁰ Aŋutim kiugaa, “Tusaaraqpiñ nautchiaqaġvigmi; aasii iqsitchakłuŋa iriqtuaŋa iliŋniñ, qanukkii annuġaitchuŋa.”

¹¹ “Kia uqallautivatin annuġaiññivḷutin?” God-im apiġigaa. “Niġiran siiġñaq niġitquŋitchaġa?”

¹² Aŋutim kiugaa, “Aġnam qaisaqpich itqatigitquvluŋa aitchuqtaani siiġñamik, aasii niġiraġa.”

¹³ Atanġum God-auruam apiġigaa aġnaq, “Summan tainna piruatin?” Aġnam kiugaa, “Nimiġiam pisaasuġmiaġunmigun sagluqivluŋa niġipkaġaaŋa.”

God-im Quliaġaa Isivġiun

¹⁴ Atanġum God-im uqallautigaa nimiġiaq, “Tatavsaqtauniaqtutin taaptumuuna; kisivitualuk niġrutipayaaniñ igḷutuqtaksraġigiñ una tatavsaun: Tavraŋŋaaglaan paamġuġniaqtutin narraaġniñ, aasii niġiruksrauniaqtutin avyumik iñuuniqtutilaaqtun.

¹⁵ Uumikkutigiiksinniaġivsik aġnaġlu; iluqasik kiŋuvaasik uumikkutigiiguuniaqtut. Kiŋuvaaŋata karugniaġaa niaqqun, aasiiḷi kiŋuvaaqpich kiiñiaġaa kimmiŋa.”

¹⁶ Aasiiḷi uqallaktuq aġnamun, “Agliḷaaġniaġiga siġġaġniuġniksran siŋaiyauguvich suli anniġñaġniksran iġñiguvich. Tainnaitkaluaqtillugu, nakuaġilugu pigisugniaġisuli uigiran, aglaan ilaan atanniqsuġniaġaatin.”

¹⁷ Aasii uqallaktuq aŋunmun, “Naalaġnivḷugu tuvaaqatin niġiŋagiñ siiġñaq niġitquŋisaġa. Taamna savaan pisigilugu, nuna piaġiiḷiñiaqtuq. Siġġaqilutin savaktuksrauniaqtutin iñuuniqtutilaaġni naupkaiñiaġlutin naamasisaġlugu niqiksran.

¹⁸ Nauniaqtut kakiḷḷaġnaqtuat, aasii niġiruksrauniaqtutin nauruanik nunami.

¹⁹ Siġġaqilutillu siiqsipkaġlutillu nauripkaġniatagniaġiñ nuna, utiġataġniġnun nunamun savaaguvigñun. Piḷiaguŋarutin nunaġruiññaġmiñ, tavra aasii nunaġutqigñiaġmiutin.”

²⁰ Adam-gum atchiŋagaa tuvaaqatini Eve-mik, qanukkii aakauruq iluqaiññun iñuuruaguruanun.

²¹ Tavragguuq Ataniq God annuġaaliuŋaruq niġrutit amiŋiññik Adam-mullu tuvaaqataanullu, aasii annuġaaqługik.

Adam-lu Eve-lu Aullaqtitauruk Nautchiaqaġvigmiñ

²² Tavraasii Ataniq God uqallaktuq, “Tavra ukuak iññuk iḷiruk uvaptiktun suli iḷisimmatiniktuk suna nakuutilaaŋanik naakka nakuuŋisilaaŋanik. Niġiruksrauŋiñmiuk napaaqtumiñ qaitchiḷḷaruamiñ iñuggunmik, aasii iñuulutik isuitchuamun.”

²³ Tavraasii Atanġum God-auruam aninŋagaik Nautchiaqaġvigmiñ Eden-mi nautchirriitquvlugik nunamik iliŋiksa iñuguqtitauviagniñ.

²⁴ Kivaliñġanun nautchiaqaġvium qaunaksriḷiŋaruq cherubim-nik ikualaruamiglu savikpagmik saatqataaqtuamik suŋnamulliqaa. Tavra taaptuma kiñaliqaa qallipkaġniaŋitkaa napaaqtumun qaitchiḷḷaruamun iñuggunmik.