Genesis 29 - Iñupiatun Mumiksat Uqalugiksuat

Jacob Tikitchuq Laban Aimmivianun

¹ Jacob iglauŋaruq tuŋaaġivlugu nuna kivaliñaami ittuaq.

² Tikiñiqłaŋaruq nivviamun taavani nunami ittuamun tamarra piŋayuich kanŋut imnaisalaich nalaruat avataani. Imnaich tavraŋŋa imiqtittaġniġaich, matuqaqtuamiñ uyaġaniqługmik.

³ Imnaich iñugiakłutiŋ katiqiraġimmata tavruŋa, imnaiḷiqirit aksraliktittaġigaat uyaġak aasii imiqtiłługich. Aasii uyaġak inaanutqigmivḷugu.

⁴ Jacob-gum apiġigaich imnaiḷiqirit, “Avilaitqatiit, sumiuguvisi?” “Haran-miñ,” kiugaat.

⁵ Apiġigaich, “Iḷisimavisiuŋ Laban, tutaalua Nahor-m?” “Aaŋ, iḷisimagikput,” kiugaat.

⁶ “Nakuuva?” apiġigaich. “Nakuuruq,” kiugaat. “Avvahii, Rachel pania qaġġirriruq pamiqsaaŋiñik.”

⁷ Jacob uqallaktuq, “Qaummaġiksuqsuli siḷa imma qaġġirriñaqsiŋaitchuq pamiqsaanik, summan imña imiqtitchuŋitpigich aasii utqutilugich niġipkaġiaġlugich?”

⁸ Kiugaat, “Tainna piyumiñaitchugut iluqaisa pamiqsaat qaġġisiŋaunnagich suli uyaġak aksraktinŋaunnagu; aasii imiqtitpaalugniaġivut imnaich.”

⁹ Tavra uqauraġniaqtillugusuli iliŋiññun, Rachel-gum tikiutiŋagaich pamiqsaat imnailiqirauvluni.

¹⁰ Jacob-gum tautukkamiuŋ Rachel, aŋaalugmi Laban paniŋa, pamiqsaaŋiḷḷu, nivviamuŋaruq, aksraktiłługu uyaġak aasii imiqtiłługich imnaich.

¹¹ Tavraasii kuniqqaaqługu qianagutiruq quviasukhuni.

¹² Uqallautigaa, “Uvvauvaŋa aapavich nanmiñiq iḷagigaaŋa, iġñiŋa Rebekah-m.” Rachel aqpałłuni kiligiaqsauraŋagaa aapani;

¹³ tavra Laban tusaakami uyuġumiñik Jacob-mik, aqpamik kasuġiaqsauraŋagaa, iqimmalaaqługu suli kunikł̣ugu, suli aggisivlugu. Jacob-gum quliaqtuaġutimmani Laban supayaanik nalautittuanik,

¹⁴ Laban uqallaktuq, “Ii, iḷumun, nanmiñiq iḷagigikpiñ suli auqatigivlutin.” Jacob tavraniinŋaruq tatqiq naalġataqługu.

Jacob-gum Savautigaa Laban Pisigivlugik Rachel-lu Leah-lu

¹⁵ Laban-gum uqautigaa Jacob, “Savautiruksraġiŋitkiŋma uvva akiiḷaaġlutin iḷaginisiññaġluŋa. Qanutun akiññagukpich?”

¹⁶ Laban paniqaŋaruq malġugnik; aŋayukłiq atiqaqtuaq Leah-mik, aasii nukaqłiq Rachel-mik.

¹⁷ Leah-gguuq irigiksuaq, aglaarguuq Rachel qiññaġikhuniḷu aġnaġiksuaq.

¹⁸ Jacob-gum nakuaġiliutiŋavlugu Rachel, uqallaktuq, “Savautiniaġikpiñ tallimat malġugni ukiuni, tuvaaqasiqsitchumiñaġumŋa Rachel-mik.”

¹⁹ Laban-gum kiugaa, “Iviġaumagiłhaaġiga qaitkupku iliŋnun qaiññiŋaniñ allanun; tamaani uvamniittin.”

²⁰ Jacob savaŋaruq tallimat malġugni ukiuni Rachel-mun, suli qavsiqiurani uvluni savaŋmatun inŋaruq ilaanun, nakuaġivlugukii Rachel.

²¹ Tavraasii Jacob-gum uqautigaa Laban, “Piviksraq tikitchuq; tuvaaqasiutilagu paniiñ siñiqatigillasiyumagiga.”

²² Laban tavra niqinaqipkaiŋaruq suli aiyugaaqłiqhuni iñupayaanik.

²³ Aglaan unnuaġmagu tavrani, Rachel pigaluaġnagu, Leah Jacob-muktitkaa, aasii Jacob-gum siñiqatigiŋagaa.

²⁴ (Laban-gum kivgani Zilpah qaiñŋagaa panigmiñun Leah-mun kipalugitquvlugu.)

²⁵ Uvlaaġmagu kisian Jacob iḷitchuġiŋaruq Leah-gutilaaŋanik. Laban ullakługu uqallautigaa, “Summan uvva tainna aŋalatpiŋa? Savaŋaruaŋa Rachel pigisukługu. Summan pisaasuġniaġutiviŋa?”

²⁶ Laban-gum kiugaa, “Piḷġusiqaŋitchut maani nukaqłiq qaitqaaġumiñaġlugu uiñiqulugu aŋayukłiq sivuliglugu.

²⁷ Utaqqiḷḷagiñ savaiññiġum akunġanunaglaan katirrusiqiruat naatchiḷġataqtillugich, aasii qaiññiaġiga Rachel, savautiniaġumŋa tallimat malġuvsaani ukiuni.”

²⁸ Jacob aŋiqtuq, aasii tavra savaiññiġum akunġani pianigman katirrusiqiruat naatchimmata, Laban-gum qaiñŋagaa paniñi Rachel nuliaġitquvlugu.

²⁹ (Laban-gum kivgani aġnaq Bilhah qaiñŋagaa panigmiñun Rachel-mun savaktigitquvlugu.)

³⁰ Jacob-gum siñiqatigiŋagaasuli Rachel, suli nakuaġiłhaaqługu Leah-miñ. Tavraasii savautivsaaŋagaa Laban tallimat malġugni ukiuni.

Miqłiqtuŋi Jacob-gum

³¹ Atanġum qiñiqługu Leah nakuaġiraupiaŋisilaaŋanik Rachel-miñ, qitunġiḷḷasipkaŋagaa, aglaan Rachel qitunġiḷaiñŋaruq.

³² Leah siŋaiyauvluni tavra iġñiqaŋaruq. Uqallaktuq, “Atanġum tautuŋagaa isumaaluutiga, aasii samma uigma nakuaġiliġñiaġaaŋa”; tavraasii atchiŋagaa Reuben-mik.

³³ Siŋaiyauvsaaŋaruq aasii iġñiqavsaaqhuni. Uqallaktuq, “Atanġum iġñiksrivsaalgitkaaŋa, qanukkii tusaavluni piqpagirauŋisilaamnik”; tavraasii atchiŋagaa Simeon-mik.

³⁴ Siŋaiyauvsaalgił̣ł̣uni aasii allamik iġñiqavsaaqhuni. Uqallaktuq, “Tavra maanna uiga uvamnuktulimmaġiksiñiaqtuq, qanukkii uvva piŋasunik iġñiqaqtitkiga”; tavraasii atchiŋagaa Levi-mik.

³⁵ Tavrasuli siŋaiyauvsaaqhuni iġñiqalgitchuq. Uqallaktuq, “Tavraniata nanġaġniaġiga Ataniq”; aasii atchiŋagaa Judah-mik. Tavraasii qitunġiuŋaiŋaruq.