Genesis 28 - Iñupiatun Mumiksat Uqalugiksuat

¹ Isaac-gum ququaŋagaa Jacob, piḷḷuatautiqaquvlugu, aasii uqallautivlugu, “Nuliaġnak Canaan-miuguruamik.

² Mesopotamia-muglutin aglaan, aimmiviŋanun aappaalukpich Bethuel-gum, aasii nuliaġlutin iḷaŋannik niviaqsiat taavani, aŋaalukpich Laban paniŋisa iḷaŋannik.

³ Qanuqtuq Sapiġñaqtuam God-im piḷḷuatautiqaqtitchumagaatin tuvaaqatchiġuvich suli iñugiaktuanik miqłiqtuksriḷḷutin, aapaġuġumautin iñugiaktuanun nunaqpagnun!

⁴ Piḷḷuatautiqaqtitchumagaatin kiŋuvaatillu ilaata piḷḷuatautiqaqtinmatun Abraham, suli piññaktaġiyumagintuq manna nuna, iñuuniaġvigiŋaran suli God-im qaiñŋaraŋa Abraham-mun!”

⁵ Isaac-gum aullaqtinŋagaa Jacob Mesopotamia-mun, Laban-mun, iġñiŋanun Bethuel Aram-miuguruamun suli aniqataanun Rebekah-m, aakauruam Jacob-mullu Esau-mullu.

Esau Allamiksuli Tuvaaqatchivsaaqtuq

⁶ Esau iḷitchuġiniqsuq Isaac-mun qaitchiŋatilaaŋa quviasaaġunmik Jacob aasii aullaqtiłługu Mesopotamia-mun paqitchisaqtuquvlugu nuliaksraŋanik. Iḷitchuġivlunisuli Isaac-gum qaitchigamiuŋ piḷḷuatautiksraŋanik, piraksriŋatilaaŋanik nuliaquŋił̣ł̣ugu Canaan-miuguruamik aġnamik.

⁷ Iḷitchuġiŋaruq Jacob-mun kamagiŋatilaaŋigñik aapaniḷu aakaniḷu aasii aullaqłuni Mesopotamia-mun.

⁸ Esau kaŋiqsiŋaruq aapamiñun Isaac-mun iviġaumagiŋisilaaŋiñik Canaan-miuguruat aġnat.

⁹ Tavraasii ullaŋagaa Ishmael, iġñiŋa Abraham-gum, aasii tuvaaqatchiutivlugu pania Mahalath, aniqatigiraa Nebaioth-gum, tuvaaqatinivsaaġhuniasii.

Jacob-gum Siññaktuŋa Bethel-mi

¹⁰ Jacob aullaŋaruq Beersheba-miñ tuŋaanun Haran.

¹¹ Siqiñiq nipimmiuġlu nalunaitchuamun inimuŋaruq aasii nullaqłuni tavruŋa. Nallaqłuni siquŋaruq, akitchiqhuni uyaġagmik.

¹² Siññaktuqhuni tautuktuq mayuġauttanik nunamiñ qiḷaŋmuaglaan inniqsuanik, isaġulgich tamarra mayuqtuallu atqaqtuallu inniqsut.

¹³ Tavrani Ataniq qikaŋaruq qulaani, aasii uqallakłuni, “Uvaŋa Atanġuruŋa, God-iŋa Abraham Isaac-guvlu,” uqallaktuq. “Aitchuġniaġikpiñ kiŋuvaatillu mattumiŋa nunamik nallavigiraġnik.

¹⁴ Kiŋuvaatin iñugiaktiginiaqtut avyuŋatun nunam. Siaminniaqtut nunamigni sugnamulliqaa, aasii ilikkuaġlugu kiŋuvaagirakkullu quviasaaġunmik piqaqtinniaġitka nunapayaat.

¹⁵ Itqaumalutin, itqatiginiaġikpiñ suli munaġilutin sumupayaaġaluaġuvich, suli utqutiniaġikpiñ mattumuŋa nunamun. Uniññiaŋitkikpiñ taŋŋiġataġlugu unniqsuqłiisigiŋaraġa iliŋnun.”

¹⁶ Jacob iqiiġami uqallaŋaruq, “Ataniq imma maaniinniqsuq! Uumani inimi inniqsuq, naluniqsaġa!”

¹⁷ Iqsiḷiqhuni uqallaktuq, “Aliuġnapaluktuq una ini! Iglugisugnaġniġaa una God-im; upkuaqpausugnaqtuq uvva aŋmaġuuruaq qiḷaŋmun.”

¹⁸ Jacob makiłłuni uvlaatchaurami, akisigirani uyaġak, nappaŋagaa nalunaiḷutchiutivlugu. Tavraasii olive uqsruanik kuvivḷugu ilaaguaqtaġiŋagaa God-mun.

¹⁹ Atchiŋagaa taamna ini Bethel-mik. (Nunaaqqiq atiqaŋagaluaqtuaq Luz-mik.)

²⁰ Jacob tavrani unniqsuqłiiŋaruq Ataniġmun: “Itqatiginiaġumŋa suli munaġiluŋa iglaunimni suli niqiqaqtilluŋa annuġaaqaqtilluŋalu,

²¹ surruiḷḷuŋa utiġumiñaġluŋa aapaa aimmivianun, tavra Ataniq God-iginiaġiga.

²² Una nalunaiñŋutchiutivlugu nappaqtaġa uyaġak iliŋnun nanġaiviuniaqtuq, aasii qulikuuġniaqtuŋa iliŋnun aitchuutigipayaaqtaġniñ uvamnun.”