Genesis 27 - Iñupiatun Mumiksat Uqalugiksuat

Isaac-gum Piḷḷuatautiqaquvlugu Jacob Uqautimmagu

¹ Isaac aŋayuqaaqłuni ayauŋaruq. Aipkaŋagaa aŋayukłiq iġñini Esau aasii uqallautivlugu, “Iġñiiŋ!” “Aaŋ,” ilaata kiugaa.

² Isaac uqallaktuq, “Uvva qiñiġiŋma aŋayuqaaqtuŋa suli tuqquviksraġa qallivalliqsuq.

³ Pisiksillu qaġrutillu piḷugich, avuŋa nunamuglutin, niqsautisaqtuŋŋa.

⁴ Niqłiuġutiyumagiŋma niġiḷḷaturamnik, aasii uvamnuutilugu. Niġianikkuma, uqautisuiqsaaġniaġikpiñ piḷḷuatautiqaqulutin tuquŋaiñŋaġma.”

⁵ Isaac-mun uqautipkaqługu Esau, Rebekah naalaġniŋaruq. Tavraasii Esau aŋuniaġiaġman,

⁶ Rebekah-m uqallautigaa Jacob, “Naalaġniraġa uvva aapavich uqautimmagu Esau,

⁷ ‘Qaġġirriiñ niġrunmik aasii niqłiuġutiluŋa. Niġianikkupku, uqautiniaġikpiñ piḷḷuatautiqaqulutin takkuani Atanġum tuquŋaiñŋaġma.’

⁸ Uvvaasii iġñiiŋ,” Rebekah uqallavsaaqtuq, “Naalaġniŋŋa suli kamagiluŋa.

⁹ Niġrutiqaġvigmi naliġagiaġiñ malġugnik quiñiruagnik nutauruagnik nagrulignik, niqłiuġumauŋa niġiḷḷaturaŋanik aapavich.

¹⁰ Niqiksraŋa aatchumagiñ ilaanun niġiyumagaa, aasii qaitchiñiaġaatin quviasaaġunmik tuquŋaiñŋaġmi.”

¹¹ Aglaan Jacob-gum aakani uqallautigaa, “Iḷisimarutin Esau-m uviñiŋa nusaukkaqtuq, aglaan uvaŋa uviñigiksuŋa.

¹² Aasii aapaa aksigḷuŋa iḷitchuġigumi pisaasuġmiaqtilaamnik ilaanun, uqamaqłuusiaqaqsiññaġniaqtuŋa quviasaaġusiaŋiḷaamik.”

¹³ Aakaŋata kiugaa, “Uqamaqłuusiaksran tutchumauq uvamnun, iġñiiŋ; kamagisiññaŋŋa, aullaġutin qaġġirriŋŋa nagrulignik.”

¹⁴ Tavraasii aikł̣iqhuni ilaanuutiŋagaik, aasii niqłiuqhuni niġiḷḷaturaŋanik aapaŋata.

¹⁵ Tavra Esau-m annuġaaġigñiqtaŋiñik pivḷuni, iglumiutaġuuramiñik, atipkaŋagaich Jacob-mun.

¹⁶ Nagrullak amiŋigñik iḷisiŋaruq talligñun suli nusaitchuamun quŋusiŋanun.

¹⁷ Niqiksriñŋagaa niqłialluatamiñik, punniliamiñiglu.

¹⁸ Tavraasii Jacob aapamiñuŋaruq aasii uqallakłuni, “Aapaaŋ!” “Aaŋ,” kiugaa. “Nalliak ilvich iġñagma?”

¹⁹ Jacob-gum kiugaa, “Uvaŋauvva aŋayukłiq iġñiġiñ Esau. Savaaniktuŋauvva pitquraġnik. Aquvillutin niqipiaqtuġiñ qaġġisiramnik, aasii qaitchiḷuŋa quviasaaġusiaksramnik.”

²⁰ Isaac uqallaktuq, “Qanuqłutin uvva qilamiuraq paqitchianiktiqpich, iġñiiŋ?” Jacob-gum kiugaa, “Atanġum God-igiraqpich ikayuqłuŋa paqitchipkaġaaŋa.”

²¹ Isaac-gum uqallautigaa Jacob, “Qalliḷauraġlutin aksikkumagikpiñ. Esau-gupiaġaluaqpich?”

²² Jacob aapamiñuktaaqtuq, aksiuŋagaa ilaa aasii uqallakhuni, “Iġñan uvva Jacob iġñaŋatun itkaluaqtuq, aglaan marra tallikiñ aksiksuni Esau-m talliŋiktun ittuk.”

²³ Iḷisaġiŋiñŋagaa Jacob, qanukkii talliŋik nusauvlutiŋ Esau-m talliŋiktun. Uqautisaġaluaqługu piḷḷuatautiksraŋanik,

²⁴ apiġivsaalgitkaa, “Esau-gupiaġaluaqpich?” “Aaŋ,” ilaata kiugaa.

²⁵ Isaac uqallaktuq, “Niqiksriñŋa. Niġianikkuma, qaitchiñiaġikpiñ quviasaaġusiaksraġnik.” Jacob-gum qaġġirriŋagaa, wine-miglu imiaksraŋanik.

²⁶ Tavraasii aapaŋata uqallautigaa, “Qallilaaġlutin kuniŋŋa, iġñiiŋ.”

²⁷ Qalliḷaaqłuni kunigiaġmani, Isaac-gum naigai annuġaaŋich—tavraasii uqautiŋagaa piḷḷuatautiqaquvlugu. Uqallakłuni, “Tivraġiksuaq tipaa iġñiġma tipiqaqtuq nunatun Atanġum nunagiksualiaŋatun.

²⁸ God-imtuq qaitchiḷisin uġġuqsraaġunmik qiḷaŋmiñ nautchiivitin naurruġikkumaut! Aitchuġumagaatin inuŋaitchuanik palauvaksranik suli wine-nik!

²⁹ Nunaqpaich kivgaġiyumagitin, suli iñuich purvigilutin. Qaukłiuyumautin nanmiñiq iḷapayaaġnun, suli aakavich kiŋuvaaŋisa purvigiyumagaatin. Piaġiiḷḷiuqtitchiruat ilignun piaġiiḷḷiuġlich, suli iliŋich quviasaaġunmik qaitchiruat iliŋnun quviasaaġusiaqaġumaut.”

Esau Qasiḷiruq Isaac-mun Quviasaaġutiksritquvluni

³⁰ Isaac naatchimman qaisamiñik Jacob-mun piḷḷuatautiksraŋanik, aniḷuqqaaqtuq, aniqataa Esau tikiñŋaruq aŋuniaġiaŋaruaq.

³¹ Niqłiuqłuniptauq niġiḷḷaturaŋanik aapamiñuutigaa. Uqallakłuni, “Aapaaŋ, aquvillutin niġġiiñ uvva niqłiamnik, qaitchiyumagiŋma quviasaaġusiaksramnik.”

³² “Kiñailvich?” Isaac-gum apiġigaa. “Aŋayukłiq iġñiġiñ Esau,” ilaata kiugaa.

³³ Isaac uuliksiqpaŋaruq iluqani timaa, aasii apiqsrivḷuni, “Kiñauvamiimña, tuqutchivḷuni niġrunmik qaġġirriruaq uvamnun? Niġiraġa uvva qaiŋaiñŋaqpich. Qaitchiŋagiga uqallaguiqsaaġutimnik piḷḷuatautiqaquvlugu, tavraasii ilaa piḷḷuatautiqaġniaqtuq.”

³⁴ Esau-m taamna tusaagamiuŋ, qiaqpaŋaruq nipatuvluni killuqsrautiqaqpakłuniḷu, “Qaitchiŋŋaptauq quviasaaġunmik, aapaaŋ!”

³⁵ Isaac-gum kiuŋagaa, “Aniqarvich qaivḷuni pisaasuġmiaġniġaaŋa. Piññaktaaġiŋagaa quviasaaġusiaksrautikkaluan.”

³⁶ Esau uqallaktuq, “Pisaasuġmiaŋagaaŋa malġuiqsuaqłuni. Atiqaġaluaġliḷuimña Jacob-mik. Piññaktaaġiŋammiraŋa aŋayukłiuvluŋa kiŋuvaannaktaaksrautiga, tavraasi ivayalgitkaaŋa quviasaaġusiaksrautimnik. Immaimña iḷakuŋaitpiŋa quviasaaġusiaksramnigli?”

³⁷ Isaac-gum kiuŋagaa, “Qaukłiḷiutianiŋagiga iliŋnun, suli nanmiñiq iḷapayaaŋich kivgaliutivlugich ilaanun. Aitchuŋagiga palauvaksranik suli wine-nik. Sumik piraksraitchuŋa iliŋnun, iġñiiŋ!”

³⁸ Esau-m uqallautivsaalgitkaa aapani: “Atausimik unnii quviasaaġunmik piqaqpich, aapaaŋ? Piḷḷuatautiksramnigli aitchuŋŋa, aapaaŋ!” Qianagutiŋaruq.

³⁹ Tavraasii Isaac-gum uqallautigaa, “Aiḷaqtaaġutiksraqaġniaŋitchutin qiḷaŋmiñ, naurirruġigñiaŋiñmiut nunatin.

⁴⁰ Iñuuniaġniaqtutin savikpaiñ atuġlugu, Aglaan aniqarvich kivgaġiniaġaatin. Paaqłaglutin isumatuuliġuvich, Pillugniaġiñ aŋalatchisaa ilignik.”

⁴¹ Esau-m uumigiliŋagaa Jacob, aapami aitchuŋammauŋ Jacob piḷḷuatautiksraŋanik. Isumaŋaruq, “Aapaga tuqukpan, qivġuviksraq qalliruq; tavraasii tuqunniaġiga Jacob.”

⁴² Aglaan Rebekah tusaakami Esau-m sivunniutaanik, qanniŋagaa Jacob aasii uqallautivlugu, “Naalaġniŋŋa, aniqatin Esau sivunniŋaruq akisautiqaġukłuni iliŋnun aasii tuqullutin.

⁴³ Tavraasii, iġñiiŋ, kamagiŋŋa. Aullautigillaaġiñ aniqatimnun Laban-mun Haran-miittuamun,

⁴⁴ aasii nayuqtuallaglugu, qinnaŋaiqsiapayaallaglugu aniqatin

⁴⁵ suli puiguġataqtillugu qanuq piŋatilaaġnik ilaanun. Aasii aullaqtitchiñiaqtuŋa utqurriksraġnik. Suniaġluŋa iġñiġiġñiaqpik iluqaagnik uvlumi atausimi?”

Isaac-gum Aullaqtitkaa Jacob Laban-mun

⁴⁶ Rebekah-m uqallautigaa Isaac, “Piḷaiġutipiallakkitka Esau-m tuvaaqatiŋich allaniñ nunaniñŋaqtauruat. Jacob suli nuliaġniaġmikpan iḷaŋannik matkua Hit-miut, tuqugumaunnii suŋitchuq.”