Genesis 25 - Iñupiatun Mumiksat Uqalugiksuat

Allat Kiŋuvaaŋich Abraham-gum

¹ Abraham allamik aġnamik tuvaaqatiniŋaruq, atiqaqtuamik Keturah-mik.

² Qitunġiŋagaa Zimran-mik, Jokshan-mik, Medan-mik, Midian-mik, Ishbak-mik, Shuah-miglu.

³ Jokshan aapagigaa Sheba-vlu Dedan-guvlu, kiŋuvaaġigaich Dedan-miut Asshurim-miut, Letushim-miut, Leummim-miullu.

⁴ Midian-guvli iġñiŋich Ephah-lu, Epher-lu, Hanoch-lu, Abida-lu, suli Eldaah. Iluqaġmiŋ taapkua Keturah-m kiŋuvaaġigaich.

⁵ Abraham-gum qaiñŋagaich supayaurat ilaata pigirani Isaac-mun;

⁶ aglaan iñuuŋŋaġmi, aitchuutiqaŋaruq iġñiŋiñun allat nuliaġiraġmi. Tavraasii tamatkua iġñiġirani aullaqtinŋagaich kivaliñaamiittuamun nunamun, aullaqtinŋagaich iġñimiñiñ Isaac-miñ.

Tuqumman Abraham Iḷuviġmarruglu

^7-8 Abraham tuquŋaruq ukiunigataqłuni 175-tun. Iñuuqpaŋaruq kaŋŋił̣ł̣ugu iñuuniagniñi utuqqaliḷġataqłuni. Tuqukami itqatigiyyaŋagaich nanmiñiq iḷani.

⁹ Iġñiŋiksa Isaac-guvlu Ishmael-guvlu iḷuviŋagaak qaiġusugmun Machpelah-mi, qaniŋani Mamre-m nunagiŋaraŋanun Ephron iġñiŋata Zohar-m Hit-miuguruam.

¹⁰ Taamna nuna Abraham-gum tauqsiaġiŋaraŋa Hit-miuguruaniñ; iluqatik Abraham-lu tuvaaqatiŋalu Sarah iḷuviŋagaik tavruŋa.

¹¹ Tuquaniŋamman Abraham, God-im piḷḷuatautiqaqtinŋagaa iġñiŋa Isaac, iñuuniaqtuaq qaniŋani Beer Lahai Roi-m, Negev-miittuam.

Kiŋuvaaŋich Ishmael

¹² Uvva ukua kiŋuvaaŋich Ishmael-gum, iġñiġiraa Abraham-gum. Ishmael-gum aakaŋa Egypt-miu Hagar, kivgaŋa Sarah-m.

¹³ Ishmael ukuniŋa iġñiqaqtuaq, agliusimarut aniñiŋanniñ: Nebaioth, Kedar, Adbeel, Mibsam,

¹⁴ Mishma, Dumah, Massa,

¹⁵ Hadad, Tema, Jetur, Naphish, Kedemah-lu.

¹⁶ Taapkua maŋŋuġiŋagaich qulit malġuktun (12) iñugiaktigiruat maŋŋuuruat, atiŋiññik atchiŋagaich nunaaqqiḷḷaaŋich nullaaġaġviŋiḷḷu.

¹⁷ Ishmael 137-tun ukiunikłuni tuquŋaruq. Tuqukami itqatigiyyaŋagaich nanmiñiq iḷani.

¹⁸ Kiŋuvaaŋich Ishmael-gum iñuuniaŋarut nunami akunġagni Havilah-vlu Shur-vlu, kivaliñaaŋani Egypt-gum Assyria-muksaġiami. Iñuuniaŋarut ilimiktigun nayuutisuŋił̣ł̣utiŋ allanun kiŋuvaaġiraŋiñun Abraham-gum.

Esau-lu Jacob-lu Animmagnik

¹⁹ Una quliaqtuaguruq Abraham-gum iġñiŋagun Isaac-kun.

²⁰ Isaac malġukipiatun (40) ukiuqaŋaruq tuvaaqasiqami Rebekah-mik, panianik Bethuel-gum (Aramean-guruamik Mesopotamia-miumik) aniqataanik Laban-gum.

²¹ Rebekah qitunġiḷaił̣ł̣uni, Isaac-gum aŋaiyyutigiŋagaa Ataniġmun. Atanġum kiuniġaa aŋaiyyutaa, aasii Rebekah siŋaiyauvluni malġigñik.

²² Aniŋaiñŋaġmiŋ, ayyaktuutiŋaruk avanmun illiaŋaniillaġmiŋ. Uqallaktuq, “Summan imña tainnasiq nalautpa uvamnun?” Ataniġmukłuni apiġiŋagaa iḷitchuġisukłuni.

²³ Atanġum uqallautigaa, “Malġuk uvva nunaqpaguġniaqtuak iḷugniittuk; Iġñiñiaqtutin akiḷḷiġiigñiaqtuagnik. Igḷua suaŋŋałhaaġniaqtuq; Aŋayukłium savautiniaġaa nukaqłiuruaq.”

²⁴ Iġñiviksrani tikiñman, iġñiŋaruq malġigñik.

²⁵ Sivulliuruam uviñiŋa kaviŋaruq, iluqaniḷu timaa nusaqtuvluni, aasii tainnamik atchiŋagaat Esau-mik.

²⁶ Tuglia anikami tigummiqpaŋagaa Esau-m kimmiŋa, tavraasii atchiġaat Jacob-mik. Isaac ukiuqtutilaaqaŋaruq piŋasukipiatun (60) animmagnik.

Esau-m Tunigaa Aŋayukłiuvluni Kiŋuvaannaktaaksrani

²⁷ Nukatpiaġruuk agliruk, Esau aŋuniayuqsiruq, siḷami aniiḷḷatuvluni, aglaan Jacob qiñuiñŋaruq aimmiḷḷatuvluniḷu.

²⁸ Isaac-gum piqpagiŋagaa Esau, qanukkii niġiḷḷatuvluni aŋuraŋiññik, aglaan Rebekah-vli piqpagiŋagaa Jacob.

²⁹ Uvlut iḷaŋanni Jacob suuliuqtillugu, Esau aiŋaruq aŋuniaġiaŋaruaq. Kaapaluksimaruaq.

³⁰ Aasii uqallakłuni Jacob-mun, “Iigaqsiruŋauvva; aitchuŋŋa tavraŋŋa kaviqsaamik suuliaġniñ.” (Tainnaqłuni atchiŋagaat Edom-mik, sivuniqaqtuamik “kaviqsaamik.”)

³¹ Jacob-gum kiugaa, “Aitchuġniaġikpiñ aŋayukłiuvlutin kiŋuvaannaktaaksran qaitkupku uvamnun.”

³² Esau uqallaktuq, “Kiami! Uvva tuquaqsiruŋa; suunnauniaġmiruaq una aŋayukłiuvluŋa kiŋuvaannaktaaksraġa?”

³³ Jacob-gum kiugaa, “Unniqsuqłiiqqaaġluŋa qaiññiaġniḷugu aŋayukłiuvlutin kiŋuvaannaktaaksrautin uvamnun.” Esau unniqsuqłiiŋaruq aasii qaił̣ł̣ugu aŋayukłiuvluni kiŋuvaannaktaaksrautikkaluani Jacob-mun.

³⁴ Tavraasii Jacob-gum punniksriñŋagaa suumiglu. Niġiŋaruq imiqłuniḷu aasii makiłłuni aullaŋaruq. Tainna tavra Esau-m suuŋiḷaġiŋagaa aŋayukłiuvluni kiŋuvaannaktaaksrautikkaluani.