Genesis 22 - Iñupiatun Mumiksat Uqalugiksuat

God-im Piraksriġaa Abraham Aitchuutigitquvlugu Isaac

¹ Qakugulimman God-im uuktuusiaqaqtinŋagaa Abraham; ququulagaa, “Abraham!” Abraham-gum kiugaa, “Ii, uvva uvaniittuŋa!”

² God-im uqallautigaa, “Aullauttuuŋ iġñiġiñ nunaŋanun Moriah-m, iġñitualuiñ Isaac, piqpagiqpaktan. Tautuktinniaġiga iġġi aasii tavrani ikipkaġlugu aitchuutiginiaġiñ uvamnun.”

³ Uvlaatchaurami uvlaakumman Abraham qirriuŋaruq ikipkautiksranik, nanmautchiŋagaa kakaktini aasii aullautivlugu Isaac, malġuglu kivgagni. Tavraasii aullaŋarut inimun God-im quliaŋaraanun.

⁴ Piŋayuanni uvlut aaġluqami Abraham-gum tautuŋagaa ini uŋasiŋŋaan.

⁵ Tavraasii uqallautigai kivgani, “Uvaniittuaġutillaksiuŋ kakakti. Nukatpiaġruglu taikuŋaġniaqtuguk nanġaisaqtuġlunuk, qaitqigñiaġmiuguk.”

⁶ Abraham-gum tigumiaqtitkaa Isaac qirugnik ikipkautiksranik, aasiiḷi ilaa tigumiaqłuni savigmik aluallu aumaŋiññik igniqsuutiksranik. Pisuallaġmiŋ atautchikun,

⁷ Isaac uqallaktuq, “Aapaaŋ!” Aapaŋata kiugaa, “Aaŋ, iġñiiŋ?” Isaac-gum apiġigaa, “Marra aluallu qiruiḷḷu, aglaan imma aasii nauŋ imnaiyaaq ikipkaġlugu aitchuutiksraq?”

⁸ Pisuallaġmik, Abraham-gum kiugaa, “God-im imnaisriññiaġaatiguk ikipkaġlugu aitchuutiksraptignik.”

⁹ Tikiññamiŋ inimun God-im quliaŋaraanun, Abraham ikipkaiviḷiuŋaruq qirriqsuqtuaqługu. Qiḷiqsruutivlugu iġñini Isaac inillakkaa ikipkaivigmun, qaaŋannun qiruich.

¹⁰ Tavraasii tigugaa savik tuqutchaqługu aitchuutausaġlugu.

¹¹ Aglaan isaġulgata Atanġum ququulagaa qiḷaŋmiñ, “Abraham, Abraham!” Ilaata kiuŋagaa, “Aaŋ, uvaniittuŋa.”

¹² “Anniġñagu nukatpiaġruk naakkaunnii qanuq piññagu,” uqallaktuq. “Tavra iḷitchuġiruŋa iliŋnun qutchiksuaġitilaaŋa God qanukkii anniġiŋiññiġiñ aitchuutigiyumiñaqługuunnii iġñitualuiñ uvamnun.”

¹³ Abraham aaġluqami tautułłaktuq aŋusallumik imnaimik nagruŋik naanŋamaruak uqpigñun. Ullakługu imñaiq ikipkautiksraqtaaġiŋagaa simmautigivlugu iġñimiñun.

¹⁴ Abraham-gum atchiŋagaa taamna ini “Ataniq Piksraqaqtitchisuuruq.” Aasii paŋmamuaglaan iñuich uqallaguurut, “Atanġum iġġiŋani ilaa piksraqaqtitchisuuruq.”

¹⁵ Isaġuliŋata Atanġum ququavsaalgitkaa Abraham qiḷaŋmiñ,

¹⁶ “Unniqsuqłiiruŋa uvaŋa atipkun—Ataniq uvva uqaqtuq—aŋiruamik quviasaaġunmik aitchuġniaġikpiñ. Qanukkii kamaksrirutillu anniġiŋił̣ł̣ugulu iġñitualuiñ,

¹⁷ Unniqsuqłiiruŋa kiŋuvaaqaqtinniaġikpiñ uvluġiat iñugiaktilaaŋatitun qiḷaŋmi naakka qaviatun taġium siñaaniittuatun. Kiŋuvaaġiniaqtaqpich akiiḷisimaaġniaġaich akiḷḷiitiŋ.

¹⁸ Kiŋuvaatin nunaqpaguŋaruat ikayuusiaqpaqaġniaqtut sutigulliqaa qanukkii kamagiŋagigma.”

¹⁹ Abraham utiŋaruq kivgamiñun, aasii atautchikun aullaŋarut Beersheba-mun, Abraham iñuuniaġvigiliutiraŋanun.

Kiŋuvaaŋich Nahor-m

²⁰ Qakugulimman Abraham iḷitchuġiŋaruq Milcah tallimat piŋasunik qitunġaqaŋatilaaŋanik aniqanmi Nahor-m qitunġiaŋiñik:

²¹ Uz aŋayukłiq, nukaalua Buz, aasiisuli Kemuel aapaŋa Aram-gum,

²² Chesed-lu, Hazo-lu, Pildash-lu, Jidlaph-lu, Bethuel-miglu,

²³ Rebekah-m aapaŋanik. Milcah iġñiqaŋaruq tallimat piŋasunik Nahor-miñ, Abraham-gum aniqataaniñ.

²⁴ Reumah, Nahor-m nukaġaŋa, iġñiqaŋaruq Tebah-mik, Gaham-mik, Tahash-mik, Maacah-miglu.