Genesis 21 - Iñupiatun Mumiksat Uqalugiksuat

Isaac Animman

¹ Atanġum taŋŋiqsinŋagaa unniqsuqłiisini Sarah-mun quviasuusiaqaqtiłługulu,

² siŋaiyauŋaruq aasii iġñiqaqłuni Abraham-miñ utuqqaliŋagaluaqtiłługu. God-im anniviksriutaagun aŋutaiyaaq aniŋaruq.

³ Abraham-gum atchiŋagaa Isaac-mik,

⁴ aasii Isaac tallimat piŋasuni uvlianigman, Abraham-gum nalunaiñŋutchiŋagaa, God-im piraksriutaatun.

⁵ Abraham tallimakipiatun (100) ukiuqtutigiŋaruq Isaac animman.

⁶ Sarah uqallaktuq, “God-im quviasuunmi iglallasipkaġaaŋa. Kiapayaaq tusaaruam iglaqatiginiaġaaŋa.”

⁷ Uqallakłunisuli, “Kiña taimma uqallaŋagayaqpa Abraham-mun, Sarah miluktitchiñiaġnivḷugu miqłiqtuuranik? Naaggauvva iġñiqaqtitkiga utuqqaliŋagaluaŋŋaan.”

⁸ Miqłiqtuq agliŋaruq, aasii miluŋaiġataġman, Abraham niqinaqipkaiqpaŋaruq niġiḷḷasimman.

Hagar-lu Ishmael-lu Aullaqtitauruk

⁹ Uvlut iḷaŋanni Ishmael, Hagar-m Egypt-mium iġñiaŋa Abraham-miñ, piuraaqatiqaŋaruq Sarah-m iġñiŋanik Isaac-mik.

¹⁰ Sarah-m tautukługik uqallautigaa Abraham, “Anirruŋ una kivgauruaq iġñiŋalu. Iġñiŋa uuma aġnam piññaktaaqaqtuksrauŋitchuq sumik unnii iḷaŋiññik suġaliqpich, iġñiġma Isaac-gum kiŋuvaannaktaaksrautiŋiññiñ.”

¹¹ Isumaalutchautigipiaġataŋagaa taamna Abraham-gum, qanukkii Ishmael-tauq ilaata iġñiġivlugu.

¹² Aglaan God-im uqallautigaa Abraham, “Isumaaluginagu aŋutaiyaaq kivgaġirallu Hagar. Qanuq pitqukpatin Sarah-m kamagiyumagiñ, qanukkii Isaac-kun ilvich kiŋuvaaqaġniaqtutin unniqsuqłiisigiŋaramnik.

¹³ Kivgauruam, Hagar-m, kiŋuvaaŋich nunaqpaguġniagmiut qanukkii ilvich iġñiġigiñ iġñiŋa.”

¹⁴ Uvlaatchaurami uvlaakumman Abraham-gum aitchuŋagaa Hagar niqinik, qisigmiglu puumik siḷvinŋaruamik imiġmik. Nanmirriutipkaŋagaik taapkuak aasii aullaqtiłługu iġñiŋalu. Aullaqamik kukiḷuŋaruk nunagluktuami Beersheba-mi.

¹⁵ Imġutiktik nuŋumman, uniñŋagaa miqłiqtuq ataanun uqpiich

¹⁶ aasii aquptaaqłuni tallimakipiatun (100) isaaġniqtun uŋasiksigivluni. Uqallaktuq inmiñun, “Qiñilguniaŋitkiga miqłiqtuġa tuqukpan.” Aquppiḷḷaġmi tavrani, qianagutiŋaruq.

¹⁷ God-im tusaagaa aŋutaiyaaq qiamman, tavraasii qiḷaŋmiñ isaġuliŋa God-im uqallaktuq Hagar-mun, “Sumik imña isumaaluutiqaqpich, Hagar? Iqsisiqaġnak. God-im tusaaŋagaa aŋutaiyaaq qiaruaq.

¹⁸ Makillutin, tigusaqtuaġuŋ, aasii araglugu. Kamanaqtuamik nunaqpaliuġniaqtuŋa kiŋuvaaŋigun.”

¹⁹ God-im aasii agmaŋagaik iriŋik, tavraasii tautuŋaruq nivviamik. Immiġiaŋagaa qisik imiqaġviñi aasii imiksrił̣ł̣ugu aŋutaiyaaq.

²⁰ God-im itqatigiŋagaa nukatpiaġruk agliñmuktuqtiłługu; iñuuniaŋaruq nunagluktuami aasii pisiksuqsivḷuni.

²¹ Iñuuniaŋaruq nunagluktuami Paran-mi; aakaŋata Egypt-miumik tuvaaqatiksraŋagaa.

Sivunniutaak Abraham-guvlu Abimelech-guvlu

²² Tavrani Abimelech-gum aullaqatigivlugu Phicol, qaukłiġiraŋat aŋuyaktigiraġmi, uqallaktuq Abraham-mun, “God-im itqatigigaatin suliqipayaaġavich.

²³ Tainnamik unniqsuqłiigguiñ takkuani God-im pisaasuġmiaġutikun aŋalanniaŋiññiḷuŋa, miqłiqtutkalu, naakkaunnii kiŋuvaaġiratka. Pitqiksiġautaitchuakun aŋalanŋagikpiñ, tavraasii unniqsuqłiiŋŋa tainnaptauq aŋalanniaġniḷuŋa mannalu nunakput maaniillaqpich nunamni.”

²⁴ Abraham uqallaktuq, “Unniqsuqłiiruŋa.”

²⁵ Abraham-gum uqamayuutigaa Abimelech nivviakun kivgaŋisa Abimelech-gum aanniktaaġiŋaraŋatigun.

²⁶ Abimelech uqallaktuq, “Naluniqsuŋa kimun taamna piŋatilaaŋanik. Uqallautiŋaiññiġiŋma, uvva tusaavaalluktuŋa taaptumuuna.”

²⁷ Tavraasii Abraham-gum aitchuŋagaa imnaiñiglu pamiqsaaniglu Abimelech, iluqatik aasii unniqsuqłiivḷutik avanmun.

²⁸ Abraham ilaaguaqtitchiŋaruq tallimat malġugnik imnaiyaanik pamiqsaamiñiñ,

²⁹ aasii Abimelech-gum apiġigaa, “Summan uvva tainna pivich?”

³⁰ Abraham-gum kiugaa, “Akuqtukkich ukua tallimat malġuuruat imnaiyaat. Tainna piguvich, nalupqinaiġñiaġiñ uvamnun nivaŋatilaaŋa una nivviaq.”

³¹ Tavraasii ini atchiŋagaat Beersheba-mik; qanukkii tavrani iluqatik unniqsuqłiigutiŋaruk.

³² Unniqsuqłiigutianikkamik Beersheba-mi, Abimelech-lu Phicol-lu utiŋaruk Philistia-mun.

³³ Tavraasii Abraham nautchirriiŋaruq tamarisk-mik napaaqtumik Beersheba-mi nanġaqługulu Ataniq, Isuksraiḷaamun God-auruaq.

³⁴ Abraham iñuuniaŋaruq nunaŋanni Philistia-ġmiut sivisuruami.