Genesis 20 - Iñupiatun Mumiksat Uqalugiksuat

Abraham-lu Abimelech-lu

¹ Abraham nuunŋaruq Mamre-miñ kiluliñaaŋanun Canaan-gum, Negev-mik atiqaqtuamun aasii iñuuniaqłuni akunġagni Kadesh-guvlu Shur-vlu. Aquvatigun, iñuuniallaġmi Gerar-mi,

² Abraham uqallaŋaruq Sarah aniqatiginivḷugu. Tavraasii Umialiguruam Abimelech-gum Gerar-ġmiuguruam Sarah ilimiñuutipkaŋagaa.

³ Unnuat iḷaŋanni God-im niptaġvigigaa Abimelech siññaktukun aasii uqallakłuni, “Tuquniaqtutin, qanuq uvva taamna aġnaq piksraqtaaġiŋagiñ katitkaniŋaruaq.”

⁴ Aglaan Abimelech-gum aksiŋaiñŋagaa, aasii uqallaktuq, “Ataniiq, patchisaitchuŋa! Tavra suksraunġiġñiaqpiŋa iñugiratkalu?

⁵ Abraham uvva ilaa uqallaŋaruq aniqatiginivḷugu, ilaasuli, Sarah, tainnaŋammiuq. Isumamni killukuaŋaitchuŋa.”

⁶ God-im kiugaa siññaktuŋani, “Ii, iḷisimaruŋa taamna piŋagiñ pigiiḷḷiqunmik isumaqaġaluaġnak; tavraasii piḷuusiqipkaŋitkikpiñ paaqłagluŋa aksiktinŋaitkigalu iliŋnun.

⁷ Aglaan uvva, qaitqiguŋ aġnaq uiŋanun. Uqaqtauruq God-mun, suli aŋaiyyutiniaġaatin, tuquŋitchumautin. Aglaan utiqtinŋisuaġupku, tavra kilikkikpiñ tuquniaqtutin, ilviḷḷu suli iluqaġmiŋ iñugiratin.”

⁸ Uvlaatchaurami uvlaakumman Abimelech-gum ququaġaich atanauraġirani aasii uqallautivlugich nalautittuamik, tavraasii iqsitchapiaġataŋarut.

⁹ Abimelech-gum ququaŋagaa Abraham aasii apiġivlugu, “Qanuq imña aŋalanniqpisigut? Sumik imña pimaqłuŋavigiñ qaġġirriyumiñaqsivḷutin suksraunġiunmik uvamnullu atanniqsuivigiramnullu? Kiñaunnii tainnatchimik aŋalatchiruksrauŋipiaġataqtuq ilvich aŋalatchisiktun uvamnun.

¹⁰ Summan uvva tainna piruatin?”

¹¹ Abraham-gum kiugaa, “Isumavluŋa kiñaunnii maani qiksikkutiqaŋiññasugivlugu God-mun, aasiisuli tuqunniaġasugiluŋa iliŋiññun tuvaaqatiga piññaktaaġisuglugu.

¹² Uvvakii ilaa nanmiñiq aniqatigigiga. Panigigaa aapagma, aglaan allamik aakaqaqłuni, aasii tuvaaqatchiutiŋagiga.

¹³ Tavraasi God-im tilimmaŋa aapama igluaniñ aullaquvluŋa allanun nunanun, uqallautigiga tuvaaqatiga ‘Iḷumun nakuaġigumŋa uqallausiġiyumagiŋma aniqatiginiḷuŋa.’”

¹⁴ Tavraasii Abimelech-gum qaitqiŋagaa Sarah Abraham-mun, aitchuqługulu imnaiñik, pamiqsaanik, kivgaksraŋiññiglu.

¹⁵ Uqallautigaa Abraham, “Marra iluqaan nunaga; sumipayaaq iñuuniaġukkuvich iñuuniaġumiñaqtutin.”

¹⁶ Uqallaktuq aasii Sarah-mun, “Aitchuġniaġiga aapiyan 1,000-tun qatiqtuanik manigñik nalupqinaiyautigisaġlugu iñugnun ilvich patchisaisilaaġnik; iluqaġmiŋ iḷisimaniaqtut killukkuaŋaisilaaġnik.”

^17-18 Tavraasii Abraham-gum aŋaiyyutiŋagaa Abimelech, aasii God-im iłuaqsipkaqługu, iłuaqsipkaqługulu nuliaŋa kivgaŋiḷḷu aġnat, miqłiqsiullasivḷugich. Uvvakii Atanġum miqłiqtuqallaiyaŋavlugich aġnat Abimelech-gum igluqpaŋaniittuat, pisigivlugu Abraham-gum nuliaŋa Sarah.