Genesis 2 - Iñupiatun Mumiksat Uqalugiksuat

¹ Tavra qiḷaiḷḷu nunalu naanŋarut supayaurallu qiḷaŋmiittuat nunamiittuallu.

² Tallimat malġuŋanni uvlut God-im naanŋagaa savaani aasii savaaġiŋaiqł̣ugu.

³ God-im nuimarualiuŋagaa tallimat malġuŋat uvlut aasiisuli salumarualiuqługu, qanukkii taaptumani uvlumi naanŋagaa ilaata savaaġirani aasii savaaġiŋaiqł̣ugu.

⁴ Tavraasii tainna savaaġiŋagaik God-im qiḷaglu nunalu. Atanġum God-auruam savaaġimmagik qiḷaglu nunalu,

Nautchiaqaġviŋa Eden

⁵ nauruaqaŋaiñŋaruq nunami kanġaqsruutauruat nautchiaksrat nausaŋaiñmiut, qanukkii ilaa sialuktitchiŋaił̣ł̣unisuli, iñuił̣ł̣uniḷu nauyumiññaksaqtiksraŋanik nunam;

⁶ aglaan imaq maqisuuruq nunam iḷuaniñ aasii imaqtiqługu nuna.

⁷ Ataniq God nunaviñiġmik tigusiŋaruq nunamiñ aasii iñuliuġutigivlugu; aniqsaaġvigiŋagaa iñuunaqtuamik aniġniġmik suġluŋanun tavraasii iñuk iñuġuŋaruq.

⁸ Tavra Ataniq God nautchirriŋaruq nautchiaqaġvigmik tatqavani, Eden-mi, aasii iḷivḷugu tavruŋa iñuliani.

⁹ Qanusiḷimaanik napaaqtunik naupkaiŋaruq tavrani qiñiyunaqtuaniglu naurisuuruaniglu niġiyumiñaqtaptignik. Qitqani nautchiaqaġvium napaaqtuq inŋaruq iñuggunmik qaitchiḷḷaruaq suli iḷisimmatiksritchiḷḷaruaq suna nakuutilaaŋanik naakka nakuuŋisilaaŋanik.

¹⁰ Kuuk maqiugaġmiñiqsuq Eden-mi aasii imaqtaaġutauvluni nautchiaqaġvigmun; Eden-miñ kuuk maqiruaq sisamanik kuuliuŋamaruq.

¹¹ Sivulliq kuuk Pishon-guruq; maqiruaq kiavallakługu nunaŋa Havilah-m, kaviqsuanik maniqaqtuaq.

¹² (Tavraniittuaq kaviqsuaq manik nakuuniqsrauŋaruq suli tivraġiksuat bdellium onyx-giḷḷu uyaġagiksuat tamaaniinmiut.)

¹³ Tuglia aasii kuugum Gihon-guruq; maqiruaq kiavallakługu nuna atiqaqtuaq Cush-mik.

¹⁴ Piŋayuat aasii kuugich Tigris-guruq, maqiruaġli kivaliñaaŋani Assyria-m, aasii sisamaŋat kuugich Euphrates-guruq.

¹⁵ Tavra aasii Atanġum God-auruam inillaŋagaa iñuk nautchiaqaġvigmun Eden-mi nauyumiññaksaquvlugu munaġitquvlugulu.

¹⁶ Ilaata uqallautiŋagaa, “Niġiyumiñaqtutin siiġñaŋiñik nallipayaaŋisa napaaqtut nautchiaqaġvigmiittuat,

¹⁷ aglaan niġiruksrauŋitchutin napaaqtumiñ iḷisimmatiksritchiḷḷaruamiñ suna nakuutilaaŋanik naakka nakuuŋisilaaŋanik. Niġiñiaŋitchutin siiġñaŋanik taaptuma napaaqtum; niġituaġuvich, tuquniaqtutin taaptumani uvlumi.”

¹⁸ Tavraasii Ataniq God uqallaktuq, “Iłuaŋitchuq uvva una aŋun kisimi iñuuniaqpan. Iñiqsiñiaqtuŋa iñuuniaqatilluataksraŋanik.”

¹⁹ Tavra tigusiŋaruq nunaviñiġmik nunamiñ aasii iluqaisa niġrutit iluqaisalu tiŋmiat savaaġivlugich. Aasii aanŋagaich aŋunmun sunik atchiġñiaġmagaisa; tavra tainna iluqatik atchiqsauŋarut.

²⁰ Tavra tainna aŋutim atchiḷḷaaŋagaich niġrutipayaurat, tiŋmiat, pamiqsaat, pamiqsaaguŋitchuallu. Aglaan nalliat unnii nalaunŋaruaguŋitchuq iñuuñiaqatauyumiñaġluni ilaanun.

²¹ Tavra Atanġum God-auruam aŋun naluksrisipiaqługu siqupkaŋagaa, aasii siñiktillugu, piiqsiŋaruq atausimik tulimaaŋanik aŋutim aasii mamitinmivḷugu timaa.

²² Aġnaliuŋaruq tulimaamiñ aasii aŋunmuutivlugu.

²³ Aŋun aasii uqallaktuq, “Kiisaimmaa tavra, uvva una uvaptun ittuaq Sauniq piiqsauruaq saunimniñ, suli timaa timigiramniñ. ‘Aġnaq’ atiġiniaġaa qanuq ilaa savaaguŋaruq aŋunmiñ.”

²⁴ Tainnamik tavra aŋutim uniññiaġaik aapaniḷu aakaniḷu aasii nayuqsiutilugu tuvaaqatini, aasii atausitun iḷiŋaruk.

²⁵ Aŋullu aġnaġlu annuġaaqaŋaitchuk iluqatik, aglaan kanŋusuutiqaŋaitchuk.