Genesis 19 - Iñupiatun Mumiksat Uqalugiksuat

Pigiiḷḷiqiruaguniŋa Sodom

¹ Malġuk isaġullak qaimmagnik Sodom-mun anaqammiuġlu, Lot aquppiŋaruq nunaaqqim upkuaqpaŋani. Tautuksaġluqqaaqamigik, makiłłuni kasuġiaqsauraŋagaik. Punŋaruq sivuġaagnun

² aasii uqallakłuni, “Aŋutiik, isiġiallagitchik iglumnun. Isigasik iqaġiyumagisik siñiktaġlusik aasii. Uvlaami iqiiġñaġiaġlusik aullaġniaġmiusik.” Aglaan iliŋiksa kiuŋagaak, “Naumi, unnuapak unnuiñiaqtuguk nunaaqqiuruat katirvianni.”

³ Katchuŋaiqł̣uni iglumiñullaqupiaŋagaik, kiisaimma malikpatku igluanun. Lot-gum piraksriġñiġaich kivgaġirani imaksraiḷaamik punniliuquvlugich niqłiulluatautitquvlugiglu tuyuġmiaġiragni. Itqanaiġmarruŋ, niġiŋaruk.

⁴ Tuyuġmiaguruak tuttaaŋaiñŋaigñik, aŋutit Sodom-miut avanniġaat igluat. Iluqaġmigguuq aŋutiŋich nunaaqqim, nutaqqallu utuqqanaaġuŋaruallu, tavruŋaŋarut.

⁵ Ququulavlugu Lot apiġigaat, “Nauŋ ipkuak aŋutik siñiktaġiaktuak iliŋnun unnuapak? Annisuutikkik mauŋa, atuqsaġivut!”

⁶ Lot animaruq uqautiyaqtuaqługich aasii upkuaqługu tunumiñiittuaq upkuaq.

⁷ Uqallautigaich, “Avilaitqatiit, apiġipiallakkivsi, tainnasimik piḷuktualiqinasi!

⁸ Uvvahii, malġugnik paniqaqtuŋa aŋusiuŋaitchuagnik. Annisuutilagik, qanuq aŋalatchukkuvsigik aŋalatchaġisik. Aglaan aksianasigik ukuak aŋutik tuyuġmiaguruak iglumni, qaunaġiruksraġigikka.”

⁹ Aglaan uqallaktut, “Piiqsaaqsiññaġiñ, ilvich allaŋŋaqtauruatiin! Kiunasugivich uvva sutquuġumiñaġluta? Piiqsaaġiñ, piuŋił̣haaqtuamik aŋalatquŋitkuvich iliŋigniñ.” Iliŋisa tinuvlugu Lot qalliḷaaŋagaat upkuaq upkuaġurraġukługu.

¹⁰ Aglaan aŋutik isaaqłutik, nuqinŋagaak Lot isiqtiłługu, aasii upkuaq umikługu.

¹¹ Tavraasii iliŋiksa ayaupkaŋagaich iluqaisa aŋutit siḷataaniittuat upkuam, paqillaiqsiłługu upkuaq.

Lot Aullaqtuq Sodom-miñ

¹² Malġuk aŋutik uqallautigaak Lot, “Allanik iḷaqaġuvich maani—iġñiqaġuvich, paniqaġuvich, niŋauqaġuvich, naakka allanik iḷaqaġuvich iñuuniaqtuanik nunaaqqimi—maaŋŋa aullaqtitkich,

¹³ qanukkii uvva suksraunġiġñiaġikpuk una ini. Atanġum tusaagaich ququaqtuat inmiñun ikayuqtisiuqłutiŋ pasiuqługich iñuich naġġunaqpaktuanik piḷġusiŋiññik aasii tiliŋagaatiguk suksraunġiġiaquvlugu Sodom.”

¹⁴ Tavra Lot ullautiŋaruq paniutigmi uiksrautiŋigñun, aasii uqallautivlugik, “Qilamik maaŋŋa aullaġitchi; Atanġum uvva suksraunġiaqsigaa manna ini.” Aglaan mitaaqsiññaġasugiŋagaat.

¹⁵ Uvlaaġiaġmagu isaġullak qilamiqsruliġaluaġaak Lot. “Qilamik!” uqaqłutiŋ. “Tuvaaqatillu pannikiḷḷu aullaġitchi, tuqutauŋitchumausi nunaaqqiq suksraunġiqsaukpan.”

¹⁶ Lot ittuummimman, isaġullak tasirriutivlugich tuvaaqataalu paniŋiglu qimautiŋagaich tavraŋŋa inimiñ anayanaitchuamun, qanuq Ataniq naglikkutiqaŋaruq ilaiññun.

¹⁷ Anipqauragamik inimiñ, igḷua isaġulgum uqallaktuq, “Aqpamik iñuggutisi annautisauraqsigik! Kiŋiaġnasi naaggaunnii nutqaġnasi natiġnami. Aqpallusi qimiqqanuksauraġitchi, tuqutauŋitchumausi.”

¹⁸ Aglaan Lot-gum kiugaik, “Naumi, tainna pipkaġnasigut.

¹⁹ Ilivsik uvva iviġaumanaqtuamik savautigivsiŋa annautivluŋalu. Aglaan iġġich uŋasikpaiḷḷutiŋ tikiññiaŋitchugnaġitka; aŋuniaġaaŋa qimakkaluaġuma suksraunġiutim, aasii tuqulluŋa.

²⁰ Tautukpiuŋ igña nunaaqqiuraq? Ikka qanittuq. Taikuŋaġlaŋa—tautullagiñ ikka mikiruq ini—anayanniuġniaŋitchuŋa.”

²¹ Ilaata kiugaa, “Kiami, iviġaumagigiga. Suksraunġiġñiaŋitkiga taigña nunaaqqiq.

²² Qilamik! Aqpallutin! Sumik supkaiñiaŋitchuŋa taikuŋa tikiñŋaunnak.” (Lot uqallagman mikinivḷugu nunaaqqiq atchiŋagaat Zoar-mik.)

Suksraunġiqsauniŋak Sodom-lu Gomorrah-vlu

²³ Siqiñiq nuiñiuraagaqsimmiuġlu Lot tikitchuq Zoar-mun.

²⁴ Tavraŋŋatchiaq Ataniq sialuktitchiruq ikualaruanik aumanik tipigluktuanik nunaaqqigñun Sodom-mullu Gomorrah-mullu

²⁵ aasii suksraunġiqł̣ugik iluqaallu natiġnaaq, piqatigivlugich iluqaisa iñuich tavraniittuat sunapayaaġlu nauruaq nunami.

²⁶ Aglaan Lot-gum aġnaat kiŋiaŋaruq aasii napaqsraguŋaruq taġiuġuqłuni.

²⁷ Uvlaatchaurami uvlaakumman Abraham qilamiqsruqłuni ini ullaŋagaa sivuġaani Atanġum makitavigiŋarani.

²⁸ Qiñiŋagaik taunuŋa Sodom-lu Gomorrah-lu iluqaallu natiġnaq aasii tautuktuq putchualaruamik nunamiñ, puyuuqtuatun igniġvikpagmiñ.

²⁹ Aglaan God-im suksraunġiqamigik nunaaqqiuruak natiġnami Lot-gum iñuuniaġviani, itqaumagiŋagaa Abraham isumamiñi aasii Lot annaktiłługu anayanaitchuamun.

Maŋŋuŋich Moab-miullu Ammon-miullu

³⁰ Lot sivuuqqatiqaqłuni Zoar-miinniaġumi, nuurrutiŋagaik pannigñi pauŋa qimiqqanun aasii iñuuniaqłutiŋ qaiġusugmi.

³¹ Aŋayukłium paniata uqallautigaa nukaaluni, “Aapakpuk uvva utuqqaliruq, aasii imma aŋutaitchuq tamaani tuvaaqatiksraptignik qitunġiyumiñaqsiḷunuk allani nunani piḷġusiatun.

³² Qaiñ, imiŋasipkaġlakpuk aapakpuk, siñiqatigilugu aasii miqłiqtuqaġumauguk ilaaniñ auqatigiigñiq igliġumauq.”

³³ Tavrani unnuaġmagu aitchuŋagaak wine-mik imiksraŋanik, aasii aŋayukłium nalaqatigiŋagaa. Aglaan imiŋasiŋavaił̣ł̣uni nalullaŋaruq.

³⁴ Uvlaakumman aŋayukłium uqallautigaa nukaaluni, “Siñiqatigiraġa unnuaq; ki imiŋasipkavsaaġlakpuk unnuapak, aasii siñiqatigiyumagiḷḷi. Iluqanuk miqłiqtuqallaayumauguk aapaptigniñ auqatigiigñiq igliġumauq.”

³⁵ Tavraasii unnuaġmagu imiŋasipkaŋagaak, aasii nukaqłium paniata nalaqatigivlugu. Tavrasuli imiŋasivaił̣ł̣uni naluŋaruq.

³⁶ Tainnaqłutik iluqatiŋ Lot-gum paniŋik siŋaiyauŋaruk aapamigniñ.

³⁷ Aŋayukłiq iġñiqaŋaruq, atchiqsamiñik Moab-mik. Ilaa aasii maŋŋuuruq paŋmami Moab-miunun.

³⁸ Nukaqłiq pania iġñiqaġmiñiqsuq, atchiqsamiñik Benammi-mik. Maŋŋuuruaq paŋmami Ammon-gum kiŋuvaaŋiññun.