Genesis 18 - Iñupiatun Mumiksat Uqalugiksuat

Abraham Unniqsuqłiusiaqaqtuq Iġñiksraŋanik

¹ Ataniq niptaŋaruq Abraham-mun qiksigñaqtuani napaaqtuqpaŋiññi Mamre-m. Abraham aquppiuraaqtillugu paaŋani tupiġmi uunaqsiviuraġmiuġlu uvluq,

² aaġluqami tupaŋaruq tautukkamigi piŋasut aŋutit makitaruat tavrani. Tautuksaqługiḷḷu, aqpamik kasuġiaŋagaich tupiġmiñ. Pułłuni kiiñani aksiutivlugu nunamun,

³ uqallaktuq, “Aŋutiit, iviġaumagiguvsiñŋa qaaŋiqsaaġnasiñŋa isiġitchi.

⁴ Qaġġirriḷaŋa imiġmik isigavsiññun iqaġiviksravsiññik; uumani unaŋuiqsiallagitchi ataani napaaqtum.

⁵ Qaġġirriñiaqtuŋa niqiłauranik; sayyaktaaġumagaasi iglauniksravsiññi. Quyaligivsiŋa uvva ullakkavsiñŋa aimmivimñun, ki aasii savautilavsi.” Iliŋisa kiugaat, “Quyanaaġivsigiñ; taamna akuqtuġniaġikput.”

⁶ Abraham qilamiqsruqłuni tupiġmignuktuq aasii uqallautivlugu Sarah, “Qilamiksruaġlutin, palauvalluatautignik punniliuqtualugiñ.”

⁷ Abraham aqpałłuni niġrutimignuŋaruq naliġagiaqłuni nuġġaġmik aqitchuamik, aasii kivgamun qaił̣ł̣ugu, qilamiqsruqłuniḷi kukiuŋagaa.

⁸ Tavraasii Abraham-gum paramik, immugmik, nuġġauvlu niqiŋanik, niqłiqsuŋagaich taapkua iñuich. Nayuŋagaich niġiruat napaaqtum ataani.

⁹ Tavraasii iliŋisa apiġiŋagaat, “Nauŋ imña tuvaaqatin Sarah?” “Qamma tupiġmiittuq,” kiugaich.

¹⁰ Iḷaŋat uqallaktuq, “Ukiutqigu tainnaiḷikpan qaitqiġñiaqtuŋa, aasii tuvaaqatin Sarah iġñiqaŋaniaqtuq.” Sarah tunuanniiłłuni taapkua inuich, tupqum paaŋani, naalaġniŋaruq.

¹¹ Abraham-lu Sarah-lu utuqqaliŋaruk, aasii Sarah miqłiqsiyumiñaiŋaruq.

¹² Tavraasii Sarah iglaġutchaŋaruq ilimiñun uqallakłuni, “Aaquaŋallaġma piḷguiḷiŋavluŋalu, tavrauvaŋa nalaqatiqannaraaġumiñaqpiksuli? Uvva suli, uiga aŋayuqaaŋammiuq.”

¹³ Tavraasii Atanġum apiġigaa Abraham, “Summan Sarah iglaqpa aasii uqallakhuni, ‘Miqłiqtuqaġumiñaqpik tavra aaquaŋallaġma?’

¹⁴ Sumik imña piqaqpa siġġaġnaqpaitchuamik Ataniġmun? Uqallausiptun, ukiutqigu tainaiḷikpan utiġniaqtuŋa, aasii Sarah iġñiqaŋaniaqtuq.”

¹⁵ Sarah iqsivḷuni, iglaŋiññiruq. “Iglaŋitchuŋa,” uqallaktuq. “Aaŋ, iglaqtuatin,” kiugaa Atanġum.

Abraham Qiññuaqtuqtuq Sodom Pisigivlugu

¹⁶ Tavra aŋutit makinŋarut niġianikkamiŋ aullaqsaqłutiŋ aasii qiviaqłutiŋ Sodom tuŋaanun, Abraham-gum pisuaqasiŋagaich aullaqtuat.

¹⁷ Aasii Ataniq uqallaktuq inmiñun, “Iriqsimalagu Abraham-miñ suyumaalliqsilaaġa?

¹⁸ Ilaata kiŋuvaaġiniaqtaŋich kamanaqsiḷutiŋ nunaqpaguġniaqtut, aasii ilaaguaġlugu piḷḷuatautiqaqtinniaġitka iluqaisa nunapayaat.

¹⁹ Naliġaaġiŋagiga piraksriiḷḷatquvlugu iġñiġutiiŋiññik kiŋuvaaġiniaqtaŋiññiglu kamakkutiqaquvlugich uvamnun iluaqtualiqirautquvlugiḷḷu nalaunŋaruakullu iñuutquvlugich. Taapkua maliġuaqpatigik nalautinniaġitka iluqaiññik unniqsuqłiisigiŋaratka Abraham-mun.”

²⁰ Tavraasii Ataniq uqallaktuq Abraham-mun, “Pigiipiaġataqtuanik pasiraurut Sodom-miut Gomorrah-miullu, suli piḷuusiqiaŋat piaġiipiaġataqłuni pigiitchuq.

²¹ Ullautiruksrauruŋa takanuŋa iḷitchuġisaġluŋa iḷumun inmagaisa tusaaratka pasirauniŋatigun.”

²² Tavraasii malġuk iññuk aullaqtuk tuŋaanun Sodom, aglaan Ataniġlu Abraham-lu uniktinŋaruk.

²³ Abraham-gum ullakługu Ataniq apiġigaa, “Tavra ilvich suksraapiaġniaqpigich patchisaiḷaat taputilugich pasirauruanun?

²⁴ Malġukipiaq qulit (50) patchisaiḷaat iñuich inniqpata iniqpagmi, tavra suksraunġiġñiaqpiuŋ iluqaan iniqpak? Suksraunġiŋiḷḷakkumiñaqpiuŋ annautisaġlugich malġukipiaq qulit (50) patchisaitchuat?

²⁵ Nalupqinaitchuq tuqutchiyumiñaitchutin patchisaiḷaanik piqatigilugich pasirauruanun. Tainna piyumiñaitchutin. Tainna pigaluaġuvich, patchisaiḷaat tatavsaqtauniaqtut iḷaulutiŋ pasirauruanun. Taamna nalautitchumiñaitchuq. Isivġiqtiŋa nunapayaam savaktuksrauruq nalaunŋaruakun aŋalatchiḷuni.”

²⁶ Atanġum kiugaa, “Paqitkuma malġukipiaq qulinik (50) patchisaiḷaanik iñugnik Sodom-mi, suksraunġiġñiaŋitkiga iluqaan iniqpak pisigilugich.”

²⁷ Abraham uqallalgitchuq: “Suliqutigiŋaiŋŋa sapiqtusuutaił̣ł̣uŋa uqaqatigivsaaġukkapkiñ, Ataniiq. Iñugruiññauvluŋa uqallakkumiñaitkaluaqtuaŋa tainna.

²⁸ Aglaan uvva malġukipiaq tallimałhiñat (45) patchisaiḷaat iñuich inniqpata malġukipiaq quliŋiḷaat (50), tavra suksraunġiġñiaqpiuŋ iluqaan nunaaqqiq inuŋaniḷugu tallimanik?” Atanġum kiugaa, “Suksraunġiġñiaŋitkiga nunaaqqiq paqitkuma malġukipiaq tallimanik (45) patchisaiḷaanik iñugnik.”

²⁹ Abraham uqallalgitchuq: “Aasii iḷaanni malġukipiałhiñatun (40) iñugiaktigiruat patchisaiḷaat inniqpata.” Ilaata kiugaa, “Suksrauġiġñiaŋitkiga malġukipiatun (40) iñugiaktigiruat patchisaiḷaat inniqpata.”

³⁰ Abraham uqallaktuq, “Qinnautinaŋa, Ataniiq, aglaan uvva uqallavsaaqtuksrauruŋa. Aasii iḷaanni iñuiññaq qulitualuich (30) patchisaiḷaat inniqpata?” Ilaa uqallaktuq, “Suksrauġiġñiaŋitkiga paqitkuma iñuiññaq qulinik (30).”

³¹ Abraham uqallaktuq, “Suliqutigiŋaiŋŋa sapiqtusuutaił̣ł̣uŋa uqautivsaaqapkiñ, Ataniiq. Iḷaanni aasii iñuiññatun (20) iñugiaktigitualuktuat patchisaiḷaat inniqpata?” Ilaa uqallaktuq, “Suksrauġiġñiaŋitkiga nunaaqqiq paqitkuma iñuiññatun (20) iñugiaktigiruanik.”

³² Abraham uqallaktuq, “Qinnautinaŋa, Ataniiq, uqallavsaallagniaqtuŋa atausimik. Aasii qulitualugnik patchisaiḷaanik paqitkuvich?” Ilaa uqallaktuq, “Suksrauġiġñiaŋitkiga quliuruat inniqpata.”

³³ Uqaqatigianikkamiuŋ Abraham, Ataniq aullaqtuq, aasii Abraham utiqłuni aimaaġvimiñun.