Genesis 17 - Iñupiatun Mumiksat Uqalugiksuat

Sivunniuġun Nalunaiñŋutchiġñikun

¹ Abram tallimakipiaġutaiḷatun (99) ukiuniŋman, Atanġum niptaġvigivlugu uqallautiŋagaa, “Uvaŋa uvva Sapiġñaqtuaq God. Kamakkutiqaġutin uvamnun ataramiglu pasiñaġumiñaiḷḷutin.

² Sivunniuġunmik inillaiñiaqtuŋa iliŋnun aasii iñugiaktuanik kiŋuvaaksriḷḷutin.”

³ Abram punŋaruq kiiñani tutiłługu nunamun, aasii God uqallaktuq,

⁴ “Inillairuŋa uumiŋa sivunniuġunmik iliŋnun: Unniqsuqłiigikpiñ tavra ilvich maŋŋuuniaqtutin iñugiaktuanun nunaqpaich iñuŋiññun.

⁵ Atqiñ Abram-guŋaiġñiaqtuq, aglaan Abraham-guġluni, qanukkii maŋŋuuniaqtutin iñugiaktuanun nunaqpaich iñuŋiññun.

⁶ Kiŋuvaaksriññiaġikpiñ iñugiaktuanik, aasii iḷaŋich umialiguġniaqtut. Iñugiaksivaił̣ł̣utiŋ iññiġniagaich qavsich nunaqpaich.

⁷ “Taŋŋiġñiaġiga unniqsuqłiisiga iliŋnullu kiŋuvaaġnullu kiŋuniġiigñiaqtuanun, isuksraiḷaamun inniaqtuq sivunniuġun. Uvaŋa iliŋnun God-auniaqtuŋa God-auluŋalu kiŋuvaaġiniaqtaġnun.

⁸ Qaiññiaġiga iliŋnun kiŋuvaaġnullu manna nuna paŋmami iñuuniaġvigiran. Tamatkiġḷugu nunaŋa Canaan piginiaġaat kiŋuvaaqpich isuitchuamun, aasii uvaŋa iliŋisa God-iginiaġaanŋa.”

⁹ God-im uqallautigaa Abraham, “Ilvich tavra kamagiruksraġigiñ sivunniuġutaurruaq, ilviḷḷu kiŋuvaaqpiḷḷu kiŋuniġiigñiaqtuat.

¹⁰ Ilviḷḷu kiŋuvaaqpiḷḷu uvva sivunniuġun kamagiraqsraqsi: aŋutipayaat nalunaiñŋutchiqsuksraurut.

^11-12 Tavraŋŋaaglaan nalunaiñŋutchiqsuksraġigisi aŋutaiyaapayaat aniruat uvlianikpata tallimat piŋasuni, iḷagilugisuli kivgaġiravsi iġñiaġiraŋich aniruat igluvsiññi suli kivgasi tauqsiaguŋaruat allaniñ nunaniñ. Taaptuma nalunaiġñiaġaa inillaktauruaq sivunniuġutikun unniqsuqłiiñiq inniaqtilaaŋanik iligniḷu uvamniḷu.

¹³ Iluqaisa aŋutit aŋutaiyaallu nalunaiñŋutchiqsauruksraurut, aasii taamna nalunaiñŋutauniaqtuq timivsiññi sivunniuġutiga inniaqtilaaŋanik isuksraiḷaamun.

¹⁴ Kiñapayaaq aŋun nalunaiñŋutchiqsauŋaitchuaq iḷaullayumiñaitchuq uvaŋa iñugiramnun, qanukkii ilaata nalaunŋaitkaa inillaktauŋaruaq sivunniuġutikun unniqsuqłiiñiq uvamnun.”

¹⁵ God-im uqallautigaa Abraham, “Tuvaaqatin taiguŋaiġñiaġiñ Sarai-mik; tavraŋŋaaglaan atiġiniaġaa Sarah.

¹⁶ Quviasaaġusiaqaqtinniaġiga iġñiqaqtillutin ilaagun. Aakaġuġniaqtuq iñugiaktuanun nunaqpagnun, aasiisuli umialiŋŋuġniaġmiut iḷaŋich kiŋuvaaŋisa.”

¹⁷ Abraham puttuq aksiutilġataqługu kiiñani nunamun, aglaan iglarraqsimaruq isumasaqłuni, “Iñuk imña miqłiqsiyumiñaqpa ukiuqtutigiruaq tallimakiapiatun (100)? Sarah miqłiqsiyumiñaqpa ukiuqaqtuaq sisamakipiaq qulitun (90)?”

¹⁸ Abraham-gum uqallautigaa God, “Ishmael una kiŋuvaannaqtisiññaġuŋ!”

¹⁹ Aglaan God uqallaktuq, “Naumi. Tuvaaqatin Sarah iġñiqaġniaqtuq aasii atchiġñiaġiñ Isaac-mik. Inillagniaġiga sivunniuġutiga ilaanun kiŋuvaaġiniaqtaŋiññullu taimuŋa isuitchuamun. Sivunniuġun inniaqtuq isuksraiḷaamun.

²⁰ Tusaaŋagiga apiqsriaġiran Ishmael-kun, tainnaqługu piḷḷuatautiqaqtinniaġiga aitchuġniaġiga iñugiaktuanik miqłiqtuksraŋiññik iñugiaktuaniglu kiŋuvaaqaqtillugu. Aapaginiaġaat qulit malġuuruat (12) qaukłiuniaqtuat, aasiisuli kamanaqsiḷugu nunaqpaguqtinniaġitka ilaata kiŋuvaaġiniaqtaŋich.

²¹ Aglaan sivunniuġutiga inniaqtuq iġñiġnun Isaac-mun, aniñiaqtuamun Sarah-miñ innaiḷikpan ukiutqigu.”

²² God-im uqautiŋaiqamiuŋ Abraham, uniñŋagaa.

²³ Taaptumani uvlumi Abraham-gum kamagivlugu God iġñini Ishmael nalunaiñŋutchiqsinŋagaa iluqaisalu allat aŋutit igluqatiini, kivgaġiratiglu aniŋaruat aimmivigmiñi tamatkualu ilaata tauqsiaġiŋarani.

²⁴ Abraham ukiuqaŋaruq tallimakipiaġutaiḷatun (99) nalunaiñŋutchiqsaukami,

²⁵ aasii iġñiŋa Ishmael ukiuqtutigivluni qulit piŋasutun (13).

^26-27 Tavrani uvlumi Abraham-lu iġñiniḷu aŋutipayaallu iglumiuqatiŋich kivgauruallu aniŋaruallu tavrani iglumi tauqsiaguruallu allaniñ nunaniñ nalunaiñŋutchiqsauŋarut atautchikun.