Genesis 16 - Iñupiatun Mumiksat Uqalugiksuat

Hagar-lu Ishmael-lu

¹ Abram aġnaata Sarai-m miqłiqsisiŋaitkaa. Aglaan Egypt-miumik kivgaqaŋaruq atiqaqtuamik Hagar-mik,

² tavraasii Sarai-m uqallautigaa Abram, “Atanġum uvva qitunġiḷaisitkaaŋa. Summan ilvich siñiqatigisuŋitpiuŋ kivgaġa? Suagguuq miqłiqsisiniaġaaŋa.” Abram-gum iviġaumagiŋagaa Sarai-m uqallautaa.

³ Tavraasii qaitkaa Hagar ilaanun nukaġaġitquvlugu. Taamna piŋaruq Abram iñuuniaganigman Canaan-mi qulini ukiuni.

⁴ Abram-gum siñiqatigiŋagaa Hagar, aasii siŋaiyauŋaruq. Hagar iḷitchuġikami siŋaiyautilaamiñik uumikkiutiliŋagaa Sarai.

⁵ Sarai-m uqallautigaa Abram, “Ilvich pisigivlutun Hagar-m uumikkiutiliġaaŋa. Uvamnik uvva qaiñŋaraġa iliŋnun, aasiuvva iḷitchuġikamiqaŋa siŋaiyautilaamiñik, uumikkiutirraqsigaaŋa. Ataniqtuq isivġiutiqaġli nalliqpuk iłuaġmagaan, ilvich naakka uvaŋa!”

⁶ Abram-gum kiugaa, “Tavraami, ilvich kivgaġigiñ atanniqsuġiḷḷu; qanuq aŋalatchukkupku aŋalarruŋ.” Tavraasii Sarai-m Hagar piuġrugivaił̣ł̣ugu aullauŋaruq.

⁷ Isaġulgata Atanġum kasuġaa Hagar siiqsinniġmiitillugu nunagluktuami apqunmi Shur-muksaġiami

⁸ aasii uqallakłuni, “Hagar, kivgaŋa Sarai-m, sumiŋŋaqtuatin aasii sumuksaqpich?” Kiugaa, “Aullauruŋauvva qaukłimñiñ.”

⁹ Isaġulik uqallaktuq, “Utiġiñ Sarai-mun aasii kamakkutiqaġlutin ilaanun.”

¹⁰ Aasii uqallagmivḷuni, “Aitchuġniaġikpiñ iñugiakpaktuanik kiŋuvaaksraġnik kia unnii kisillayumiñaisaŋiññik.

¹¹ Iġñiqaġniaqtutin uvva, aasii atchiġñiaġiñ Ishmael-mik, qanukkii Atanġum tusaaŋagaa qirratin iłuiḷḷiuġniġni.

¹² Aglaan iġñiġiñ iñuuniaqtuq aŋalatchuġnaitchuatun kakaktitun; akiḷḷiqsruġniaqtuq kisupayauranik, aasiiḷi kisupayaam akiḷḷiqsruġniaġmigaa. Iñuuniaqtuq akiḷḷiġilugich nanmiñiq iḷapayaani.”

¹³ Hagar inmiñun apiġiruq, “Tautupiaqpiguimña God aasii iñuuvluŋa quliaqtuaġillavlugu?” Tavraasii atchiŋagaa Ataniq, uqaqtuaq inmiñun, “God-im Tautuguugaaŋa.”

¹⁴ Tainnaqługu iñuich tairaġigaat nivviaq akunġagniittuaq Kadesh-guvlu Bered-guvlu Beer Lahai Roi-mik (Nivviaŋa Iñuuruam Tautuguuruam Uvamnik).

¹⁵ Hagar iġñiŋaruq Abram-miñ, aasii Abram-gum atchiŋagaa Ishmael-mik.

¹⁶ Abram ukiuqtutilaaqaŋaruq sisamakipiaq itchaksratun (86) iġñiqaqtinmani Hagar-m Ishmael-mik.