Genesis 15 - Iñupiatun Mumiksat Uqalugiksuat

God-ivlu Abram-lu Sivunniuġutaak

¹ Taamna pianiŋman, Abram qiñiqtuuraaŋaruq aasii tusaavlugu Ataniq uqallaktuaq, “Iqsiñak, Abram. Anniyaitkutauniaqtuŋa iliŋnun anayanniuġunmi kamanaqtuamiglu akiḷiusiaksriḷḷutin.”

² Aglaan Abram-gum kiuŋagaa, “Qutchigñiqsrauruatiin Ataniiq, sumun imña akiḷiusiaksraq qaiññiaqtan anniqsuutauniaqpa uvamnun, uvva qitunġaisilluŋa? Kiŋuvaannaktuksratualuk tavra Eliezer, Damascus-miu.

³ Aitchuŋaitkigma miqłiqtunik, suli uvva kivgaġma kiŋuvaannaktaaġiniaġmigaich uvaŋa suġallitka.”

⁴ Tavraasii tusaavsaalgitkaa Ataniq uqallaktuaq ilimiñun: “Uuma kivgaġiraqpich Eliezer-m kiŋuvaannaktaaġiniaŋitkaich suġallitin; ilvich nanmiñiq iġñiġiñ kiŋuvaannagniaqtuq.”

⁵ Atanġum annisivlugu uqallautigaa, “Qiviaġuŋ qiḷak aasii kisitchaġaluakkich uvluġiat; tainnatun iñugiaktigiruanik kiŋuvaaqaġniaqtutin.”

⁶ Abram ukpiqsraŋaruq Ataniġmik, tavraasii taamna pisigivlugu Atanġum iviġaumagivlugu akuqtuŋagaa nalaunŋarualiqirauvlugu.

⁷ Tavra Atanġum uqallautigaa, “Uvaŋa Atanġuruŋa, aullatiŋaraqpiñ Ur-miñ Babylonia-miittuamiñ, aitchuġukłutin mattumiŋa nunamik iliŋnun pigitquvlugu.”

⁸ Aglaan Abram-gum apiġigaa, “Qutchigñiqsrauruatiin Ataniiq, qanuġluŋa iḷisimaniaqpik piginiaqtilaaŋanik?”

⁹ Ilaata kiugaa, “Qaġġirriŋŋa immulivigmik, nagruligmik, aŋusallumiglu imnaimik, iluqaisa piŋasunik ukiuqtutilaaqaqtuanik, tiŋmiamiglu, pigeon-miglu.”

¹⁰ Abram-gum qaġġisiŋagaich niġrutit God-mun, piḷakługich avillaavlugich qitqatigun, aasii akiḷḷiġiiksillaavlugich avvaġiich; aglaan avguŋaitkaik tiŋmiak.

¹¹ Tiŋmiat tuquŋaruaqtuqtit niqinukkaluaqtut, aglaan Abram-gum uŋullaqtuŋagaich.

¹² Siqiñiq nipiaqsimman, Abram siññaġiksipiaġataqłuni siquniqsuq, aasii iqsiññiuliŋaruq.

¹³ Atanġum uqallautigaa, “Kiŋuvaaġiniaqtatin tagialaniaqtut nunaŋiḷaamigni; kivgaġiniaġaich, nagliksaaqtitaġiluġiḷḷu 400-ni ukiuni.

¹⁴ Aglaan tatavsaġniaġiga nunaqpak tigutaaqsimaviat, aasii uniññiaġaat umiallaŋalutiŋ.

¹⁵ Ilvich aglaan iñuuniaqtutin utuqqaliḷġataġlutin, isukłiññiaqtutin tutqigḷutin.

¹⁶ Kiŋuniġiich sisamaiguruat pianikpata, kiŋuvaatin utiġataġniaqtut mauŋa, qanukkii Amor-miuguruat piḷuksipiaġataqpata kisian tatavsaġnaqsiñiaqtut.”

¹⁷ Siqiñiq nipianiŋman taaqsimman, puyualaruaq auma puggutami, naniġlu ikualaruaq ayagmi nuiŋaruk aasii akunġatiguaqłutik avguat niġrutit.

¹⁸ Tavrani tavra Ataniq inillaiŋaruq sivunniuġunmik Abram-mun. Uqallakłuni, “Unniqsuqłiiruŋa aitchuġukługich kiŋuvaatin iluqaanik mattumiŋa nunamik killiŋaniñ Egypt-gum kuukpagmuaglaan atiqaqtuamik Euphrates-mik,

¹⁹ iḷagilugich nunaŋich Ken-miut, Keniz-miullu, Kadmon-miullu,

²⁰ Hit-miullu, Periz-miullu, Rephaim-guruallu,

²¹ Amor-miullu, Canaan-miullu, Girgash-miullu, Jebus-miullu.”