Genesis 14 - Iñupiatun Mumiksat Uqalugiksuat

Abram-gum Annautigaa Lot

¹ Sisamat umialgich, Amraphel Babylonia-ġmiu, Arioch Ellasar-ġmiu, Chedorlaomer Elam-miu, Tidal-lu Goiim-miu,

² aŋuyagiaŋarut akiḷḷiġivlugich tallimat allat umialgich: Bera Sodom-miu, Birsha Gomorrah-ġmiu, Shinab Admah-ġmiu, Shemeber Zeboiim-miu, umialiŋalu Bela-m (atiqaqtuaqtauq Zoar-mik).

³ Taapkua tallimat umialgich ikayuqtigiiksinŋarut atautchimukługich aŋuyaktitiŋ Siddim Valley-mi, paŋmami atiqaqtuamik Dead Sea-mik.

⁴ Iliŋich aŋalatauŋagaluaqtuat Chedorlaomer-mun qulit malġugni (12) ukiuni, aglaan paakłaktuliŋagaat qulit piŋayuanni (13th) ukiut.

⁵ Ukiut akimiaġutaiḷaŋanni (14th) Chedorlaomer iḷaaluġiraniḷu qaiŋarut aŋuyaktitiglu aasii akiiḷivḷugu Rephaim Ashteroth-Karnaim-mi, Zuzim-lu Ham-mi, Emim-lu qaiqsuaŋani Kiriathaim-mi,

⁶ suli Hor-miuguruallu iġġiŋiñi Edom, malikataqługich Elparan-muaglaan killiŋanun nunagluktuam.

⁷ Tavraasii utiŋarut Kadesh-mun (taisuuŋaraŋannun Enmishpat-mik). Piññaktaaġiŋagaat iluqaan nunaŋat Amalek-miuguruat suli akiiḷivḷugich Amor-miuguruat iñuuniaqtuat Hazazon Tamar-mi.

⁸ Umialiŋich aasii Sodom-lu, Gomorrah-vlu, Admah-vlu, Zeboiim-lu, Bela-mlu aŋuyagiaŋarut Siddim Valley-mi aasii aŋuyakłutiŋ

⁹ akiḷḷiġivlugich umialiŋich Elam-lu, Goiim-lu, Babylonia-vlu, suli Ellasar-vlu, tallimat umialgich akiḷḷiqaqłutiŋ sisamauruanik.

¹⁰ Natiġnami iñugiaŋarut iḷuqsrat anŋunmik imaligaat, aasii umialiŋiksa Sodom-lu Gomorrah-vlu aŋuyaktiŋich qimaasaġaluaqamik, kataksiññaġniqsut iḷuqsranun; aglaan piŋasuuruat umialgich aŋuyaktiŋich annakłutiŋ iġġiñun.

¹¹ Sisamat umialgich piññaktaaġiŋagaich supayaurat Sodom-miḷḷu Gomorrah-miḷḷu, niqipayaallu, aasii aullaqłutiŋ.

¹² Lot, Abram-gum uyuġua, iñuuniaqtuaq Sodom-mi, aullautiŋammigaat suġauttaqtuummaan.

¹³ Aglaan iñuum annakłuni kiligiaŋagaa qiñiqtamiñik Abram, Hebrew-guruaq, iñuuniaqtuaq qaniŋanni napaaqtuniqłuŋiññi Mamre-m Amor-miuguruam. Mamre-ḷu suli aniqatiiŋik Eshcol-lu Aner-lu iḷaaluġiŋagaich Abram-gum.

¹⁴ Abram tusaakami uyuġuni tiguŋatilaaŋanik, ququaŋagaich atautchimuktiłługich aŋuyaktauruat inimigni, iñugiaktigivlutiŋ 318-tun, aasii maliqataŋagaich sisamauruat umialgich Dan-muaglaan.

¹⁵ Tavrani qavsiigullaavlugich inillaŋagaich iñugirani, aŋuyagiaŋagaich akiḷḷiġiratiŋ unnuakun, aasii akiiḷivḷugich. Maliqataŋagaich tikiḷġataqługu Hobah, salliñaaŋaniittuaq Damascus-gum,

¹⁶ tasuqługich aasii iluqaisa suġauttapayaat piññaktaaġigaluaqtaŋich. Utqutiŋagaich uyuġuni Lot, suġauttaŋiḷḷu, aġnallu, allallu tigurauŋaruat.

Melchizedek-gum Uqallautigaa Quviasaaġusiqł̣ugu Abram

¹⁷ Abram utiġman akiiḷianikługich Chedorlaomer-lu allallu umialgich, umialgata Sodom-gum kasuġiaŋagaa Shaveh Valley-mi (taisuumiraŋanniktauq King’s Valley-mik).

¹⁸ Aasii Melchizedek, Salem umialiŋa aŋaiyyuliqsauruaq Qutchigñiqtauruamun God-mun, qaġġirriŋaruq punniġmik wine-miglu Abram-mun,

¹⁹ uqallautigaa piḷḷuatautiqaquvlugu, uqallakłuni, “Qanuqtuq Qutchigñiqtauruam God-im, savaŋaruam qiḷagmiglu nunamiglu, quviasaaġusiġḷiuŋ Abram!

²⁰ Qanuqtuq Qutchigñiqtauruaq God, akimmatiqaqtitchiruaq ilignik akiḷḷiġiraġniñ, nanġaqtauli!” Tavraasii Abram-gum aitchuŋagaa Melchizedek quliŋannik suġauttapayaat tasuqtaġmi.

²¹ Umialgata Sodom-gum uqallautigaa Abram, “Pigikkich suġauttat, aglaan qaitqigḷugich iluqaisa iñugiratka.”

²² Abram-gum kiugaa umialiŋa Sodom, “Unniqsuqłiiruŋa sivuġaani Atanġum, Qutchigñiqtauruam God-im, Savaŋaruam qiḷagmiglu nunamiglu,

²³ piksraqtaaqaġniaŋiññivḷuŋa sumikunnii ilvich pigiraġnik, ivaluviñauramik unnii naagga aluġutim nimiġutiŋanik. Tavraasii uqallakkumiñaiññiaqtutin, ‘Uvaŋa tavra Abram umiallaktittaġa.’

²⁴ Uvaŋaunnii piksramnik sumik piñiaŋitchuŋa. Iñugma niġianiŋaraŋat naamaruq. Aglaan iḷaaluġiratka, Aner-lu, Eshcol-lu, suli Mamre-ḷu, autaaġusiaqaġlich.”