Genesis 12 - Iñupiatun Mumiksat Uqalugiksuat

God-im Ququaġmagu Abram

¹ Atanġum uqallautigaa Abram, “Aullaġiñ nunaŋniñ, iḷaŋniḷḷu, aapaviḷḷu aimmiviŋaniñ, aullaġlutin nunamun qiñiqtinniaqtamnun.

² Iñugiaktuanik kiŋuvaaksriññiaġikpiñ, aasii nunaqpaguġniaqtut. Piḷḷuatautiqaqtinniaġikpiñ atqiḷḷu kamanaqtuaġuġlugu, tainnaptauq ilvich anniqsuutauniaqtutin.

³ Anniqsuusiaqaqtinniaġitka ikayuiruat iliŋnun, Aglaan piaġiiḷḷiuqtinniaġitka piaġiiḷḷiuqtitchiruat ilignun. Aasii ilikkuaġlugu anniqsuusiaqaqtinniaġitka iñupayauraŋi nunam.”

⁴ Abram ukiunikkami piŋasukipiaq akimiatun (75), aullaqiŋaruq Haran-miñ, Ataniġmiñ piraksriusiamisun aasii Lot-gum aullaqatigiŋagaa.

⁵ Abram-gum aullautiŋagaa tuvaaqatini Sarai, uyuġuniḷu Lot, iluqaisalu suġauttannaktaatiŋ aasiisuli piqatigivlugich iluqaisa kivgauruat pigiliutiŋaratiŋ Haran-mi, aasii tavra aullaqiŋarut Canaan-muksaqłutiŋ. Tikiññamiŋ Canaan-mun,

⁶ Abram iglauŋaruq nunakun tikiḷġataqłuni napaaqtumun qiksigñaqtuamun Moreh-mi, Shechem-miittuami. (Taimani Canaan-miut iñuuniaŋarut tamattumani nunami.)

⁷ Ataniq niptaŋaruq Abram-mun aasii uqallautivlugu, “Tamarra tamanna nuna qaiññiaqtaġa kiŋuvaaġiniaqtaġnun.” Tavraasii Abram ikipkaiviḷiuŋaruq tavrani Ataniġmun tuktiłługu, niptaġvigiŋammani tavrani.

⁸ Taaptuma aquagun, iglauŋaruq qimiġaulaanun kivaliñaaŋani Bethel-gum aasii nullaqłutiŋ akunġagnun, Bethel ualliġivlugu aasii Ai kivalliġivlugu. Tavraniptauq tavra ikipkaiviḷiuŋaruq Ataniġmun tuktiłługu, aasii nanġaġvigivlugu Ataniq.

⁹ Iglauŋarut nutqallaavlutik tuŋaaġivlugu Negev.

Abram Egypt-mi

¹⁰ Kaaksiunaq inŋaruq nunami, Abram Egypt-muŋaruq, iñuuniaġiallakłuni taavani kaaksiunaq piaġiitpaił̣ł̣uni.

¹¹ Tikiyasiuraqami Egypt-mun, uqallautigaa tuvaaqatini Sarai, “Ilvich uvva aġnaġiksutin.

¹² Egypt-miut uvva tautukkumisin, iḷisimaniaqtut uvamnun tuvaaqatiginiḷutin, aasii tuqulluŋa uvaŋa ilvich iñuupkaġlutin.

¹³ Uqallautigisigitin uvamnun nayaaluginiḷutin; tavraasii iñuupkaġniaġaanŋa aŋalalluataġluŋalu ilvich pisigilutin.”

¹⁴ Tikitkanigman Egypt-mun, Egypt-miut tavra iḷitchuġiŋagaat tuvaaqataa aġnaġipiaġataqtilaaŋanik.

¹⁵ Atanaurat iḷaŋisa tautukkamirruŋ uqallautiŋagaat Pharaoh qanutun aġnaq aġnaġiksilaaŋanik; tavraasii igluqpaŋanuutiŋagaat nuliaŋiññun iḷaliutivlugu.

¹⁶ Pisigivlugu aġnaq aŋalalluataŋagaa Abram, aitchuqługu imnaiñik, nagrulignik, pamiqsaanik, aġnasalluniglu aŋusalluniglu kakaktinik, aġnaniglu aŋutiniglu kivganik, pikukturuaniglu.

¹⁷ Aglaan Atanġum piaġiitchuanik naŋirrutiniktinŋagaa Pharoah taputivlugiḷḷu iñuich igluqpaŋaniittuat pisigivlugu Abram tuvaaqataa Sarai.

¹⁸ Tavraasii Pharaoh-m aipkaŋagaa Abram aasii apiġivlugu, “Immaimña qanuq aŋalatpiŋa? Summan uqallautiŋaitchaġma aġnaq tuvaaqatiginiḷugu?

¹⁹ Summan uqallaktuatin nayaaluginivḷugu, uvamnullu tuvaaqatiksraqtaaġipkaqługu? Uvva tuvaaqatin; maaŋŋa piiġiñ!”

²⁰ Pharaoh-m piraksriŋagaich iñuni, aasii Abram aullaqtinŋagaat nunaqpaŋmiñ, aullaqatigivlugu tuvaaqatiŋa ilaata suġalipayauraŋiḷḷu.