Genesis 11 - Iñupiatun Mumiksat Uqalugiksuat

Nasiqsruġviŋa Babylon

¹ Taimani, iñupayaaŋich nunam atausił̣hiñamik uqausiqaŋarut ativlutiglu uqaluŋich.

² Iglaullaġmiŋ kivanmun, tikiñŋarut natiġnaamun Babylonia-mi aasii inillakłutiŋ tavruŋa.

³ Avanmun uqautinagutiŋarut, “Ki! Igluqpaksranik qikunik savakta suliasii igalugich siqquqsiḷġataġlugich.” Tavraasii igluliuġutiksraniŋarut qikunik anŋunmik nipirrusiqł̣ugich.

⁴ Uqallagniqsut, “Ki, aasii iniqpaliuqta nasiqsruġviḷigaamik tikiḷḷugu qiḷak, iḷisimanaqsiyumauq kiutilaaptinnik aasii siamisugruŋiḷḷuta sumulliqaa nunami.”

⁵ Tavraasii Atanġum tautugiaŋagaa nunaaqqiḷiaŋat nasiqsruġviglu nappaqtaŋat,

⁶ aasii uqallaktuq, “Tavraukua, ukua iñuich atautchiigurut uqausiqaġmivḷutik atausimik; tavra taamna aullaqisaagusiññaqtuq savaaġiyumaaqtaŋannun. Tavra susupayaaġumiŋ isumamiktun surġaġniaqtut!

⁷ Atqaġlutauvagut alapititchaqtuġlakput uqausiŋat kaŋiqsisillaiġumaut avanmun.”

⁸ Atanġum siamitinŋaniġaich sumulliqaa nunamun, tavraasii aġiuŋagaat nunaaqqiḷiaqtik.

⁹ Nunaaqqim atiġiŋagaa Babylon, qanukkii tavrani Atanġum kaŋiqsiḷḷaiqsinŋagaat uqausiḷḷaaŋat avanmun iñupayaat, tavraŋŋa aasii siamitinŋagaich sumulliqaa nunami.

Kiŋuvaaŋich Shem-gum

¹⁰ Ukua uvva kiŋuvaaŋich Shem-gum. Malġuk ukiuk pianiŋmagnik uliqpaqqaaqtillugu, Shem ukiunikkami tallimakipiatun (100), iġñiqaŋaruq Arpachshad-mik.

¹¹ Iñuuvsaaŋaruq 500-tun iñugiaktigiruani ukiuni aasii allanik miqłiqsivsaaŋaruq.

¹² Arpachshad ukiunikkami iñuiññaq akimiatun (35), iġñiqaŋaruq Shelah-mik.

¹³ Iñuuvsaaŋaruq 403-tun iñugiaktigiruani ukiuni aasii allanik miqłiqsivsaaŋaruq.

¹⁴ Shelah ukiunikkami iñuiññaq qulitun (30), iġñiqaŋaruq Eber-mik.

¹⁵ Iñuuvsaaŋaruq 403-tun iñugiaktigiruani ukiuni aasii allavsaanik miqłiqsivsaaŋaruq.

¹⁶ Eber ukiunikkami iñuiññaq akimiaġutaiḷatun (34), iġñiqaŋaruq Peleg-mik.

¹⁷ Iñuuvsaaŋaruq 430-tun iñugiaktigiruani ukiuni aasii allanik miqłiqsivsaaŋaruq.

¹⁸ Peleg ukiunikkami iñuiññaq qulitun (30), iġñiqaŋaruq Reu-mik.

¹⁹ Iñuuvsaaŋaruq 209-tun iñugiaktigiruani ukiuni aasii allanik miqłiqsivsaaŋaruq.

²⁰ Reu ukiunikkami iñuiññaq qulit malġuktun (32), iġñiqaŋaruq Serug-mik.

²¹ Iñuuvsaaŋaruq 207-tun iñugiaktigiruani ukiuni aasii allavsaanik miqłiqtuqavsaaqłuni.

²² Serug ukiunikkami iñuiññaq qulitun (30), iġñiqaŋaruq Nahor-mik.

²³ Iñuuvsaaŋaruq 200-tun iñugiaktigiruani ukiuni aasii allanik miqłiqsivsaaŋaruq.

²⁴ Nahor ukiunikkami iñuiññaq quliŋŋuġutaiḷatun (29), iġñiqaŋaruq Terah-mik.

²⁵ Iñuuvsaaŋaruq 119-tun iñugiaktigiruani ukiuni aasii allanik miqłiqsivsaaŋaruq.

²⁶ Terah ukiunikkami piŋasukipiaq qulitun (70), iġñiqaŋaruq Abram-mik, Nahor-mik, Haran-miglu.

Kiŋuvaaŋich Terah-m

²⁷ Ukua kiŋuvaaġigaich Terah-m, aapauruam Abram-mun, Nahor-mun, Haran-mullu. Haran aapaŋa Lot-gum,

²⁸ aasii Haran tuquŋaruq iñuguġvigmiñi Ur-mi Babylonia-miittuami, iñuupkaqtillugusuli aapani.

²⁹ Abram-gum tuvaaqasiutiŋagaa Sarai, aasii Nahor tuvaaqasiŋaruq Milcah-mik, panigiraŋanik Haran-gum, aapaummiruaqtauq Iscah-mun.

³⁰ Sarai miqłiqsiḷaiñŋaruq.

³¹ Terah-m kaluqługu iġñini Abram, tutaaluniḷu Lot, iġñiġuruaq Haran-mun, ukuaniḷu Sarai, Abram tuvaaqataa aullaŋaruq nunaaqqiŋanniñ Ur-m Babylonia-miittuam Canaan-muksaqłutiŋ. Haran-muaglaaġamik aasii tavrani iñuuniagaqsivḷutiŋ.

³² Terah tuquŋaruq tavrani ukiuqtutilaanikłuni 205-tun.