Genesis 10 - Iñupiatun Mumiksat Uqalugiksuat

Kiŋuvaaŋich Noah-m Iġñiŋisa

¹ Uvva ukua kiŋuvaaŋich Noah-m iġñiŋisa: Shem-gum, Ham-gum, Japheth-guvlu. Taapkua piŋasuuruat iġñiqallaaŋarut uliqpaaniŋman.

² Japheth-gum kiŋuvaaŋich ukua: Gomer, Magog, Madai, Javan, Tubal, Meshech, Tiras-lu.

³ Kiŋuvaaŋich Gomer-m ukua: Ashkenaz, Riphath, Togarmah-lu.

⁴ Kiŋuvaaŋich Javan-gum ukua: Elishah, Tarshish, Kittim, Rodanim-lu.

⁵ Taapkua maŋŋuuŋarut iñuŋnun iñuuniaqtuanun nunam siñaani qikiqtanilu. Kiŋuvaaŋich Japheth-gum taapkua, ilimikkullaa iñuuniaġusiqaqłutiŋ iḷagiiḷḷaat, nunallaamigni, ilimikkullaasuli uqausiqaqłutiŋ.

⁶ Kiŋuvaaŋich Ham-gum ukua: Cush, Egypt, Libya, Canaan-lu.

⁷ Kiŋuvaaŋich Cush-gum ukua: Seba, Havilah, Sabtah, Raamah, Sabteca-lu. Kiŋuvaaŋich Raamah-m ukuak: Sheba-lu Dedan-lu.

⁸ Cush iġñiqaŋaruq atiqaqtuamik Nimrod-mik, sivulliuvluni nunami aŋuyaktiqpaguqtuamik.

⁹ Atanġum ikayuutaagun aŋuniaqtiqpauŋaruq, tainnamik iñuich uqallagaġniqsut, “Atanġumtuq aŋuniaqtiqpaguġlisin Nimrod-tun!”

¹⁰ Atanniqsuiŋaruq Babylon-mik, Erech-mik, Accad-miglu, iluqaġmiŋ Babylonia-miittut.

¹¹ Tamaaŋŋa nunamiñ aullaŋaruq Assyria-mun aasii nappaivḷuni nunaaqqiñik Nineveh-mik, Rehoboth Ir-mik, Calah-miglu,

¹² aasiisuli Resen-mik, akunġagniittuaq Nineveh-vlu iniqpaŋatalu Calah-m.

¹³ Kiŋuvaaŋich Egpyt-gum ukua: Lydia-miut, Anam-miut, Lehab-miut, Naphtuh-miut,

¹⁴ Pathrus-miut, Casluh-miut (Philistia-ġmiut maŋŋuŋich), Crete-miullu.

¹⁵ Canaan-gum iġñiŋik ukuak: Sidon aŋayukłiuvluni, Heth-lu.

¹⁶ Canaan kiŋunġuŋammiuq Jebus-miunun, Amor-miunun, Girgash-miunun,

¹⁷ Hiv-miunun, Ark-miunun, Sin-miunun,

¹⁸ Arvad-miunun, Zemar-miunun, Hamath-miunullu. Ilimikkullaa kiŋuvaaguruat Canaan-mun siaminŋarut.

¹⁹ Canaan-miut nunaŋich killiqaŋarut tikiḷġataqługich Sidon-miñ Gerar-mun qaniŋanun Gaza-m, Sodom-mun, Gomorrah-mun, Admah-mun, Zeboiim-mun qaniŋaniittuamun Lasha-m.

²⁰ Taapkua kiŋuvaaŋich Ham-gum, maŋŋuġiiḷḷaat iñuuniaqłutiŋ, nunallaamigni, ilimikullaa uqausiqallaavlutiŋ.

²¹ Shem, aŋayua Japheth-gum, maŋŋuġiŋagaat iluqaġmiŋ kiŋuvaaŋisa Eber-m.

²² Shem-gum kiŋuvaaŋich ukua: Elam, Asshur, Arpachshad, Lud, Aram-lu.

²³ Aram-gum kiŋuvaaŋich ukua: Uz, Hul, Gether, Meshek-lu.

²⁴ Arpachshad aapaŋa Shelah-m, Shelah aapaŋa Eber-m.

²⁵ Eber iġñiqaqtuaq malġugnik: igḷuata atiŋa Peleg, qanukkii taimani Peleg iñuumman iñuŋich nunam ilimikkullaa avguŋavlutiŋ; igḷuata aasii atiŋa Joktan.

²⁶ Joktan-gum kiŋuvaaŋich ukua: Almodad, Sheleph, Hazarmaveth, Jerah,

²⁷ Hadoram, Uzal, Diklah,

²⁸ Obal, Abimael, Sheba,

²⁹ Ophir, Havilah, Jobab-lu. Iluqaisa taapkua kiŋuvaaŋich Joktan-gum.

³⁰ Nuna iñuuvigiraŋat inŋaruq Mesha-miñ Sephar-muaglaan tatqavani qimiġaukkaqtuami nunami.

³¹ Taapkua kiŋuvaaŋich Shem-gum, maŋŋuġiiḷḷaat iñuuniaqłutiŋ, nunallaamigni, ilimikullaa uqausiqallaavlutiŋ.

³² Iluqaisa taapkua iñuich kiŋuvaaġigaich Noah-m, aglaŋaruat nunaqpallaaŋisigun, maŋŋullaamisigullu. Taapkua nunaqpaguŋarut aasii siamiłłutiŋ nunamun uliqpaaniŋman.