Galatians 6 - Iñupiatun Mumiksat Uqalugiksuat

Ikayuutisitchi Avanmun

¹ Aniqatiit, iñuk piḷuksipkaqtaukpan qanusipayaamik piḷuunmik, ilivsi aŋalatittuasii Ilitqusiġiksuamun utiqtitaksraġigiksi pikałak tautaitchuakun. Qaunagilusi ilivsiññun, iḷaannivsauq ikł̣igutchaktinniaqtauviaġmiusi.

² Ikayuutisitchi avanmun killuqsaqtinniaqtaukavsi. Tainna piguvsi taŋŋiġñiaġisi Christ pitquraŋi ilivsiññun.

³ Iñuk kiñaliqaa isumagumi piġuqtiġluni inmiñik, ikayuiyummataiġḷuni piḷuksiruamik, sagluqiruq inmiñik.

⁴ Iñullaa naipiqtuġli inmiñun, aasii nakuuniqpan iñuutchiñi isumakkutigilluataġniaqtuq inmiñik, naipiqtuutiqaŋaiġḷuni iñuum allam piŋaraŋanik.

⁵ Qanuq iñullaa isivġiqsauniaqtuq ilaan nanmiñiq iñuusiġikkaġmigun.

⁶ Iñuk iḷisausiaqaqtuaq God-im uqaluŋiñik, aitchuiyummatiqaqtuksraugaluaqtuq pigikkamiñiñ iḷisaurriruamun.

⁷ Sagluqipkaġnasi, God kipagirauyumiñaitchuq. Nautchialiqiritun kivriruatun qanusiksrapayaanik nautchiaksranik kanġaqsruunmiñik, tainnatun iñuk paaqłiusiaqaġniaqtuq qanutchikun iñuusiġikkaġmigun.

⁸ Qanuq iñuk iñuuruaq pisuġuiqsimaaqtinniaqługu piḷuksisuguuruaq iñuutchiñi, suksraunġiqsauniaqtuq taamna pisigilugu. Aglaan iñuk iñuutuiññaqtuaq Ilitqusiġiksuamun aŋalatiłłuni, iñuuniaqtuq isuitchuamun Ilitqusiġiksuakun.

⁹ Aasii piḷaiġutiŋaiḷḷakput nakuurualiqiniq, qanuq qapiŋitkupta akiññagniaqtugut God-im akiḷiiviksraŋa tikitpan.

¹⁰ Tavraasii, piviksraqaqtilaaptiktun, nakuurualiqita iñupayaanun, ikayułhamaaġlugich tamatkua ukpiqtuaguruat.

Aqulliich Kiliktuutit Paġlatillu

¹¹ Tautuksigik qanutun aŋitigiruat aglaich aglaatka uvamnik ilivsiññun.

¹² Iñuich tamatkua maliksuktitchiñiaqsaaruat ilivsiññik nalunaiñŋutchiqsautquvlusi Jew-guruatun, iviġaiñiaqsiññaqtut iñuŋnik, nagliksaaqtitausuŋił̣ł̣utiŋ pisigilugu ukpiġniq kisianun Christ tuqqutaanun aŋarraurami annaurriḷḷaruamun.

¹³ Qanuq tamatkua unnii nalunaiñŋutchiqsauŋaruat timimiŋni kamagilaiñmigaich God-im pitquraŋi. Naaggauvva nalunaiñŋutchiqsautqummigaasi, uqavigaaġutigisukłusi ilimiŋnun iḷitchitqurauniḷusi.

¹⁴ Aglaan uvaŋa uqavigaaġutiqaġuŋipiaqtuŋa supayaamik, aglaatualuk Ataniq Jesus Christ tuquŋaniḷugu aŋarraurami pisigivlugich piḷuutitka. Aasii taamna pisigivlugu, ukpiŋaitchuat piḷġusiŋich tuquŋaruatun iḷiŋarut uvamnun, aasiisuli uvaŋa tuqummatun iliŋiññun. Sivuniqaqtuq taamna, piḷuusiqisuŋaiqsuŋa tavraŋŋaaglaan.

¹⁵ Qanuq nalliak-unnii nalunaiñŋutchiqsaunġuvlu nalunaiñŋutchiqsauŋiññiġuvlu anniqsuutauŋitchuq, aglaan anniqsuutitualuuruq nutauruamik iñuggusiqsauniq Ilitqusiġiksuakun.

¹⁶ Aasii iluqaġmiŋ iñuutuiññaqtuat taavrumuuna, God-im iḷumun Israel-ŋi, tutqiutiqaġlich nagliktuunmiglu God-miñ.

¹⁷ Tavraŋŋaaglaan kialiqaa isumaalluksaaŋaiġḷiŋa, qanuq ikiqaqtuŋa timimni nagliksaaqtitaunipkun pisigivlugu Jesus.

¹⁸ Nagliktuutiqpaŋata Atanipta Jesus Christ itqatigilisi, aniqatiit. Amen.