Galatians 5 - Iñupiatun Mumiksat UqalugiksuatIpiġaġnagu Atanġiqsirrusiaqsi 1 Nalupqinaitchuq, Christ iḷumun atanġiqsinŋagaatigut. Tavraasii iñuusitchisuli atanġiqsitauŋaruatun iñuktun. Utiġnasi iñuuniaġniġmun Jew-guruat pitquraŋisigun annautigisuglugich. 2 Uvaŋa Paul kilikkivsi. Ilivsi nalunaiñŋutchiqsitkuvsi Jew-guruatun, niġiuglusi taavrumuŋa nalunaiñŋutchiqsauniġmun, iñuuniaġniġmullu Jew-guruat pitquraŋisigun, nalaunŋasipkaġniaġasugalusi sivuġaani God-im, Christ annautiyumiñaitkaasi. 3 Uqallautivsaalgitkivsi. Iñuk nalunaiñŋutchiqsaukami, kamaksriruksraupiaġataqtuq iluqaiññik pitquranik aitchuutauŋaruanik Moses-kun. 4 Nalaunŋasipkaqtausukkuvsi pitquranik kamaksriñikun, avinŋaniaqtusi Christ-miñ, annaurrauyumiñaiññiaqtusi God-im nagliktuutiqpaŋagun. 5 Qanuq Ilitqusiġiksuam ikayuutaagun, uvagullu ukpiġutiqaqtuiññaġniptigun Christ-mun, niġiuktugut suli akuqtuġniaġnivḷuta God-mun nalaunŋarualiḷuta. 6 Niġiugikaptigu nalaunŋasipkaqtauniksraqput Christ-kun, nalunaiñŋutchiqsauniq Jew-guruatun naagga nalunaiñŋutchiqsauŋaiññiq anniqsuutauŋitchuq uvaptiŋnun, aglaan ukpiġun kisimi piviuttaqsripkairuaq allanun uvaptiŋnik. 7 Piḷḷuataqtuaguŋagaluaqtuasii. Kia kamagitchaiḷiraqpauŋ tusaayugaaġiksuaq ilivsiññun? 8 Nalupqinaitchuamik God-im kamaksritchaiḷiraŋitkaasi qanuq ilaan ukpiliqsinŋagaasi. 9 Tamattuma iḷumun inŋitchuam iḷisaurrutim taputiniġaasi, imaksraŋuluuram puvlaktinmatun akutaq iluqaan. 10 Nalupqisuŋitchuŋa Ataniġmun isumaliqsinniaqtilaavsiññik uvaŋa isummasivsun tamatkunuuna. Kiña iñuk asiñuurriruaq ilivsiññik God-im tatavsaġniaġaa. 11 Aniqatiit, iñuich imma iḷaŋisa uqautigivalliġñiġaanŋa alġaqsruiñivḷuŋa iñuk annaurraunivḷugu nalunaiñŋutchiqsauŋavluni kamagivlugiḷḷu Jew-guruat pitquraŋich. Taamna iḷumun itpan, summan nagliksaaqtitauvik? Tainnatchimik alġaqsruiguma, iñuich piavsaktautiginayaitkaat alġaqsruutauruaq annaun Christ tuqqutaagun aŋarraurami. 12 Pitquyummiiġaluaġitka iñuich tamatkua asiñuurriruat ilivsiññik, piḷaktuquriruat timisi nalunaiñŋutchiquvlugich, inmiŋnun piḷaktuquyumałhaaqługich ilaisa timitiŋ. 13 Aniqatiit, God-im atanġiqsinŋagaasi. Aglaan atanġiqsitauŋaitchusi piḷuusiqillasisaġlusi. Atanġiqsitauŋarusi piviuttaqqutiyumiñaqsivḷusi, qanutupayauraq ikayuutiyumiñaqsiḷusi avanmun. 14 Qanuq kamagigisi iluqaisa God-im pitquraŋi iñuukavsi uumatun, “Piviuttaġiuŋ siḷalliñ iliktun iḷiḷugu.” 15 Aglaan pisaaŋŋatiaqsiguvsi uqavaaġlusiḷu avanmun, qaunagisitchi. Maqurrutiniaqtusi avanmun tainna piguvsi. Ilitqusiġiksuaġlu Piḷuksisuguuruaġlu Iñuusiq 16 Uqallautigivsi uumiŋa, Ilitqusiġiksuamun aŋalatisuŋaiññaqsiuŋ iñuusiqsi. Kamaginagu piḷuksisuguuruaq iñuusiq. Suli Ilitqusiġiksuam kipiġniuġutiŋi paaqsaaŋammiut piḷuksisuguuruam iñuusivsi kipiġniuġutiŋiñun. 17 Qanuq kipiġniuġutiŋi piḷuksisuguuruam iñuusivsi paaqsaaŋarut Ilitqusiġiksuam pitqutiŋiñun ilivsiññun, aasii pipkalaił̣ł̣ugich sut pisukkaluakkasi. 18 Aglaan aŋalatinnavsi Ilitqusiġiksuamun, annaŋniataŋaiqsusi kamaksriñiataŋnikun Jew-guruat pitquraŋiññik. 19 Piḷuksisuguuruat iñuusivsa pipkaġuugaatigut allatuutinik tuvaaqataitchuat tuvaaqatiqaqtuallu, pigiitchuanik kipiġniuġutinik, pitquraiḷaġniġnik atuġniŋagun timim, 20 ukpiqsraġnik god-auŋitchuanik, aŋatkuliqutinik, uumikkutigiigñiġnik, uqavaaġutinik, killuqsrautinik, qinnautinik, siŋñatinik, atiŋirrutinik, atiŋirrutikun ilaaguaqatigiiksitautinik, 21 tutchutinik, iñuaġutinik, imiġniġnik, imiŋasivḷuni qaunakłaanġiutinik, tainnatullu ittuanik. Kilikkivsi, kiliŋagaluaġmiḷḷavsi sivuani, tamatkua savaaqaqtuat tainnasiñik qiḷaŋmukkumiñaitchut, God-im atanġuvianun. 22 Aglaalli Ilitqusiġiksuam piviuttaqqutiqaqtitkaatigut quviasuunmiglu tutqiunmiglu qiñuirrunmiglu nagliktaunmiglu nakuunmiglu ukpiġnaġniġmiglu 23 pikałaktautairrunmiglu ilimun aŋalarrutilluataġniġmiglu. Iñuich iñuuruat tainna pitqurat taluqsralliaġiŋitkaich iñuutqulugich. 24 Aasii tamatkua atausiŋŋuqatauŋaruat Christ-mun aŋalatinŋaiŋarut piḷuksisuguuruanun iñuusimiŋnun, qanuq pisuguukkaŋich piḷġusiŋiḷḷu pigiitchuat kikiaktuurrauqataummatun piŋarut Christ Jesus-mun. 25 Piqaġniqapta isuitchuamik iñuggunmik Ilitqusiġiksuakun, aŋalatituiññaqta Ilitqusiġiksuamun. 26 Piġuqtiŋaitcha uvaptiŋnik qapiqtautiŋaiġḷuta killuqqutiŋaiġḷutalu. |
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
American Bible Society