Galatians 4 - Iñupiatun Mumiksat Uqalugiksuat

¹ Sivuniġikkaġa kiŋuvaannaktuagunivḷusi uqallakama innaittuq. Kiŋuvaannaktuksraun miqłiqtuuŋŋaġmi, kivgatuttauq inmiuq iñuqaġaluaŋŋaisaunnii inmiñun iluqaġmiŋ aapami suġaliŋi.

² Aasii ilaa qaunaksriqaqłuni munaqsriñik aŋalatchiriñiglu suġaliġmiñik, tikitchiaġivlugu kiŋuvaannagviksrautini, aapami nalunaiŋakkaŋiñik.

³ Tainnatuttauq uvagut. Christ qaiŋaiñŋaan miqłiqtutun inŋagaluaġmiugut, munaqsriqaqłuta pitquranik iñugruiññaiḷḷu piḷġusiġikkaŋiññik nakuurualiqinikun, kivgaummatun iłłuta tamatkunuŋa.

⁴ Aglaan God-im nalunaiqsani piviksraq tikiñman, tiliŋagaa Iġñini nunam iñuŋiñun. Christ aniŋaruq aġnakun, Jew-guvluni, kamaksriruksrauvluni pitquranik,

⁵ sunauvva tasuġukługich tamatkua aŋalatittuat pitquranun, uvagut agliraksraiŋaluta iġñiġitquvluta God-mun, aitchuusiaqaġumiñaqsiḷuta kiŋuvaannaktaksraptiŋnik God-miñ.

⁶ Aasii agliraksraiqł̣uta God-im iġñiġiniġmatigut, ilaan tiliŋagaa Ilitqusiġiksuaŋa Iġñiġmi iḷuptiŋnun, iḷitchuġipkairuaq uvaptiŋnik God iḷumun nanmiñiq aapagitilaaŋanik.

⁷ Tavraasii, God-im iġñiġiliutiŋagaasi suli kiŋuvaannaktuksraġuqłusi, aasii kivgatun inŋaiŋarusi.

Paul Piŋigigai Galatia-ġmiut

⁸ Taimani iḷitchuġiŋaiñŋavsi God-mik, kivgauŋagaluaqtusi isummatigikkavsiññun god-aunasugalugich.

⁹ Aglaan paŋmapak iḷitchuġiŋagiksi God, naaggałhaaq God-im iḷitchuġiŋagaasi, summan aasii utiġukpisi aŋalatiqavsaaġniġmun pitquranik, iñugruiññaiḷḷu piḷġusiŋiññun nakuurualiqinikun, annaurriyumiñaitchuanun ilivsiññik?

¹⁰ Summan iviġagniatakpisiuŋ God piqutiqaqłusi ilaaguaqtanik niqinaqiviŋñik uvlunik, ilaaguaqtaniglu tatqiñik, suli ilaaguaqtanik niqinaqiviŋñik ukiuniglu.

¹¹ Anayasuktuŋa siġġaqutiginasugalusi asiñun.

¹² Aniqatiit, piviuttaġivlusi apiġigivsi, isummatiqaġitchiḷi uvaptun tamatkunuuna uqautipkun ilivsiññun, qanuq iḷiŋaruŋali ilivsisun, Jew-guŋitchuatun, atanġiqsitauvluŋa Jew-guruat pitquraŋiññiñ. Pimaqłuŋaitkivsiŋa

¹³ sivulliġmi alġaqsruiqqaaqama tusaayugaaġiksuanik Christ-kun ilivsiññun. Ullaŋagivsi pisigivlugu timimi qilluusiqsauŋaniġa.

¹⁴ Aasii qilluutituġniġa iviġaumanaitkaluaqtillugu ilivsiññun, naġġugiŋaitkivsiŋa, kipagiluŋalu suuŋiḷaġiluŋalu piŋaitkivsiŋa, aglaan paġlaŋagivsiŋa quyavlusi, isaġuliktun-unnii iḷivḷuŋa, naaggaunnii Christ Jesus-tun.

¹⁵ Taimani qanutun quviasuktigiŋarusi. Iḷisimaruŋa quviasukkayaqtusiunnii ilivsiññun iraiġuvsi aasii iriliutilugik uvamnun, tainna piñaġumiñaqpan.

¹⁶ Paŋmapak-aasii uqautikavsi iḷumun ittuamik, isumavisi akiḷḷiḷiutinasugaluŋa ilivsiññun?

¹⁷ Tamatkua iḷumun inŋitchuanik iḷisaurrich iviġaumagiliqsinniataktut ilivsiññun, aglaan sivuniqaŋitchut nakuuruamik, qanuq niguqtinniaqsaagaasi uvamniñ, isummatigilluatallasitquvlutiŋ ilivsiññun.

¹⁸ Nakuugaluaġmiuq isummatigilluataġaiññi piḷḷuatautauruakun ataramik, nayuŋiḷḷuġivsiunnii.

¹⁹ Uvaŋa miqłiqtuuratkaa. Isumaaluutigipiallakkivsi. Ilauvaŋa aakauruaq kiiqsiuliqsuaq aulayyautimmani, qanutupayauraq kipiġniuqłuŋa Christ irrusia naamasitquyumavlugu iḷuvsiññi.

²⁰ Qanutun nayuqtigiyumapiaġaluaġivsi aasii allauruakun aulataġilusi. Qanuqsausiipiallaktuŋa ikayuutauniksrapkun ilivsiññun taavrumani nalautavsiññi.

Uuktuun Hagar-kullu Sarah-kullu

²¹ Ilivsi ukpiqtuat isumaruasii annaurrauniaġnivḷusi kamaksriḷusi Jew-guruat pitquraŋiññik, naalaġnisitchi, uqaluusiavsiññik pitquratigun.

²² Bible-ni aglausimaruq Abraham malġugnik iġñiqaġnivḷugu, igḷua kivgauruakun aġnakun, aasii igḷua nuliaŋagun atanniqsimaraitchuakun.

²³ Kivgauruam iġñiŋa aniŋaruq piḷġusikaatun, aglaan nuliaŋata iġñiŋa aniŋaruq kisianik God-im unniqsuqłiisigianigmagu aniñiagnivḷugu.

²⁴ Taapkuŋniŋa uuktuutiqaqta. Taapkuak aġnak malġuk ittuk God-im malġuktun sivunniuġutiktun iñuŋmiñun. Sivunniuġutaata igḷua iñuŋmiñun piŋaruq iġġimi Sinai-mi, God-im aitchuġmagich qulinik pitquranik. Taamna arriqaqtuq Hagar-mik, kivgauruamik, iñuŋniglu iñuulluataġniugaqtuanik pitquranik pisaqutiqaqłutiŋ, aasii ittut kivgam miqłiqtuŋisun.

²⁵ Tavra Hagar iġġisun Sinai-tun ittuq, Arabia-mi ittuami, suli arrilisauyumiñaqtuq iniqpaktun Jerusalem-tun, qanuq Jew-guruat tavrani aŋalatiqaqtut pitquranik, aitchuutauŋaruanik Moses-kun Sinai-mi. Kivgatun ittut.

²⁶ Aglaalli uvagut aimaaġvikput Jerusalem-tun ittuq paŋmaniittuaq, qiḷak. Taamna-suli aakagimmatun itkikput iluqata ukpiqtuaguut Christ-mun, atanġiqsitauŋaruaguut, kivgauŋaiqł̣uta pitquranun.

²⁷ Taamna aglausimaruq Bible-ni inna. “Quviasugiñ aġnaaq miqłiqsiḷaitchuatiin. Saqłagiñ quviasuunmik miqłiqtuiḷḷuqtutinunnii, qanuq miqłiqtuukkaqsił̣haaġniaqtutin kivgauruamiñ aġnamiñ.”

²⁸ Aniqatiit, Isaac-tun ittugut. Isaac aniŋammatun nalaułługu God-im unniqsuqłiisaa Abraham-mun, uvaguttauq God-im miqłiqtuġimmigaatigut, unniqsuqłiisiaqaqłuta iñuggunmik isuitchuamik.

²⁹ Aasii uvagut iñuupkaqtitauruaguut Ilitqusiġiksuakun nagliksaaqtitkaatigut tamatkua iñuich iñuutquriruat uvaptiŋnik Jew-guruat pitquraŋisigun, tainnatuttauq Isaac aniŋaruaq God-im unniqsuqłiisaatun, nagliksaaqtinŋammatun aapiyaksraŋata kivgauruam iġñiŋan.

³⁰ Taavrumuuna inna aglausimaruq Bible-ni. God-im uqallautiŋagaa Abraham, “Anirruŋ kivgaq iġñiŋalu, qanuq kivgauruam iġñiŋa iḷaŋiutiniaŋitchuq kiŋuvaannaktaaksraunmun piqatigilugu atanġitchuam aġnam iġñiŋa.”

³¹ Tavra aniqatiit, taavrumaŋŋa uuktuunmiñ iḷitchiyumiñaqtusi uvagut inŋisilaaptiŋnik kivgauruam miqłiqtuŋisun, aglaan ittugut miqłiqtuŋisun atanġitchuam aġnam.