Galatians 3 - Iñupiatun Mumiksat Uqalugiksuat

Pitqurat Naagga Ukpiġun

¹ Ilivsi isumalaaŋitchuasii Galatians, kia alapititpasi? Uqaluuruat kikiaktuurrauniŋagun Jesus Christ nalunaipiaqługich alġaqsruutauŋagaluaqtut ilivsiññun.

² Apiġilavsi uumiŋa. Aitchuusiaġiŋavisiuŋ Ilitqusiġiksuaq pitquranik kamaksriñiqsi pisigivlugu, naagga ukpiliġñiqsi tusaayugaaġiksuanik alġaqsruutauŋaruanik ilivsiññun?

³ Nalupqinaitchuamik isumalaaŋisigiyumiñaitchusi, isumallasiḷusi iñuk aitchuusiaqaŋaruq isuitchuamik iñuggunmik Ilitqusiġiksuamiñ, nakuułhaaġluni ukpiqtuaguyumiñaġniḷugu iñuuluni pitquratigun.

⁴ Nalupqinaitchuamik, iluqaġmiŋ nagliksaaqtirrusiasi piuŋiḷauŋaitchut.

⁵ God-im iñuupkaŋagaa Ilitqusiġiksuaq iḷuvsiññi, aasii aliuġnaqtuat savaaġipkaqługich akunnavsiññi, qanuq ukpiġiŋagiksi alġaqsruutauruaq ilivsiññun, pisigiŋaiqł̣ugu iñuuniatagniqsi nalaunŋaruakun sivuġaani God-im kamaksriñikun pitquranik.

⁶ Bible-niñ iḷitchumiñaġikput taamna qanuq aglausimaruq inna, “Abraham ukpiġiŋagaa God, aasii taamna pisigivlugu God-im akuqtuŋagaa ilaa nalaunŋarualivḷugu.”

⁷ Taavrumuuna kaŋiqsiyumiñaqtusi, iñuich ukpiqtuat Abraham ukpiġusiatun, nanmiñiq miqłiqtuġimmatun itkai, kiŋuniġipiaŋitkaluaŋŋaisa.

⁸ Aasiisuli piŋaisaktaŋŋaan, Bible satqummiŋagaat God-mun akuqtuġumaaġnivḷugich Jew-guŋitchuat nalaunŋarualiḷugich pisigilugu ukpiġutaat, qanuq God-im uqautiŋagaa Abraham tusaayugaaġiksuanik uqallautikamiuŋ, “Quviasuutiqaqtinniaġitka nunapayaani ukpiliqsuat uvamnun iliktuttauq ukpiqpata.”

⁹ Tavra iñuich ukpiliqsuat Abraham-tun quviasaaġusiaqaġmiut piqatigivlugu Abraham ukpiŋaruaq.

¹⁰ Iluqaġmiŋ iñuich akuqtullasipkaġniaqsaaruat nalaunŋarualiḷutiŋ sivuġaani God-im kamagilugich pitquraŋi pasiñaqtut, aasii tuqulutiŋ, qanuq aglausimaruq Bible-ni inna, “Pasirauruq nalliummatiruġlu tuqqunmun kiñaliqaa iñuutuiññaŋitchuaq kamagilugich iluqapayauraŋisa aglausimaruat pitqurat.”

¹¹ Paŋmapak nalupqinaiqsuq iñupayaaq nalaunŋasiyumiñaisilaaŋanik sivuġaani God-im kamaginiḷugich pitqurat, qanuq aglausimaruq Bible-ni inna, “Iñuk ukpiġunmigun nalaunŋasirauruaq iñuuniaqtuq.”

¹² Akiḷḷiali taavruma uqaluum, iñuk iñuuruaq pitquratigun ukpiġutituaksraitchuq, qanuq Bible-ni aglausimaruq inna, “Iñuk iñuuniaqtuq kisianik kamagituiññaġlugich iluqaisa pitqurat, suuramikunnii kipuqłasuŋaġnagich.”

¹³ Uvagut pasiraugaluaqtilluta tuquruksrauvluta kamagilaił̣ł̣ugich God-im pitquraŋi, Christ tasuŋagaatigut pivḷugu ilaan uvagut tatavsausiaksraqput, qanuq Bible-ni aglausimaruq inna, “Pasirauruq tuquruksrauruġlu iñupayaaq kikiaktuurrauruaq napaaqtumun.”

¹⁴ Aasii taamna Christ Jesus pimmagu Jew-guŋitchuat annaurrauyumiñaqsirut ukpiġutikun Abraham-tun, aasiisuli ukpiġutikun aitchuusiaqallasivḷuta Ilitqusiġiksuamik unniqsuqłiisauŋaruamik.

Pitqurallu Unniqsuqłiiḷḷu

¹⁵ Aniqatiit, uvva uuktuutauyumiñaqtuaq iñuŋniŋŋaqtaq. Iñuk unniqsuqłiimman aglautivlugu suli nalupqinaiyausiqł̣ugu atchiivigivlugu, kialiqaa asivaġumiñaitkaa naagga allaŋŋuġumiñaitkaalu taamna unniqsuqłiiñ.

¹⁶ Tavra God-im unniqsuqłiisigiŋagaa quviasaaġusiaq Abraham-mun kiŋuniŋanullu. Una nalunaigilugu. Unniqsuqłiiñ quviasaaġusiakun unniqsuqłiisauŋaitchuq iñugiaktuanun kiŋuniġiiñun, aglaan atausisualuŋmun kiŋunġuruamun, aasii taamna kiŋunġuruaq Christ-guruq.

¹⁷ Uvva sivuniġikkaġa. God-im pitquraŋi aitchuutauŋarut 430 ukiut pianiŋmata nalupqinaiyausianiqqaaqtillugu ilaan unniqsuqłiisaa Abraham-mun. Taamna tainnainman, God-im unniqsuqłiisaa Abraham-mun nalupqinaiyausiŋaqqaaqtillugu asivaqtauyumiñaiñŋaruq, iñuuptauq unniqsuqłiisaa nalupqinaiyausiŋaruaq asivaġumiñaiñmatun.

¹⁸ Qanuq unniqsuqłiisauruaq quviasaaġusiaksraq annaun aitchuusiagullakpan kamaksriñiq pitquranik pisigilugu, aitchuusiaġinaġumiñai ŋaruq unniqsuqłiisikun. Aglaatkii God-im aitchuutigiŋagaa Abraham-mun unniqsuqłiisikun.

¹⁹ Tamatkua tainnainniġmata, summan pitqurat aitchuutauŋavat? Pitqurat iḷḷatauŋarut aquagun unniqsuqłiiñ aitchuutauganiŋman iḷitchuġipkaqsaqługich iñuich piḷuun kamaksriŋiññiġutilaaŋanik God-im pitquraŋiñik, aasii God sivunniŋaruq iñuich iñuuruksrauvlugich sutigun satqummikkaġmigun Moses-kun qaiñiŋanun aglaan Christ, miqłiqtum unniqsuqłiisiaqaŋaruam. Pitqurat aitchuutauŋarut isaġuliktigun, iñukullu pirriruakun Moses-kun.

²⁰ Pisinniŋniq iñuŋnik piraksraġuġman, taamna sivuniqaqtuq iññuk malġuk atilutik uqaqtuksrauvlugik unniqsuqłiisikun. Aglaalli God-im unniqsuqłiikamiuŋ Abraham annaunmik, pirituŋaitchuq, inmiñik kisimi piŋagaa.

Sivuniŋat Pitqurat

²¹ Taamna tainnainman, pitqurat paaqsaaŋavat God-im unniqsuqłiisiŋiñun? Naaggapiaġataq. Qanuq pitqurat aitchuutauŋakpata taimuŋa iñuullasiḷḷalugich iñuich, nalaunŋasiraunaġayaqtuq sivuġaani God-im pitquratigun.

²² Aglaan uvva, uqallautiŋagaatigut Bible-ni iñupayaurat piḷuksiŋanivḷugich qanuq kamagilaił̣ł̣ugich God-im pitquraŋi. Paŋmapak-aasii tamatkua ukpiqtuat Jesus Christ-mun aitchuusiaqaqtut unniqsuqłiisauŋaruamik iñuggunmik isuitchuamik.

²³ Christ qaiŋaiñŋaan isiqtaġimmatun piŋagaatigut satqummiqsauvlutiŋ pitqurat aitchuutauruat Moses-kun. Taapkua pitqurat qaunaksrimmatun piŋarut uvaptiŋnik Christ satqummiġñiŋanunaglaan, annaurrauyumiñaqsiḷġataqtilluta ilaagun.

²⁴ Qaunaksri munaqsrimmatun miqłiqtunik ataniġnaqutiqaqłuni kamaksripkallavlugich iñuguġataqtillugich, tainnatulli pitqurat qaunagiŋagaatigut Christ qaiñiŋanunaglaan, nalaunŋasipkaqtaullasiḷġataġluta ukpiġluta Christ-mun.

²⁵ Aasii paŋmapak ukpiġumiñaqsikapta Christ-mun munaqsrituŋaiqsugut pitquranik.

²⁶ Qanuq atausiŋŋuqatigikavsiuŋ Christ Jesus ukpiġutikun, iluqasi aglianiŋarusi iġñiŋi God-im.

²⁷ Iluqasi atausiŋŋuqatauŋaruasii Christ-mun, paptaiqsauŋavlusi, ilaatun iḷiŋarusi.

²⁸ Tavra iluqasi atausiŋŋuqatauŋaruasii Christ Jesus-mun, atirusi iluqasi. Allagiiŋitchut Jew-guruallu Greek-giḷḷu, kivgallu kivgauŋitchuallu, aŋutillu aġnallu, iluqaġmiŋ atirut.

²⁹ Tavraasii pigimmasi Christ, Abraham kiŋuniġigaasi, suli ilaan kiŋuvaannaktigigaasi, kiŋuvaannaktaaġilugu unniqsuqłiisiaŋa.