Galatians 2 - Iñupiatun Mumiksat Uqalugiksuat

Paul-lu Allallu Tilirat

¹ Tavra akimiaġuutaiḷat ukiut pianiŋmata, aullatqiŋaruŋa Jerusalem-mun piqatigivlugu Barnabas, Titus piqatigivluguptauq.

² Aullaŋaruŋa qanuq God-im aullaquŋagaaŋa, aasii sivuniqsipkaġniaŋagiga taapkunuŋa aŋaiyyuliqiruani sivulliuqtauruanun, tusaayugaaġiksuaq alġaqsruutigikkaġa Jew-guŋitchuanun. Uqaqatigiŋagitka iñuił̣aami sivulliuqtauruat, iḷaanni savaurriñiġa God-mik anniqsuutauniaŋiññasugalugu.

³ Titus unnii, Jew-guŋitchuaq piqatigikkaġa Jerusalem-mi, nalunaiñŋutchigaksraiñŋaruq Jew-guruatun, piḷaktauluni timimigun.

⁴ Piḷaktugaksrauniḷuguunnii, isumman nivliusiġinaġayaitchuq unnii tamatkua iḷumutun ukpiqtuaguŋitchuat nalunaqtuakun qaġġirauŋaitpata aŋaiyyuliqiruanun, suiḷaurivḷutiŋ piqasiutiruat kasimaniptiŋnun nalunautchiḷutiŋ iḷitchuġisuktuat atanġirrutiptiŋnik Jew-guruat pitquraŋiññiñ, ukpiliqaptaqaŋa Christ-mun. Tamatkua iḷumutun ukpiqtuaguŋitchuat ukpiqtinniaqsaapiaġaluaġaatigut ukpiqtuaguruat iñuuruksraunivḷugich kamagilugich Jew-guruat pitquraŋich.

⁵ Aglaan aŋiġuraŋitchugut unnii pipkaġniapiakkaŋannun, iñuuyumiñaquvlusi tuvraġlugu iḷumun tusaayugaaġiksuaq.

⁶ Aasiivsauq taapkua iḷisimanaqsiŋaruat sivulliuqtautilaaŋat aŋaiyyuliqiruanun, sumik iḷḷatiksraiñŋarut tusaayugaaġiksuamun alġaqsruutigikkamnun. Uvamnun taapkua sivulliuqtit inmiut allatun iñuktitun, God atiruq iñupayaanun.

⁷ Aglaalli iḷagaluaġnagu tusaayugaaġiksuaq alġaqsruutigikkaġa, sivulliuqtauruat puttuqsriŋarut piksraqtaaguŋatilaamnik alġaqsruutigitquvlugu tusaayugaaġiksuaq Jew-guŋitchuanun, Peter-tun piksraqtaaġuŋaruatun alġaqsruitquvlugu tusaayugaaġiksuamik Jew-guruanun,

⁸ qanuq God-im annaurriŋaruam iñugiaktuanik Jew-guruanik Peter alġaqsruimman, annautiŋammigaivsauq iñugiaktuat Jew-guŋitchuat uvaŋa alġaqsruiñipkun.

⁹ Tavra James-lu Cephas-lu John-lu suaŋavlutiŋ sivulliuqtauniqsuat, puttuqsrikamiŋ God-im nagliktuutiqpaŋanik uvamnun, aitchuqłuŋa taavrumiŋa savaamik, iḷisimanaqsiŋagaat ikayuqtigiiksilaaptiŋnik iḷalivḷunuk, uvaŋalu Barnabas-lu, atisivḷutiŋ alġaqsruitquvlunuk kiikaa Jew-guŋitchuanun, iliŋiḷḷi alġaqsruiñiaġnivḷutik-suli Jew-guruanun.

¹⁰ Aglaatualuk itqaumatqugaatiguk iḷiappauruanik, taamnapiaġataq piyumalaaġmiraġa.

Paul Natqiksruġaa Peter Antioch-mi

¹¹ Qakugumman, Cephas Antioch-muŋman, paaqłakkiga takkuanun, qanuq killukuaŋaruq.

¹² Aasiuvva inna Peter killukuaŋaruq. Iḷaŋich avilaitqatiŋi James tikiñ ŋaiñŋaisa, Peter niġiqatausuuŋaruq Jew-guŋitchuanun, kipuqłakługich Jew-guruat pitquraŋich. Aasii tikiñmata, iñuurraqsivḷuni pitquraŋisigun Jew-guruat, niġiqatigillaiqł̣ugich ukpiqtuat Jew-guŋitchuat, sivuuġagivlugu qanuq uqausiksraŋat Jew-guruat.

¹³ Allattauq Jew-guruat maliksuŋagaat Peter, iḷisimanaqsivḷugu tuniqsimapiaŋisilaaqtiŋ iḷumun ittuamun iḷitchuġikkaġmiŋnun. Barnabasunnii niġiqataullaiŋaruq Jew-guŋitchuanun.

¹⁴ Iḷitchuġikapkich iñuuvigiŋiññiġmarruŋ iḷumun ittuaŋa tusaayugaaġiksuam, uqallautiŋagiga Peter iluqaġmiŋ takkuanni inna. Ilivich, Jew-guruatiin, iñuullaniġuvich Jew-guŋitchuatun, summan Jew-guŋitchuat iñuupkaġniaqsaapiaqpigich Jew-guruatun?

Jew-guruallu Jew-guŋitchuallu Annaurraurut Ukpiġutikun

¹⁵ Uvagut, aniŋaruaguut Jew-guvluta, Jew-guŋitchuat taisuukkavut piḷuusiqirinik,

¹⁶ uvagut Jew-guruaguut, iḷisimarugut God-im akuqtulaitkaa iñuk nalaunŋarualiḷugu sivuqqamiñi pisigilugu kamaksriñiataŋniŋa ilaan pitquramiñik qaisauruanik Moses-kun. God-im akuqtuġuugaa iñuk nalaunŋarualivḷugu ukpiliġman Jesus Christ-mun. Taamna iḷitchuġikaptigu, ukpiliŋarugut Christ Jesus-mun, God-mun akuqtullasitquvluta pisigilugu ukpiliġñiqput Christ-mun, kamaksriñiatagniŋiḷaakun pitquranik, qanuq kiñaliqaa nalaunŋasirauyumiñaitchuq sivuġaani God-im kamagigiññaġlugich ilaan pitquraŋi.

¹⁷ Isummatigilakput una. Uvagut nalaunŋasiñiallapta ukpiġutikun Christ-mun, iḷitchuġiraugupta piḷuusiqirauluta, taamna sivuniqaġniaqpa Christ-mun piḷuksipkaġniḷuta? Naaggapiaġataq.

¹⁸ Qanuq uvaŋa, iñuuniarraqsitqikkuma kamaksriñikun pitquranik nalaunŋasiñiatagluŋa, ukpilianiŋaqqaaġluŋa Christ-mun, iḷisimanaqsiruŋa piḷuusiqirautilaamnik,

¹⁹ qanuq kamagiłhaiññalgunaitchut pitqurapayaurat. Pitqurat pasiññiksiññaqtut. Tavraasii pitqurat tuqunmatun pigaanŋa kamaginiḷukkaluaqtillutiŋ uvamnun. Paŋmapak iñuuruŋa God-im iñuutqutaagun uvamnun.

²⁰ Tuquruatun pitquranun piuŋa, qanuq Christ kikiaktuurraumman kikiaktuurrauqatauruatun piŋaruŋa. Nalaunŋaruakun iñuuniaġusiġa pitquratiguaqtuaq tuqummatun piŋaruq. Paŋmapak iñuuniataŋaiq suŋa uvaŋaġruiññaq nalaunŋasiñiatagluŋa savaapkun, aglaan Christ iñuuruam uvamni iñuupkaġaaŋa nalaunŋaruakun sivuġaani God-im. Aasii paŋmapak iñuuruŋa-suli nunami ukpiġivlugu Iġñiŋa God-im, piviuttaqaqtuaq uvamnik, suli tuquŋaruaq uvaŋa pisivluŋa.

²¹ Ukpiġivlugu taamna, God nagliktuutiqpaŋa anniqsuutauŋaiŋitkiga, qanuq iñuk nalaunŋasiḷḷakpan sivuġaani God-im kamagigiññaġlugich pitqurat, Christ asiñun tuquŋaniqsuq.