Galatians 1 - Iñupiatun Mumiksat Uqalugiksuat

¹ Ukua tuyuutit qairut Paul-miñ God-im tiliraŋaniñ. Iñuum kialiqaa piksraqtaaġiŋaitkaaŋa alġaqsruirautquluŋa aglaan Jesus Christ, God-ivlu Aapam aŋipkaiŋaruam ilaanik tuqqunmiñ.

² Suli ukua tuyuutit qairut iluqaiññiñ aniqatiniñ nayuqtigikkamniñ, aasii tuyuutauvlutiŋ iluqaiññun aŋaiyyuliqiruanun Galatia-mi.

³ Nagliktuusiaqpaqaġitchi tutqiunmiglu God-miñ Aapamiñ Ataniptiŋniḷḷu Jesus Christ-miñ.

⁴ Christ tuquŋaruq aŋarraurami piiġukługich piḷuutivut, annaurrautquvluta iñuutchimiñ piḷuktuami iñuuniġmiñ nunam iñuŋisun. Christ taamna piŋagaa pisuutigimmagu God-im Aapapta,

⁵ iñuich nanġagaksraġikkaŋata isuitchuamun. Amen.

Tusaayugaaġiksuat Atautchiigurut

⁶ Niġiiḷḷaġivsiŋa suksraġiŋaiġñiaqsautigillaan piñiqavsiuŋ God. Ilaan ququaŋagaasi piqatautquvlusi iñuggunmi isuitchuami Christ-kun, aasiuvva paŋmapak saarraqsirusi allauruakun tusaayugaaġiksuamun.

⁷ Allamik tusaayugaaġiksuamik piitkaluaġmiuq aglaan iñuich iḷaŋisa alapitinniaqsaagaasi, allaŋŋuqtiġniaqsaavlugu tusaayugaaġiksuaq Christ-kun.

⁸ Aglaan uvagut-unnii, naagga isaġulik qiḷaŋmiñ alġaqsruisaġniqpan ilivsiññun tusaayugaaġiksuamik paaqsaaŋaruamik alġaqsruutigiŋakkaptiŋniñ ilivsiññun, ilaa qaisauli suksraunġiqsauniksramun.

⁹ Uqallautitqikkivsi. Kiñaliqaa alġaqsruikpan ilivsiññun tusaayugaaġiksuamik paaqsaaŋaruamik taavrumaŋŋa akuqtuŋakkavsiññiñ, ilaa qaisauli suksraunġiqsauniksramun.

¹⁰ Alġaqsruutigikapku tusaayugaaġiksuaq, alġaqsruiḷaitchuŋa iviġagniaqsiññaġlugich iñuich. Pisuqtilaaptun iviġagniḷukkiga God. Alġaqsruiñiġuma iviġagniaqsiññaġlugich iñuich, kivgaunayaitchuŋa Christ-mun.

Qanuqłuni Paul Tiliraġuqtilaaŋa

¹¹ Aniqatiit, iḷisimatqugivsi. Tamanna tusaayugaaġiksuaq alġaqsruutigikkaġa iñuŋniñ piŋitchuq,

¹² qanuq aitchuusiaġiŋitkiga iñuŋmiñ, naagga iḷisausiaġiŋitkiga, aglaan Jesus Christ satqummiŋagaa uvamnun.

¹³ Tusaaŋagiksi qanusiuŋatilaaġa iñuk iñuuŋŋaġma Jew-guruatun, annagniaqsaaruatun kamagivlugich pitqurat. Tusaaŋammiusi qanutun anayaktuaŋił̣ł̣ugich nagliksaaqtinnapkich aŋaiyyuliqiruat God-mun, iluqaisa suksraunġiġñiaqsaakapkich.

¹⁴ Kipiġniupiaġataŋaruŋa iñuusukłuŋa tuvraġlugich iḷisaurrutiŋich maŋŋuupta, aasii qaukłiġuutivluŋa qaaŋiqł̣ugich ukiuqtutilaaqatitka iñuuniġmi Jew-guruatun.

¹⁵ Aglaalli God sivuniqaŋaniqsuq aniŋaiñŋaġmaunnii ilaan alġaqsruirigisukłuŋa. Aasii aquvatigun, nagliktuutinikpakami uvamnun,

¹⁶ satqummiŋagaa Iġñini uvamnun, alġaqsruutiqaġumiñaqsivḷuŋa Christ-mik Jew-guŋitchuanun. Taimaniasii uqaqatiqaŋaitchuŋa kimigliqaa iñuŋmik,

¹⁷ naaggaunnii Jerusalem-muŋaitchuŋa uqaqatigiyaqtuġlugich God-mun tilirauvlutiŋ alġaqsruiriġuŋaruanun sivumni, aglaan aullaŋaruŋa nunamun Arabia-mun, aasii aquvatigun utiqłuŋa iniqpaŋanun Damascus.

¹⁸ Aasii ukiut piŋasut pianiŋmata, aullaŋaruŋa Jerusalem-mun takuvlugu Cephas, aasii itqatigivlugu akimiani uvluni.

¹⁹ Aglaan tautuŋiñmigitka nalliat-unnii allat tiliraunikun alġaqsruirit aglaan James, Atanġum aniqataa.

²⁰ Tuyuutigikkamni ilivsiññun, sivuġaani God-im sagluŋitchuŋa.

²¹ Tavraŋŋa aullaŋaruŋa nunaŋiñun Syria-m Cilicia-vlu.

²² Aasii tamauŋanun aglaan aŋaiyyuliqiruaŋisa Christ Judea-mi tautuŋaitkaanŋa.

²³ Tusaqsraġigiññaŋagaat iñuich uqautaat, Taimña qaŋauvlugu nagliksaaqtitchiruaq uvaptiŋnik suksraunġiġñiaqsaavlugu ukpiġikkaŋat paŋmapak alġaqsruiruq iñuich ukpiquvlugich Christ-mun.

²⁴ Aasii pisigivluŋa ilaisa God nanġaŋagaat.