Exodus 9 - Iñupiatun Mumiksat Uqalugiksuat

Niġrutit Tuquġaġmata

¹ Ataniq uqallaktuq Moses-mun, “Pharaoh-muglutin uqallautisaqtuġuŋ Atanġum, God-auruam Hebrew-guruanun, uqaluanik, ‘Aullaqtitkich iñugiratka, nanġautiqaġumaut uvamnun.

² Aullaqtitchuŋiḷġatalgitkupkich,

³ tatavsaġniaġikpiñ argagma suaŋŋataagun naŋirrutiqpaniktillugich niġrutipayaatin—tuttuqpagnun, kakaktinun, pikukturuanun, pamiqsaanun, imnaiñun, suli nagrulignun.

⁴ Aglaan nalunaiġñiaġiga allagiiktilaaŋiññik niġrutiŋich Israel-gum kiŋuvaaŋich Egypt-miuniñ, atausiuraq-unnii niġrutiŋat Israel-gum kiŋuvaaŋich tuquniaŋitchuq.

⁵ Uvaŋa Atanġuruaŋa, inillagniaġiga uvlaakukpan tuquġaġviksraŋat niġrutit.’”

⁶ Uvlaakumman Ataniq savaktuq uqallausimisun, aasii iluqaġmiŋ niġrutiŋich Egypt-miut tuquġaaŋarut, aglaan atausiuraq unnii niġrutaat Israel-gum kiŋuvaaŋich tuquŋaitchuq.

⁷ Pharaoh-m tiligaich iñuni qimilġuyyaquvlugich aasii uqallautigaat nalliat unnii niġrutiŋisa Israel-gum kiŋuvaaŋich tuquŋiññivḷugich. Aglaan uqayunaiḷgitchuq, aullaqtinŋiḷgitkaich iñuich.

Ayuat

⁸ Tavraasii Ataniq uqallaktuq Moses-mullu Aaron-mullu, “Tigusisaqtusik aġranik igniġvikpagmiñ; Moses-gum miḷuqsautigisigaich siḷamun sivuġaani Pharaoh-m.

⁹ Siaminniaqtut iraġukisuuratun avyutun qulaagun iluqaan nunaŋata Egypt, aasii sumipayauraq ayuaqtuliġñiaqtut iñuiḷḷu niġrutillu kiḷḷiġsrualiqsuġlutiŋ aŋmaruanik.”

¹⁰ Tavra aġraksraŋaruk aasii makiłłutiŋ sivuġaanun Pharaoh-m; Moses-gum naluksautiŋagaich siḷamun, aasii ayuaġuŋarut aŋmavlutiŋ kiḷḷiġruaġuqłutiŋ iñugniḷu niġrutiniḷu.

¹¹ Aŋatkurguuq sivuġaanukkumiñaiñŋarut Moses-gum, qanukkii matuŋavlutiŋ ayuanik, Egypt-gum iñupayauraŋisun.

¹² Aglaan Atanġum uqayunaiqsinniġaa Pharaoh, Atanġum uqallausiatun, Pharoah-m naalaġnisuŋiñŋagaik Moses-lu Aaron-lu.

Natatquġnat

¹³ Ataniq tavra uqallaktuq Moses-mun, “Uvlaaku uvlaatchaurami kasuġumagiñ Pharaoh aasii uqallautilugu, Ataniq God-auruaq Hebrew-guruanun uqallagniḷugu inna, ‘Aullaqtitkich iñugiratka, nanġaġumagaanŋa.

¹⁴ Taaptumani iḷuirrutiqpaich tatavsautiginiaġitka atanaurałhiñaŋiḷaatin iñutin suli, aglaan tatavsaġniaġmigikpiñ ilvich, iḷisimayumautin allamik piqaŋisilaaŋanik uvaptun ittuamik nunapayaami.

¹⁵ Argaga isaaġutilugu anauŋagupkiñ iñugiratillu naŋirrutinik, tamatkiġḷusi suksraunġiqsauŋanayaqtusi.

¹⁶ Aglaan iñuupkaġivsi iḷitchuġitquvługich iñupayaat suaŋŋatimnik suli Atiġa siamitautquvlugu iluqaani nunami.

¹⁷ Naaggasuliuvva sivunmuurutin arguaŋavlutin aullaqtitchuŋitkapkich iñugiratka.

¹⁸ Innaiḷikpauŋ uvlaaku natatquġnaqtinniaġiga atqunaġlugu, Egypt-gum qaŋaunnii iḷisimaŋaisaŋanik.

¹⁹ Piraksriigguiñ pamiqsaasi suli sunapayaaq siḷami asiñiittuaq anayanaitchuamuqulugich. Natatquġnat katagniaqtut iñugnullu niġrutinullu aniiqsuanun uqqisimaŋitchuanun, aasii iluqaġmiŋ tuquniaqtut.’”

²⁰ Iḷaŋich Pharaoh-m atanauraŋich iqsiḷiŋarut pisigivlugu Atanġum uqallautaa, tainnamik kivgatiglu niġrutitiglu qilamik isiqtitaŋagaich.

²¹ Allat aglaan suqutigiŋiñŋagaat Atanġum kiliktuutaa aasii kivgatiŋ suli niġrutitiŋ siḷamiitiłługich.

²² Tavraasii Ataniq uqallaktuq Moses-mun, “Isaaġuttuuŋ argaiñ tuŋaanun qiḷaum, aasii natatquġnat katagniaqtut iluqaanun iñugnun, niġrutinun, suli naupayaaqtuanun Egypt-nunaŋani.”

²³ Tavra Moses-gum isaaġutiŋagaa ayauppiani tuŋaanun qiḷaum, aasii Atanġum kallulapkaŋagaa suli natatquġnat katagaaŋarut, igniġuuqpatitaŋaruq nunamuaglaan.

²⁴ Natatqut kataŋarut atqunaq, suli igniġuuqpatitaqłuni qaŋaunnii tautuŋaisaŋatun Egypt-mi.

²⁵ Iluqaan Egypt naasaaqługu natatquġnat kataŋarut supayauranun aniiqsuanun, iñupayauranullu niġrutipayauranullu. Maqułługisuli iluqaisa nauruapayaat nunaniittuat suli navguqługich iluqaisa napaaqtut.

²⁶ Nunaŋa Goshen, Israel-gum kiŋuvaaŋich iñuuniaġviat, kisimitualuk aksiaŋaitkaat natatquġnat.

²⁷ Pharaoh-m qaitquniġaik Moses-lu Aaron-lu aasii uqallakłuni, “Uvva tavrani piḷuusiqiŋaruŋa; Ataniq nalaunŋaruaguruq, iñutkalu uvaŋalu patchisaurugut.

²⁸ Aŋaiyyuiñ Ataniġmun! Kalluutiqpaanikkaatigut suli natatquġnanik! Unniqsuqłiiruŋa aullaqtinniaġivsi; maaniittuksrauŋaiqsusi.”

²⁹ Moses-gum uqallautigaa, “Anianipqauraġuma nunaaqqimiñ, isaaġutilugich argatka aŋaiyyuniaqtuŋa Ataniġmun. Kalluŋaiġñiaqtuq, suli natatquġnat kataŋaiġñiaqtut, iḷitchuġiyumautin nuna manna pigitilaaŋanik Ataniġmun.

³⁰ Aglaan uvva iḷisimaruŋa ilviḷḷu atanauraqpiḷḷu iqsigiŋitkiksisuli Ataniq God-auruaq.”

³¹ Natatquqpagman nauriat annuġaaliuġviksrat suli punniliuġutiksrat maquŋarut, uvvakii naulġataviksuat nalaułługich.

³² Aglaan allat palauvaksrat maqutauŋaiññiqsut nauganiŋaił̣ł̣utiŋ, aquvatigun nalautitchuuvlutiŋ.

³³ Moses-gum uniñŋagaa Pharaoh, anivḷuni nunaaqqimiñ, aasii isaaġutivlugik argagni aŋaiyyuvluni Ataniġmun. Kalluglu, natatquġnallu, sialukpaktuaġlu, iluqaġmiŋ nutqaŋarut.

³⁴ Pharaoh-m tautukkamiuŋ nalautittuaq piḷuusiqivsaalgitchuq. Ilaalu atanauraniḷu uqayunaiḷgitchut,

³⁵ tavraasi Pharaoh-m aullaqtitchuŋitkaich Israel-gum kiŋuvaaŋich Atanġum sivuani uqausiatun Moses-kuaqłuni.