Exodus 8 - Iñupiatun Mumiksat Uqalugiksuat

Naaġaayiich

¹ Tavraasii Ataniq uqallaktuq Moses-mun, “Ullaglugu Pharaoh uqallautisaqtuġuŋ Ataniq uqallagniḷugu, ‘Aullaqtitkich iñugiratka, nanġautiqaġumaut uvamnun.

² Pisuŋitkuvich, tatavsaġniaġivsi matulugu nunaksi naaġaayinik.

³ Nile siḷivitpaiḷḷuni naaġaayinik iniksraiġutilutik siḷivinniaġmigaich igluqpaktin, inauratin, siñigviktin, igluŋich atanauraqpich, igluŋiññullu iñukpich, iggavivsiññun, punniliuġvivsiñullu.

⁴ Naaġaayiich minŋiġniaqtut iliŋnun, iñugiraġnun, iluqaiññullu atanauraġnun.’”

⁵ Atanġum uqallautigaa Moses, “Uqallauttuuŋ Aaron ayauppiaŋa isaatqulugu qulaatigun kuugich, kuugauraliat, imaġaurallu, aasii naaġaayiich qaipkaġniaġitka matulġataġlugu nunaŋa Egypt.”

⁶ Tavraasii Aaron-gum isaaqsimaniġaa ayauppiani qulaatigun imapayaat, aasii naaġaayiich qaiñiqsut matulġataqługu nuna.

⁷ Aglaan aŋatkuŋich Pharaoh-m aŋatkuaqłutiŋ, qaipkaŋammigaich naaġaayiich nunamun.

⁸ Pharaoh-m ququaŋagaik Moses-lu Aaron-lu aasii uqallakłuni, “Aŋaiyyusitchik Ataniġmun piiqulugich makkua naaġaayiich, aasii aullaqtinniaġitka iñutin, aitchuiyumaut ikipkaiḷutik Ataniġmun.”

⁹ Moses-gum kiugaa, “Aŋaiyyutiyumiñaġikpiñ qanutun. Piviksramik nalunaiqsisiññaġutin qakugu aŋaiyyutitquguvich, atanauratillu, iñugiratillu. Tavra naaġaayiich iluqaġmiŋ piiġñiaqtut, kisiŋŋuġlugich Nile-miittuat.”

¹⁰ Pharaoh-m kiugaa, “Aŋaiyyutisaġiŋma uvlaaku.” Moses uqallaktuq, “Tainna piñiaqtuŋa apiqsrisiktun, aasii iḷitchuġiñiaqtutin allamik god-aisilaaŋanik Ataniqtun, God-iptitun ittuamik.

¹¹ Naaġaayiich uniññiaġaasi, iliŋniñ, atanauraġniñ, iñugniḷḷu, piiġḷutiŋ iluqapayauraġmiŋ kisiŋŋuġlugich Nile-miittuat.”

¹² Tavraasii Moses-guvlu Aaron-guvlu uniññiġaak Pharaoh, aasii Moses aŋaiyyuvluni Ataniġmun piiquvlugich naaġaayiich qaipkaŋaraŋich umialigmun.

¹³ Ataniq savaŋaruq Moses apiqsriaŋatun, aasii naaġaayiich igluniittuat, siḷalliġmiittuat, suli nunamiittuallu tuquŋarut.

¹⁴ Egypt-miut qaliġiiksinŋagaich tuquŋarat naaġaayiich qutchiksivḷugich, nuna tipaaqsiḷġataqługu.

¹⁵ Pharaoh-m tautukkamigich naaġaayiich tuqutilaaŋiññik, uqayunaitqigatalgitchuq, uqallausiatun Atanġum, Pharaoh-m naalaġnisuŋitkaik Moses-lu Aaron-lu.

Milugiatchiat

¹⁶ Atanġum uqallautigaa Moses, “Uqallauttuuŋ Aaron anautqulugu nuna ayauppiaŋanik, aasii nunapayauraŋani Egypt avyuq milugiatchiaġuġniaqtuq.”

¹⁷ Tavraasii Aaron-gum anauŋagaa nuna ayauppiamiñik, aasii iluqani avyuq Egypt-mi milugiatchiaġuŋaruq, matuvlugich iñuiḷḷu niġrutillu.

¹⁸ Pharaoh-m aŋatkuŋich niptaqtitchiñiatakkaluaġmiut milugiatchianik, niptaŋiḷḷaktut.

¹⁹ Pharaoh-m aŋatkuŋisa uqallautigaat umialik, “God-im taamna savaaŋa suaŋŋanmigun!” Aglaan Pharaoh uqayunaitchuq-suli, Atanġum uqallausiatun, Pharaoh naalaġnisuŋitchuq Moses-miglu Aaron-miglu.

Nuviuvaich

²⁰ Atanġum uqallautigaa Moses, “Uvlaatchaurami uvlaaku kasuġiaġumagiñ Pharaoh kuugmun ivvaġiaqpan, aasii uqallautilugu Ataniq uqallagniḷugu inna, ‘Aullaqtitkich iñutka, nanġautiqaġumaut uvamnun.

²¹ Kilikkikpiñ tainna pisuŋitkuvich, tatavsaġniaġikpiñ nuviuvagnik aullaqtitchiḷuŋa iliŋnun, atanauraġnun, iñugiraġnullu. Igluŋich Egypt-miut immiġñiaqtut nuviuvagnik, aasii suli nuna matuniaġaat.

²² Aglaan aksianiaŋitkiga nunaŋa Goshen, iñugiraġma iñuuniaġviat, nuviuvaitchumauq taamani. Tainna savagniaqtuŋa, iḷisimayumautin uvaŋa, Atanġuruaŋa, savaktilaamnik mattumani nunami.

²³ Nalunaiġñiaġiga aŋalatchiñiġa allagiiksilaaŋa iñugiramnun iñugiraġnullu. Taamna aliuġnaqtuaq uvlaaku nalautinniaqtuq.’”

²⁴ Ataniq aullaqtitchiŋaniqsuq iñugiapiaġataqtuanik nuviuvagnik Pharaoh-m igluqpaŋanun igluŋiññullu atanauraŋisa. Iluqani Egypt nunaŋa maqunŋagaat nuviuvaich.

²⁵ Tavraasii Pharaoh-m ququaqtitkaik Moses-lu Aaron-lu aasii uqallakłuni, “Ki, aitchuiyyaġitchi ikipkaiḷusi God-ivsiññun maani nunami.”

²⁶ Moses-gum kiugaa, “Taamna iłuaġiniaŋitkaat, qanuq uvva Egypt-miut isummaaġniaŋitkivut ikipkaigupta niġrutinik aitchuutigilugich Ataniġmun, God-iptinnun. Isummaaŋitkuptigich, Egypt-miut tuqunniaġaatigut miḷḷuuġluta uyaġagnik.

²⁷ Iglauruksraurugut piŋasuni uvluni nunagluktuamun aitchuiyyaġluta ikipkaiḷuta Ataniġmun, God-iptinnun, piraksriutaa uvaptinnun nalaullugu.”

²⁸ Pharaoh uqallaktuq, “Aullaqtinniaġivsi aitchuisaqtuġumausi ikipkaiḷusi Ataniġmun, God-ivsiññun, nunagluktuami, uŋasiksuamuŋitkuvsi. Aŋaiyyutisaġivsiñŋa.”

²⁹ Moses kiuruq, “Aullaanigluqqaaqtuŋa, aŋaiyyuniaqtuŋa Ataniġmun uvlaaku nuviuvaich aullaqulugich iliŋniñ, atanauraġniñ, iñugiraġniḷḷu. Aglaan pisaasuġmiatqigñasigut aullaqsaiḷiḷugiḷḷu iñuich aitchuiyyaqsaiḷiḷugich ikipkaiḷutik Ataniġmun.”

³⁰ Moses-gum unitkaa Pharaoh aasii aŋaiyyuvluni Ataniġmun,

³¹ aasii Ataniq savaŋaruq Moses-gum apiqsriaŋanik. Nuviuvaich piiŋarut Pharaoh-miñ, atanauraŋiññiñ, iñuŋiññiḷḷu; atausiuramik-unnii nuviuvaqaŋaitchuq.

³² Aglaan taavsrumani unnii Pharaoh uqayunaiġatalgitchuq, tainnasuliasi aullaqtinŋiḷgitkaich iñuich.