Exodus 7 - Iñupiatun Mumiksat Uqalugiksuat

¹ Tavraasii Ataniq uqallaktuq Moses-mun, “God-auruatun iḷiñiaġikpiñ Pharaoh-mun, aasii aniqatikpich Aaron-gum uqautiniaġaa iliŋnun uqaqtauluni.

² Uqallautilugu Aaron supayaamik piraksriutigirapkun iliŋnun, aasii uqallautiniaġaa Pharaoh Israel-gum kiŋuvaaŋich aullaqtitqulugich nunaŋaniñ.

^3-4 Aglaan uqayunaiqsinniaġiga Pharaoh, aasii naalaġniñiaŋitkaatin, qanutun unnii tatamaanaqtigiruanik savakkaluaġuma Egypt-mi. Igḷutulgunaitchuatigun tatavsaġniaġiga Egypt suli aullatilugich kiŋuniġiiḷḷaaruat iñugiratka taavsrumaŋŋa nunamiñ.

⁵ Tavraasii Egypt-miut iḷitchuġiñiaqtut uvaŋa Atanġutilaamnik, suammatipkun akiḷḷiqsruġlugich isaaġupku argaga aasii aullautilugich Israel-gum kiŋuvaaŋich iliŋisa nunaŋanniñ.”

⁶ Moses-lu Aaron-lu savaŋaruk Atanġum piraksriutaanik.

⁷ Tavrani uqautikamitku Pharaoh, Moses ukiuqtutigiŋaruq sisamakipiatun (80), aasii Aaron ukiuqaqłuni sisamakipiaq piŋasutun (83).

Aaron-gum Pisuaqami Ayauppiaŋa

⁸ Ataniq uqallaktuq Moses-mullu Aaron-mullu,

⁹ “Pharaoh-m nalupqinaiyaqupiaqpasik aliuġnaqtuanik savaglusik, uqallautisaġiñ Aaron ayauppiaŋa miḷuqsautitqulugu sivuġaanun Pharaoh-m, taimmaasii nimiġiaġuġniaqtuq.”

¹⁰ Tavra Moses-lu Aaron-lu umialigmuŋaruk Atanġum piraksriutaatun. Aaron-gum miḷuqsautiŋagaa ayauppiani sivuġaannun Pharaoh-vlu qaukłiuraŋisalu, aasii ayauppiaŋa nimiġiaġuŋaruq.

¹¹ Tavraasii Pharaoh-m ququaŋagai iñuni aŋatkulasuuruat, aasii aŋatkuaqłutiŋ tainnaptauq piḷḷammiñiqsut.

¹² Miḷuqsautigaich ayauppiatiŋ, aasii nimiġiaġuŋarut. Aglaan Aaron-gum ayauppiaŋata iiŋagaich taapkua ayauppiaŋich.

¹³ Pharaoh aglaan uqayunaitchuq-suli, Atanġum uqallausiatun, Pharaoh-m naalaġnisuŋitkaik Moses-lu Aaron-lu.

Iluirrutiqpaich Tikitchut Egypt-mun Auk

¹⁴ Tavra Ataniq uqallaktuq Moses-mun, “Pharaoh uqayunaipiallaktuq suli aullaqtitchuŋitkaich iñuich.

¹⁵ Tainnamik kasuġiaġumagiksik uvlaami samuŋa Nile-mun kuugmukpan. Ayauppiaqsik kaluġlugu nimiġiaġuŋaruaq, aasii utaqqiaqsiḷugu kuugum siñaani.

¹⁶ Aasii uqallaglusik Pharaoh-mun, ‘Atanġum, God-auruam Hebrew-guruanun, tiligaaŋa uqallautitquvlutin aullaqtitquvlugich iñuni, nanġautiqaġumaut ilaanun nunagluktuami. Aglaan uvva pagmanun-aglaan naalaġniŋaitchutin.

¹⁷ Tavraliasii, Umialguruatiin, Ataniq uqallaŋaruq iḷitchuġiñiaqtutin ilaa kiutilaaŋanik savaaġiniaqtaŋagun. Sammahii, anauniaġiga kuugum qaaŋa mattumiŋa ayauppiamik, aasii imaq auguġniaqtuq.

¹⁸ Iqaluich tuquniaqtut, suli kuuk tippakpaiḷḷuni Egypt-miuguruat imiġvigiyumiñaiġniaġaat.’”

¹⁹ Atanġum uqautigaa Moses, “Uqallauttuuŋ Aaron tigummitqulugu ayauppiaŋa qulaatigun kuugaurat, imaġaurat, kuugauraliat imaġauraliallu Egypt-mi. Imaq auguġniaqtuq, suli iluqaani nunami auqaġniaqtuq, qirugni puggutaqpagni suli uyaġagni imiqaġviḷiani.”

²⁰ Tavra Moses-lu Aaron-lu savaŋaruk Atanġum piraksriutaatun. Takkuanni Pharaoh-m suli atanauraŋisa, Aaron-gum isaaġutiniġaa ayauppiani aasii anauvlugu kuugum qaaŋa, aasii iluqani imaq auguŋaruq.

²¹ Iqaluich kuugmiittuat tuquŋarut, aasii tippakpaił̣ł̣uni Egypt-miut imiġumiñaiñŋarut tamaaŋŋa. Sumipayauraq tamarra auk Egypt-mi.

²² Aglaan Pharaoh-m aŋatkuŋich aŋatkuaġaġniqsut piḷġusimiktun tuvraqługu Aaron, Pharaoh uqayunaivsaaŋaruq tainnasuli. Atanġuruam uqallausiatun, Pharaoh-m naalaġnisuŋaitkaik Moses-lu Aaron-lu.

²³ Tavraaglaan tunurruiññaqłuni Pharaoh utiŋaruq igluqpagmiñun suliqutigigaluaġnaguunnii tamanna qiñiqtani.

²⁴ Egypt-miupayaat nivasuŋaiññaliŋarut siñaani kuugum imiġviksramignik, qanukkii imiġumiñaił̣ł̣utiŋ imġaniñ kuugum.

²⁵ Tallimat malġuk uvlut qaaŋiŋarut Atanġum auguqtinmauŋ kuuk.