Exodus 6 - Iñupiatun Mumiksat Uqalugiksuat

¹ Tavraasii Atanġum uqallautigaa Moses, “Tavra qiñiġniaġiñ savaaġiniaqtaġa Pharaoh-mun. Nunuriñiaġiga ilaa aullaqtitqulugich iñutka. Aninniaġaich unnii maaŋŋa nunamiñiñ.”

God-im Ququaġaa Moses

² God-im uqallautigaa Moses, “Uvaŋa Atanġuruŋa.

³ Niptaŋaruŋa Abraham-mun, Isaac-mun, Jacob-mullu, Suaŋŋatiqpaqaqłuŋa God-auvluŋa, aglaan iḷitchuġipkaŋaitchuŋa iliŋiññun atiqaqtilaamnik Ataniġmik.

⁴ Aasii suli inillaiŋaruŋa sivunniuġunmik iliŋiññun, unniqsuqłiivḷugich aitchuġniaġnivḷugich nunaŋanik Canaan, nunamik iñuuvigiŋaraŋannik allaniñ nunaniŋŋaqtauvlutiŋ.

⁵ Uvva tusaaŋagiga nagliksaaqłutiŋ iiqtuaġutaat Israel-gum kiŋuvaaŋich, Egypt-miut tigutaaqtaliutiraŋich kivgauvlugich, suli itqaumagiga inillaŋaraġa sivunniuġun.

⁶ Tavraasii uqallautikkich Israel-gum kiŋuvaaŋich innaġniḷuŋa, ‘Uvaŋa Atanġuruŋa; Annautiniaġivsi suli kivgaunivsiññiñ atanġiqsillusi Egypt-miuniñ. Suaŋŋatiga atuġlugu tatavsaġniaġitka, annautilusiḷu.

⁷ Iñugiliutiniaġivsi uvaŋa nanmiñiq, suli ilivsiññun God-auniaqtuŋa. Iḷisimaniaqtusi uvaŋa Ataniq, ilivsi God-igiraqsi, atanġiqsitkivsi kivgaunivsiññiñ Egypt-mi.

⁸ Nunamuutiniaġivsi unniqsuqłiisigiŋaramnun Abraham-mun, Isaac-mun, Jacob-mullu; qaiññiaġiga ilivsiññun pigiliutipkaġlugu. Uvaŋa Atanġuruŋa.’”

⁹ Moses-gum taavsrumiŋa uqautigaich Israel-gum kiŋuvaaŋich, aglaan naalaġnisuŋaitkaat, qanukkii irrusiŋat qapiŋatchapiaġataŋaruq aŋalamaqłuksiqpaił̣ł̣utiŋ kivgauniġmigni.

¹⁰ Tavraasii Ataniq uqallaktuq Moses-mun,

¹¹ “Uqallautisaqtuqsiuŋ Pharaoh aullaqtittuksraġigaigguuq Israel-gum kiŋuvaaŋich nunamiñiñ.”

¹² Moses-gum aglaan kiugaa, “Israel-gum kiŋuvaaŋisa unnii naalaġnisuŋaitkaanŋa, aasiuvva summan Pharaoh-m naalaġniñiaqpaŋa? Uvaŋa uqaġnialguipiaġataqtuŋa.”

¹³ Aglaan Atanġum piraksriġaik Moses-lu Aaron-lu. “Innaqsigik Israel-guruallu Pharaoh-lu piraksriŋatilaavsigñik uvamnun aullaqtitquvlugich Israel-gum kiŋuvaaŋich Egypt-miñ.”

Sivulliuŋisa Agliusimaniŋat Moses-guvlu Aaron-guvlu

¹⁴ Reuben, Jacob-gum aŋayukłiŋa, sisamanik iġñiqaqtuaq: Hanoch, Pallu, Hezron, Carmi-ḷu; taapkua maŋŋuurut kiŋuvaamignun.

¹⁵ Simeon iġñiqaŋaruq itchaksranik: Jemuel, Jamin, Ohad, Jachin, Zohar, Shaul-lu, taamna iġñiŋa Canaan-mium aġnam; taapkua maŋŋuurut kiŋuvaamignun.

¹⁶ Levi piŋasunik iġñiqaŋaruq: Gershon, Kohath, Merari-ḷu: taapkua maŋŋuurut kiŋuvaamignun. Levi iñuuŋaruq 137-ni ukiuni.

¹⁷ Gershon malġugnik iġñiqaŋaruq: Libni-ḷu Shimei-ḷu, aasii iñugiaktuanik kiŋuvaaqaŋaruk.

¹⁸ Kohath sisamanik iġñiqaŋaruq: Amram, Izhar, Hebron, Uzziel-lu. Kohath iñuuŋaruq 133-ñi ukiuni.

¹⁹ Merari iġñiqaŋaruq malġugnik: Mahli-ḷu Mushi-ḷu. Tavra taapkua qitunġaŋich Levi-m kiŋuvaaġiraŋich.

²⁰ Amram-gum tuvaaqasiutiŋagaa aapami aniqataa Jochebed, iġñiqaqłuni aasii Aaron-miglu Moses-miglu. Amram iñuuŋaruq 137-ni ukiuni.

²¹ Izhar iġñiqaŋaruq piŋasunik: Korah, Nepheg, Zichri-ḷu.

²² Uzziel iġñiqaŋammiuq piŋasunik. Mishael, Elzaphan, Sithri-lu.

²³ Aaron tuvaaqasiŋaruq Elisheba-mik, panianik Amminadab, aniqataanik Nahshon; iġñiŋaruq Nadab-mik, Abihu-mik, Eleazar-mik, Ithamar-miglu.

²⁴ Korah iġñiqaŋaruq piŋasunik: Assir, Elkanah, Abiasaph-lu; maŋŋuuŋarut Korah-tkuayaanun.

²⁵ Eleazar, Aaron-gum iġñiŋa, tuvaaqatchiŋaruq iḷaŋannik Putiel-gum paniŋisa, taamna iġñiŋaruq Phinehas-mik. Isagutisaŋagaat taapkua maŋŋuuruat kiŋuvaaŋiññun Levi-m.

²⁶ Taapkuak tavra Aaron-lu Moses-lu Atanġum uqallautiraŋik, “Aullatisigik Israel-gum kiŋuvaaŋich Egypt-miñ.”

²⁷ Taapkuak tavra uqallautiŋagaak Pharaoh aullaqtitquvlugich Israel-gum kiŋuvaaŋich.

Atanġum Piraksriutaa Moses-mullu Aaron-mullu

²⁸ Atanġum uqallautimmauŋ Moses Egypt-mi,

²⁹ inna uqallaŋaruq, “Uvaŋa Atanġuruŋa. Uqallautisaġiksik Pharaoh uqalupayaamnik ilivsiŋñun.”

³⁰ Aglaan Moses-gum kiugaa, “Iḷisimarutin qanutun uqaġnialguisilaaġa; aasiuvva summan naalaġniñiaqpaŋa Pharaoh-m?”