Exodus 5 - Iñupiatun Mumiksat Uqalugiksuat

Moses-lu Aaron-lu Sivuġaanugmagnik Umialgata Egypt-gum

¹ Tavra Moses-lu Aaron-lu Pharaoh-muŋaruk aasii uqallakłutik, “Ataniq, God-iŋat Israel-gum kiŋuvaaŋisa, uqallaktuq, ‘Aullaqtitkich iñugiratka, niqinaqiyumaut nunagluktuami nanġautiqaġlutiŋ uvamnun.’”

² “Kiña uvva Ataniq?” Pharaoh uqallaniqłaktuq. “Summan naalaġniñiaqpigu suli aullaqtillugich Israel-gum kiŋuvaaŋich? Nalugiga uvaŋa Ataniq; suli aullaqtinniaŋitkitka Israel-gum kiŋuvaaŋich.”

³ Moses-guvlu Aaron-guvlu kiugaak, “God-ikput, Hebrew-guruaguut, niptaŋaruq uvaptignun. Aullaqtitchigut iglauluta piŋasuni uvluni nunagluktuamun aitchuiyumaugut ikipkaiḷuta Ataniġmun God-igiraptignun. Tainna piŋisuaġupta, God-im tuqunniaġaatigut nagliksaaġnaqtuatigun naŋirrutikun naagga aŋuyagnikun.”

⁴ Pharaoh-m uqallautigaik Moses-lu Aaron-lu, “Uqaqpisik uvva iñuich savaŋisaaquvlugich? Savaaŋiññuktitqiksigik!”

⁵ Isumaruq inna, “Ilivsi uvva iñugiaksił̣haaŋarusi Egypt-miuniñ. Aasii uvva savaŋaiqugitin!”

⁶ Taaptumani uvlumi Pharaoh-m piraksriġñiġaich kivgauruanun tiliuqtauruallu kivgallu aŋalatchiriŋich,

⁷ “Aitchuqtuŋaiqsigik iñuich ivigruanik katchiksraliuġutiksraŋiñik. Ilimignigli paqillugich piyumagaich.

⁸ Aglaan allaŋŋuġaluaġnagu iñugiaktilaaŋat katchiksraliaŋisa sivuanisun, atausiuramik-unnii inuqtinnasigik. Iqiasuutupiaġataqtut, suli uvva tainnamik apiqsruqtaġaanŋa aullaqtitquvlutiŋ aitchuisukłutiŋ ikipkautitigun God-imignun!

⁹ Siġġaqipkaqsigik suli aptapkaġlugiḷḷu, naalaġniviksraqaŋitchumaut sagluuqtuanik.”

¹⁰ Kivgauruanun tiliuqtillu kivgallu aŋalatchiriŋich anivḷutiŋ uqallautigaich Israel-gum kiŋuvaaŋich, “Pharaoh uqallaktuaq ivigruanigguuq aitchutqigñiaŋitkaasi.

¹¹ Ilivsiññigguuq ivaqłiġiaġlusi sumiḷḷiqaa pisaqtusi, aglaan savaavsi iñugiaktilaaŋat katchiliuġnikun allaŋŋuġniaŋitchuq.”

¹² Tavraasii iñuich ivaqłiġiaŋaniqsut ivigruat iḷakuŋiññik sumipayauraq Egypt-mi.

¹³ Kivgauruanun tiliuqtiksraqtaaguruat katchuŋaiqłutiŋ savaktinnialagaich taipkunatun iñugiaktigiruanik naatchitquvlugich, uvlutuaġman ivigruanik sivuani piqaqtinmatun.

¹⁴ Egypt-miut kivgauruanun tiliuqtiksraqtaaguruat anaullaġniġaich Israel-gum kiŋuvaaŋich aŋalatchirich, qaunaksriliutiratik savaaŋannun. Apiġigaich, “Summan imña naatchiḷḷaiqpisi taipkunatun iñugiaktigivlugich katchiksrat sivuani piusivsiktun?”

¹⁵ Tavraasii aŋalatchirit Pharaoh-mugniqsut aasii iŋiqsruġvigivlugu, “Summan uvva tainna aŋalatpisigut, Umialguruatiin?

¹⁶ Savaktauruat aitchulaitkait ivigruanik, naaggauvva piraksriġaatigut katchiksraliuquvluta! Aasii suliuvva anaullaqsiġmiugut. Uvva ilvich iñutin patchisaurut.”

¹⁷ Pharaoh-m kiugai, “Iqiasuksiññaqłusiuvva aullaġuktusi patchisigivlugu aitchuisaqtuaġniaġnivlusi ikipkaiḷusi Atanivsiññun.

¹⁸ Utiġitchi savaavsiññun! Ivigruaksriññiaŋitkaasi, aglaan tainnatun suli iñugiaktigilugich katchiksraliuġniaqtusi.”

¹⁹ Aŋalatchirich kaŋiqsirut iłuiḷḷiuġutiqpagmun tikisilaamignik uqallausiaqaqamiŋ tainnatun suli iñugiaktigilugich katchiksraliuquvlugich uvlutuaqpan sivuanisun.

²⁰ Aniḷḷaġmiŋ, kasuġaik Moses-lu Aaron-lu, utaqqiritiŋ.

²¹ Uqallaktut Moses-mullu Aaron-mullu, “Atanġumtuq tautugliuŋ savaaqsik aasiiñ tatavsaġlusik uumigiliqsinnavsigut muayuguliqtitaallapta Pharaoh-mun qaukłiŋiñullu. Patchisiksraniktitkisi uvva tuqutquvluta.”

Moses Uqamayuktuq Ataniġmun

²² Tavra Moses utitqigñiqsuq Ataniġmun uqaqłuni, “Ataniiq, uvva summan aŋalamaqłukpigich iñutin? Summan imña tiliraġma mauŋa?

²³ Ullakapkuqaŋa Pharaoh uqaqłuŋa uqaluksrirrutignik, nagliksaaqtitaġillakkaich. Aasii uvva qanuŋaitchutin ikayuqsaġlugich!”