Exodus 40 - Iñupiatun Mumiksat Uqalugiksuat

Nappaiñiŋallu Aŋaiyyutikullu Ilaaguaqtaġimmarruŋ Tupiq Atanġum Nayuqtauvia

¹ Atanġum uqautigaa Moses,

² “Sivullianni uvluŋisa sivullium tatqim nappaġlugu Tupqa Atanġum nayuqtauniŋata.

³ Iḷuanuglugu Sivunniuġutim Kiguunniŋa imaqaqtuaq Qulinik Piraksriutinik aasii talukiyaaq iḷiḷugu sivuġaanun.

⁴ Qaġġisilugu niġġiviuraq aasii suġautaŋich tavruŋaġlugich. Qaġġisilugulu naparuaq naniqaġvik aasii naniŋich iḷiḷugich tavruŋa.

⁵ Iḷiḷugu ikipkaivik kaviqsuamik manigmik savaaq tivraġiksautinun sivuġaanun Sivunniuġutim Kiguunniŋata aasii niviŋŋaġlugu talukiyaaq paaŋanun Tupqum.

⁶ Inillaglugu ikipkaivik aitchuutinun sivuġaanun Tupqum.

⁷ Iqaqqivik iḷiḷugu akunġagnun Tupquvlu ikipkaiviuvlu aasii immiġḷugu imiġmik.

⁸ Inillaglugu avaluksraŋa suli talukiyaaliġḷugu paaŋa.

⁹ “Tavraasii ilaaguaqtaġilugu Tupiq Aŋaiyyuviuruaq suġautapayaaŋiḷḷu uqsruqtaaġlugu salumaruamik, aasii salumaruaguniaqtuq.

¹⁰ Taaptuma aquagun, ilaaguaqtaġilugu ikipkaivik suġautaŋiḷḷu uqsruqtaaġlugich, aasii iluqani salumaruaguniaqtuq.

¹¹ Tainnasuli ilaaguaġlugu iqaqqivik alliġaŋalu.

¹² “Qaipkaġlugich Aaron-lu iġñiŋiḷḷu paaŋanun Tupqum, aasii piraġausiq nalaullugu ivvaqtillugich.

¹³ Annuġaaqtillugu Aaron aŋaiyyuliqsiqpauruam annuġaaŋiñik, uqsruqtaaġlugu, tainna ilaaguaqtaġisaġlugu savautiyumagaaŋa aŋaiyyuliqsiqpauluni.

¹⁴ Qaipkaġlugich iġñiŋi aasii qaliġuuraqtillugich.

¹⁵ Aasii uqsruqtaaġlugich, uqsruqtaaġusivsisun aapaŋannun, savautiyumagaanŋa aŋaiyyuliqsiqpaulutiŋ. Taaptuma uqsruqtaaqtauniŋata aŋaiyyuliqsiqpaullapkaġniaġaich taimuŋaaglaan.”

¹⁶ Moses tainna savaŋaruq Atanġum piraksriutaatun.

¹⁷ Tavraasii sivullianni uvluŋisa sivullium tatqim ukiutqigman aullaaniŋmata Egypt-miñ, Tupiq Atanġum nayuqtauviŋa nappaŋaġaat.

¹⁸ Moses-gum inillaŋagaich tunŋaviŋich, avaluŋich, kasuqtiłługich ayagutaŋich, suli nappaqługich napaqsraŋich.

¹⁹ Isivinŋagaa taluksraŋa Tupqum, suli siḷalliq taluŋa, Atanġum piraksriutaatun.

²⁰ Tavra malġuk uyaqqak aglagviuruak iḷiŋaniġaik Sivunniuġutim Kiguunniŋanun. Iḷivḷugik akigaunnaŋik akigaġviŋigñun Kiguunniġum suli matuvlugu.

²¹ Inillaŋagaa Kiguunniq Tupiġmun suli niviŋŋaqługu talukiyaaq. Tainna tavra talukiyaaġutiŋaniġaa Sivunniuġutim Kiguunniŋa, Atanġum piraksriutaatun.

²² Niġġiviuraq iḷiŋagaa Tupiġmun, salliġmun sanmivḷugu siḷataanun talukiyaam,

²³ tavruŋaasii iḷivḷugu punniq aitchuutauruaq Ataniġmun, Atanġum piraksriutaatun.

²⁴ Naparuaq naniqaġvik iḷiŋagaa Tupiġmun, pauŋanmun sanmivḷugu, akianun niġġivium,

²⁵ tavraniasii Atanġum irviani ikinŋaniġaich nannich, Atanġum piraksriutaatun.

²⁶ Kaviqsuamik manigmik savaaq ikipkaivik Tupiġmuŋagaa, sivuġaanun talukiyaam,

²⁷ ikipkaivḷuniasii tivraġiksautinik, Atanġum piraksriutaatun.

²⁸ Niviŋŋaŋagaa talukiyaaq paaŋanun Tupqum.

²⁹ Tavruŋaasii sivuġaanun talukiyaam iḷivḷugu ikipkaivik aitchuutinun. Tavrani ikipkautikun aitchuutiqaŋaruq suli palauvaksramik, Atanġum piraksriutaatun.

³⁰ Iqaqqivik iḷiŋagaa akunġagnun Tupquvlu ikipkaiviuvlu immiqł̣ugu imiġmik.

³¹ Moses, Aaron-lu, iġñiŋisalu iqaġiraġniġaich argatiglu isigatiglu tavrani

³² tupiġmugaġikamiŋ naakka ikipkaivigmun, Atanġum piraksriutaatun.

³³ Moses-gum nappaŋagaa avaluksraŋa Tupqum ikipkaiviuvlu suli niviŋŋaqługu talukiyaaq paaŋanun avaluuruam. Tavra iluqaiññik savaaksranik naatchiŋaruq.

Nuviya qulaani Tupqum Atanġum Nayuqtauviata

³⁴ Taluŋagaa nuviyam Tupiq aasii Atanġum nayuqtauniŋata qaummanġum immiŋagaa.

³⁵ Taamnaasii pisigivlugu, Moses isiyuiñŋaruq Tupiġmun.

³⁶ Israel-gum kiŋuvaaŋich aullaqiraqtut kisian taamna nuviya kiviktaumman Tupiġmiñ.

³⁷ Nuviya tavrani aulaŋiñman, nuutchuiñŋarut.

³⁸ Igliqtuaġnimigni tautugaġigaat nuviya Atanġum nayuqtauniŋa qulaani Tupqum uvlumi suli igniq ikualaugaqtuaq qulaani unnuaġaġimman.