Exodus 4 - Iñupiatun Mumiksat Uqalugiksuat

God-im Moses Suaŋŋatiksriñmauŋ Aliuġnaqtuamik

¹ Tavraasii Moses-gum kiugaa Ataniq, “Iḷaanni Israel-gum kiŋuvaaŋich ukpiġiŋitkaqsikpanŋa naalaġniŋiḷḷuŋalu, suniaqpik uqaaqsikpata niptaġvigiŋaiññiḷuŋa iliŋnun?”

² Tavra Atanġum apiġigaa, “Sumik tigummivich?” “Ayauppiamik,” Moses-gum kiugaa.

³ Ataniq uqallaktuq, “Miḷuqsauttuuŋ saagnun nunamun.” Moses-gum miḷuqsautimmagu, taimma nimiġiaġuqtuq, aasii Moses qimaaŋaruq.

⁴ Tavra Ataniq uqallaktuq Moses-mun, “Tigguuŋ pamiuŋagun.” Tavraasii Moses-gum tigugaa, aasii ayauppiaġutqiksuq nimiġiaq.

⁵ Ataniq uqallaktuq, “Taamna tainna piyumagiñ nalupqinaiġutaulugu Israel-gum kiŋuvaaŋiññun, Ataniq, God-iŋat maŋŋuuŋisa, God-iŋa Abraham, Isaac-gum, suli Jacob-gum, niptaŋatilaaŋa iliŋnun.”

⁶ Ataniq uqallavsaaqtuq Moses-mun, “Argaiñ iḷuanuguŋ qaliġuaqpich.” Moses kamaksriruq; aasii amummagu, kiḷḷiġruaqtuliġñiqsuq, qatiqtuagulaaqsiŋavluni, aputitun ittuanik.

⁷ Tavraasii Ataniq uqallaktuq, “Argaiñ iḷuanutqiguŋ qaliġuaqpich.” Tainna aasii piuq, tavrani amummagu, iłuaqsiŋaniqsuq, qiññanikłuni uviñiŋatun.

⁸ Ataniq uqallaktuq, “Ukpiġiniaŋitpatin naagga nikasuutiqaqpata-suli sivullikun aliuġnaqtuakun savaapkun, tavra taaptuma nikasuŋaiqsinniaġaich.

⁹ Ukuak malġuuk aliuġnaqtuak pigaluaġupkik ukpiġiliŋitpatin-suli, naalaġnisuŋiḷḷutillu uqaġuvich, immamik piyumautin kuugmiñ Nile-miñ aasii kuviḷugu nunamun. Imiq auguġniaqtuq.”

¹⁰ Aglaan Moses uqallaktuq, “Naumi, Ataniiq, tiliñaŋa. Uqalguruagulġataŋaitchuŋa, suli uqalgusiŋaitchuŋa uqaqatigisaqamŋa-qaŋa. Uqalguipiallaktuŋa, uqaqama sukaiñmiuŋa, uqallaksallaiġuummivḷuŋa.”

¹¹ Atanġum uqallautigaa, “Kia una iñuk qaniksritpauŋ? Kia tusaalaisitpauŋ naagga uqalaisitpauŋ? Kia tautullapkaqpauŋ naagga ayaupkaqpauŋ? Tavra uvaŋa, Atanġuruam.

¹² Ki, Aullaġiñ! Ikayuġniaġikpiñ uqaġuvich, suli uqaluksraqaqtinniaġikpiñ.”

¹³ Aglaan Moses-gum kiugaa, “Naumi, Ataniiq, tilisiyumautin allamik iñugmik.”

¹⁴ Tavrani tavra Atanġum qinnautigaa Moses aasii uqallakłuni, “Aasiimi imña aniqatin Aaron, kiŋuvaaguruaq Levi-mik? Iḷisimaruŋa uqayutilaaŋanik. Imma, qaiḷġataviksuq kasuġiaqhutin samma quviasugniaqtuq tautukkumisin.

¹⁵ Uqautiyumiñaġiñ aasii uqaluksriqsuġlugu. Ikayuġniaġivsik uqaġuvsik, aasii suli uqautilusik suniaqtilaavsigñik.

¹⁶ Uqaqtiginiaġiñ iñugnun. Tavraasii God-itun inniaqtutin ilaanun, uqaluksriqsuġlugu.

¹⁷ Una ayauppiaq kaluġlugu; atuġniaġiñ savakkuvich aliuġnaqtuanik.”

Moses Utiġman Egypt-mun

¹⁸ Tavraasii Moses utiŋaruq Jethro-mun, aaparuamiñun, aasii uqallautivlugu, “Utiġlaŋa Egypt-mun nanmiñiq iḷamnun Israel-gum kiŋuvaaŋiññun iñuugaluaġmagaisa-suli.” Jethro-m iviġaumagivlugu aullaqugaa.

¹⁹ Moses Midian-miitiłługusuli, Atanġum uqallautigaa, “Utiġiñ Egypt-mun, qanukkii iluqaġmiŋ tuqutchisuŋaruat ilignik tuquŋarut.”

²⁰ Tavraasii Moses-gum tuvaaqatiniḷu iġñiġutiiniḷu ikuvlugich kakaktimun, aullaqatigigaich Egypt-mun, tigumiaqługu ayauppiaq God-im kaluquraŋa.

²¹ Ataniq uqallatqiḷgitchuq Moses-mun, “Tavra utiġuvich Egypt-mun, savapiaġumagitin sivuġaani Pharaoh-m iluqaisa aliuġnaqtuat suaŋŋatiksrirrutitka ilignun atuġlugich. Aglaan uqayunaiqsinniaġiga, aasii aullaqtinniaŋitkaich iñutka.

²² Tavraasii ilvich uqallautiruksraġiniaġiñ, uvaŋa Atanġuruaq, innaġniḷuŋa, ‘Israel aŋayukłiqpiaq iġñiġa.

²³ Uqallautiraqpiñ aullaqtitquvlugu iġñiġa, nanġaġumagaaŋa, aglaan aullaqtitchuŋitkiñ. Tavraasii tuqunniaġiga aŋayukłiq iġñiġiñ.’”

²⁴ Nullaummivianni Egypt-muksaġiami, Atanġum kasuġaa Moses aasii tuqunniatakługu uvvakii nalunaiñŋutchiqsauŋaiłłuni iġñiŋa.

^25-26 Tavraasii Zipporah, nuliaŋa, ipiktuamik uyaġagmik pivḷuni, sirguŋagaa iġñini, aasii aksiutigivlugu Moses isigaŋiñun. Pisigivlugu nalunaiñŋutchiqsauniq uqallaktuq Moses-mun, “Uiŋ, uvva tautuguŋ auk. Atanġum tuqutchuminaiġaatin.” Tavraasii Atanġum Moses tuqunŋiñŋagaa.

²⁷ Tavrani Ataniq uqallaŋaruq Aaron-mun, “Nunagluktuamugiñ kasuġiaġlugu Moses.” Aaron aullaŋaruq kasuġiaqługu ilaaguaqtauŋaruami iġġimi; kasuqamiuŋ aniqanni Moses kuniŋagaa.

²⁸ Moses-gum uqautigaa Aaron Atanġum uqalupayaaŋigun utiqummaniḷu Egypt-mun, uqausiġivlugiḷḷu tiliuġusiani aliuġnaqtuat savaaġitquraŋich.

²⁹ Tavraasii Moses-lu Aaron-lu Egypt-muŋaruk aasii Israel-gum kiŋuvaaŋich aullarripayaaŋich atautchimuktiłługich.

³⁰ Aaron-gum uqautiŋagai iluqaiññik Atanġum uqaluŋiñik Moses-mun, tavraasii Moses savaŋaruq aliuġnaqtuanik sivuġaanni iñuich.

³¹ Ukpiġiliŋagaik, aasii tusaakamiŋ Ataniġmun ullaŋatilaamignik suli qiñiŋatilaamignik qanuq nagliksaaqtitaukamiŋ, tavra pułłutiŋ nanġaŋagaat God.