Exodus 39 - Iñupiatun Mumiksat Uqalugiksuat

Annuġarriuġmata Aŋaiyyuliqsiqpauruanun

¹ Suŋauraaqtaamik, tigluuraaqtaamik, suli kaviqsuamik imnaim mitquanik annuġaaġiksualiuŋarut aŋaiyyuliqsiqpauruat atugaksraŋiñik Salumaruami Inimi. Aŋaiyyuliqsiqpaich annuġaaŋiñik savaŋarut Aaron-mun, Atanġum piraksriutaatun Moses-mun.

² Aŋaiyyuliqsiqpak kiapiġusiuŋagaat ukił̣haaġiksaamik; suŋauraaqtaamik, tigluuraaqtaamik, suli kaviqsuamik imnaim mitquanik; suli ivaluqaqługu kaviqsuamik manigmik.

³ Kauŋaniġaich kaviqsuat maniich aasii avguqługu amisuuranik iḷḷatisaqługich ukił̣haaġiksuamun suli suŋauraaqtaamun, tigluuraaqtaamun, suli kaviqsuamun imnaim mitquanik.

⁴ Malġugnik tuiqqagusiŋagaat kiapiġun aasii kasuqtillasivḷugik saniġallaaŋigñun.

⁵ Ukił̣haaġiksuamiñ piḷiaq tavsi, savaaguruaq tainnasimiñ suli, atallasivḷugu kiapiġunmun atausiusaġlugik aviktamin, Atanġum piraksriutaatun Moses-mun.

⁶ Savaŋagaich carnelian-gich aasii iḷivḷugich kaviqsuanun manigmun; titiqtulluataqługiḷḷu atiŋich qulit malġuuruat (12) iġñiŋich Jacob.

⁷ Inillaŋagaich tuiqqagutiŋigñun kiapiġutim itqaummatausaqługich qulit malġuuruanun (12) maŋŋuŋiñun Israel, piraksriutaatun Atanġum Moses-mun.

Satqagutiliuġmata

⁸ Satqagusiuŋarut ukił̣haanik atiruanik aŋaiyyuliqsiqpaum kiapiġutaatun suli atikavsakługich qupaich miquqtat.

⁹ Kaŋiġalluaġiŋaruq qugluŋavluni, quliŋŋuġutaiḷanik titiġniñik taktigivluni aasii quliŋŋuġutaiḷanik titiġniñik siḷiktigivluni.

¹⁰ Iḷisiŋarut sisamaiñik tunulliġiiksuanik uyaġagiksuanik tavruŋa: sivulliġmi saniġaqłiġiiksuani iḷisiŋarut ruby-mik, topaz-mik suli garnet-mik;

¹¹ tuglianni saniġaqłiġiiksuat, emerald-mik, sapphire-mik suli diamond-mik;

¹² piŋayuanni saniġaqłiġiiksuat, turquoise-mik, agate-mik, amethyst-mik;

¹³ sisamaŋanni aasii saniġaqłiġiiksuat, beryl-mik, carnelian-mik, suli jasper-mik. Taapkua attaviḷiqł̣ugich kaviqsuamik manigmik.

¹⁴ Uyaġallaanun qulit malġuuruanun (12) titiqtuutiŋagaich atillaaŋich iġñiŋisa Jacob, nalunaiġutausaqługich qulit malġuuruanun (12) maŋŋuŋisa Israel.

¹⁵ Satqagun qivḷiḷiuŋagaat kaviqsuamik manigiksuamik, qipitanik akłunaatun.

¹⁶ Iḷḷiviḷiuŋarut malġugnik kaviqsuamik manigmik suli malġugnik tigummisiliqługik aqvaluqtuagnik aasii kasuqtiłługik aqvaluqtuak qulaanun kaŋiġalluŋiñun satqagutim.

¹⁷ Kasuqtinŋagaich malġuk qivḷiik, kaviqsuamik manigmik piḷiak, malġuŋnun aqvaluqtuagnun tigummisignun

¹⁸ aasii kasuqtinmivḷugik allak isuŋik akłunaaliak malġuuruagnun iḷḷiviḷiagnun tavra tainna kasuqtiłługik saaŋanun tuiqqaġutiniksa kiapiġutim.

¹⁹ Malġugnik aqvaluqtuagnik tigummisiliuqłutik kaviqsuamik manigmik aasii kasuqtiłługik alliigñun kaŋiġalluŋigñun satqagutim, iḷulliata siñaani saniġaani kiapiġutim.

²⁰ Malġuvsaagnik kaviqsuamik manigmik tigummisiḷiuvsaaqłutiŋ aqvaluqtuagnik aasii kasuqtiłługik allianun saaŋata malġuuk tuiqqaŋaniittuagnun kiapiġutim, qaniŋanun kiluata suli qulaani qiḷaaġiksuam tavsiata.

²¹ Atanġum piraksriutaatun Moses-mun, qiḷiġutiŋagaik aqvaluqtuak satqagunmi aqvaluqtuaŋigñun kiapiġutim suŋauraaqtuamik akłunaamik, taamna satqagun inillaŋatquvlugu qulaani tavsiata aasii qasuraġauraŋiłłuni.

Aŋaiyyuliqsiqpauruat Annuġaaŋich Allat Savagmagich

²² Qaliġuaq iḷuaniittuaq aŋaiyyuliqsiqpaum kiapiġutaata savaŋagaat iluqaan suŋauraaqtaamik imnaim mitquanik.

²³ Nuiḷaŋa niaquanun ukpirrusiŋagaat aligiitkutaksriamik.

^24-26 Kiavaluisaaqługu allikun siñaagun pomegranate-liqsuŋagaat ukił̣haaġiksuamik, suŋauraaqtaamiglu, tigluuraaqtaamiglu, suli kaviqsuamik imnaim mitquanik akunniliqsuqługich qattauranik kaviqsuamik manigiksuamik, Atanġum piraksriutaatun Moses-mun.

²⁷ Qaliġuuraliuŋarut Aaron-mullu iġñiŋiññullu,

²⁸ suli nimmaaġutaa niaquata, nasaugauraŋi, suli naitchuat kamikłuich ukiłhaaġiksaamiñ piḷiat,

²⁹ suli tavsialiuqłutiŋ ukił̣haaġiksaamik suli suŋauraaqtaamik, tigluuraaqtaamik, kaviqsuamiglu imnaim mitquanik, qiñiyunaqsaŋaruanik miquqługich, piraksriutaatun Atanġum Moses-mun.

³⁰ Nalunaiñŋusiuŋaniqsut, nalunaiḷutaksraŋiñik ilaaguaqtauniŋisa, kaviqsuamik manigiksuamik, aasii titiqtuutivlugu tavruŋa “Ilaaguaqtauruaq Ataniġmun.”

³¹ Qiḷiġutiŋagaat sivuġaanun niaquata nimmaaġutim suŋauraaqtaaq akłunaaq, piraksriutaatun Atanġum Moses-mun.

Naanmarruŋ Savaaq

³² Iluqaġmi Tupqa Atanġum nayuqtauvia naalġatauraġniqsuq. Israel-gum kiŋuvaaŋich savaaġiŋagaat sunapayaaq Atanġum piraksriusiatun Moses-mun.

³³ Moses-muutiŋagaat Tupiq suġautapayauraŋiḷḷu, niksigaŋich, avaluŋich, ayagutaŋich, napaqsraŋich, suli tunŋaviŋich;

³⁴ taluliat imnaich aŋusalluŋisa amiŋiñik kipitanik kaviqsuamun; taluliaq qisigiksuamik; talukiyaaq;

³⁵ Sivunniuġutim Kiguunniŋa imaqaŋaruq uyaġagnik aglagviuruagnik, akigautiŋik, suli matua;

³⁶ niġġiviglu suġautaŋiḷḷu, suli punniq aitchuutauruaq God-mun;

³⁷ naparuaq naniqaġvik kaviqsuamik manigiksuamik savaaq, naniŋich, suġautaŋich, suli uqsruksrautaat nannich;

³⁸ kaviqsuamiñ manigmik ikipkaivik; uqsruqtaaġun; tivraġiksaun; talukiyaaŋa paaŋata Tupqum;

³⁹ patukpagmik piḷiat ikipkaivium uukłiqpiŋiḷḷu, akigautiŋik, suli iluqaisa suġautaŋich; iqaqqiviglu alliġaŋalu;

⁴⁰ talukiyaaŋich avaluuruam napaqsraŋich suli tunŋaviŋich; talukiyaaŋa paaŋata avaluuruam akłunaaŋiḷḷu; Tupqum paugaŋich; iluqaisa suġauttapayauraŋich atuġniaqtaŋich Tupiġmi;

⁴¹ qiñiyunaqtuallu annuġaaksrautiŋich aŋaiyyuliqsiqpaich atuaksrautiŋich Salumaruami Inimi—ilaaguaqtauŋaruat annuġaaksrautiŋich Aaron aŋaiyyuliqsiqpaum suli iġñiŋisa.

⁴² Israel-gum kiŋuvaaŋich iluqaan savaaġiŋagaat nalaułługu Atanġum piraksriutaa Moses-mun.

⁴³ Moses-gum qimilġuŋaniġaa iluqaan sunapayaaq aasii qiñiqługu savaaguŋatilaaŋat nalaułługu Atanġum piraksriutaatun. Tavraasii Moses-gum quviasaaġusiŋaniġaich.