Exodus 37 - Iñupiatun Mumiksat Uqalugiksuat

Savaaġimmarruŋ Sivunniuġutim Kiguunniŋa

¹ Bezalel-gum savaŋagaa Sivunniuġutim Kiguunniŋa acacia-m qiruanik, malġukipiaq tallimanik (45) titiġniñik taktigivlugu, iñuiññaq tallimat malġugnik (27) titiġniñik siḷiktigivlugu, suli iñuiññaq tallimat malġugnik (27) titiġniñik qutchiksigivlugu.

² Qaaliŋagaa kaviqsaamik manigiksuamik iḷualu siḷataalu suli kaviqsaamik manigmik avaluliqł̣ugu iluqaaqługu.

³ Sisamanik aqvaluqtuanik akigaġviḷiuŋaruq kaviqsuamiñ manigmiñ atallasivḷugich sisamanun turviŋiññun, malġuullaavlugik saniġallaaŋigñi akigautit.

⁴ Akigausiuŋagaa acacia-m qiruaniñ, qaaliqł̣ugu kaviqsuamik manigmik,

⁵ aasii iḷuaqtił̣ł̣ugik akigaunnaŋigun saniġallaaŋigñi Kiguunniġum.

⁶ Matualiuŋagaa kaviqsuamik manigiksuamik, malġukipiaq tallimanik (45) titiġniñik taktigivlugu suli iñuiññaq tallimat malġugnik (27) titiġniñik iraqtutigivlugu.

⁷ Malġugnik cherubim-liuŋaruq kauŋaruamiñ kaviqsuamik manigmik,

⁸ isullaaŋigñi matuata iḷivḷugik. Savaŋagaik atavlugik matuanun.

⁹ Cherubim sanmivḷugik qaaŋani matuata, aasii isaallaŋaruak isaġuŋiksa matuŋagaak.

Niġġiviliuġniq Punniġmun Aitchuutauniaqtuamun God-mun

¹⁰ Nigġiviuraliuŋaruq acacia-m qiruanik, iñuiññaq akimiaq atausimik (36) titiġniñik taktigivlugu, akimiaq piŋasunik (18) titiġniñik iraqtutigivlugu, suli iñuiññaq tallimat malġugnik (27) titiġniñik qutchiksigivlugu.

¹¹ Qaaliŋagaa kaviqsuamik manigiksuamik suli kaviqsuamik manigmik killiŋagun avaluliqł̣ugu.

¹² Siñiġusiqł̣ugu piŋasunik titiġniñik siḷiktigiruamik avataagun aasii kaviqsuamik manigmik avaluliqł̣ugu siñaagun.

¹³ Sisamanik akigaġviḷiqługu aqvaluqtuanik kaviqsuamik manigmik aasii iḷivḷugich sisamanun kaŋiġalluŋiññun, niuŋisa irvianun.

¹⁴ Tigummisit akigaunnaŋigñun niġġivium inillaŋagaich qaniŋanun siñiġutaata.

¹⁵ Akigaunnak savaŋagaich acacia-m qiruanik aasii matuvlugich kaviqsuamik manigmik.

¹⁶ Niġiñiutiliuŋarut kaviqsuamik manigiksuamiñ niġġiviuramun: puggutaurat, qallutit, wine-qaġviich, iḷuturuallu puggutaurat atugaksraŋich wine-nik aitchuigumiŋ.

Naparuamik Naniqaġviḷiuġmata

¹⁷ Naparuamik naniqaġviḷiuŋaruq kaviqsuamik manigiksuamik. Turviŋich suli naparuaŋich savaŋagaich kautaŋaruamik kaviqsuamik manigmik; qiñiyunaqsautiŋich nauriat, iḷagivlugich agmaaniŋaitchuat suli avaluŋich nauriam, piḷiaguruaq atausimiñ.

¹⁸ Itchaksrat qisiqsiutit saniġaŋiññiinŋarut, piŋasuullaavlutiŋ saniġallaaŋigñi.

¹⁹ Itchaksrauruat qisiqsiutit piŋasullaanik qiñiyunaqsautiqaŋarut naurianik qiññaliqł̣ugich almond nauriaŋisun aŋmaaniŋaitchuallu akutuqpaŋiḷḷu.

²⁰ Naparuaŋa naniqaġvium sisamanik qiñiyunaqsautiqaqtuq naurianik almond nauriaŋisun aŋmaaniŋaitchuallu suli akutuqpaŋiḷḷu.

²¹ Atausiq aŋmaaniŋaitchuaq nauriaq atauraŋanni ittuq piŋayuiguruat qisiqsiutit.

²² Aŋmaaniŋaitchuallu, qisiqsiutillu, naparuaġlu naniqaġvik iluqaġmik atausimiñ savaaguŋarut kauŋaruamin kaviqsuamik manigmik.

²³ Tallimat malġugnik naniqaġviḷiuŋarut naparuamun naniqaġvigmun, tiguullautiŋiḷḷu alliġauraŋiḷḷu savaaġiŋagaich kaviqsuamik manigiksuamik.

²⁴ Atuŋaruq 75 pounds-tun kaviqsuamiñ manigiksuamik naparuamik naniqaġviḷiuġamiŋ iluqaisalu suġauttapayauraŋich iḷagivlugich.

Ikipkaiviḷiuġmata Tivraġiksautinun

²⁵ Ikipkaiviḷiuŋaruq acacia-m qiruanik, tivraġiksautinun ikipkaiviksramik. Kaŋiġalluaġiŋaruq, akimiaq piŋasunik (18) titiġniñik taktigivluni aasii akimiaq piŋasunik (18) titiġniñik siḷiktigivluni, suli iñuiññaq akimiaq atausimik (36) titiġniñik qutchiksigivluni. Sisamat nagruich kaŋiġalluŋiñiittuat atautchimiñ savaaguŋarut.

²⁶ Qaaliŋagaa matua, iluqaisalu sisamat saniġaŋich, suli nagruŋich manigiksuamik kaviqsuamik suli kaviqsuamik manigmik avaluliqł̣ugu.

²⁷ Malġugnik tigummisiliuŋagaik kaviqsuamik manigmik aasii iḷivḷugik atauraŋanun avaluata saniqqagni, tigummisausaqługik akigautiksraŋignun.

²⁸ Akigautiliuŋaruq acacia-m qiruanik aasii qaaliqł̣ugik kaviqsuamik manigmik.

Uqsruqtaaġutiliuġmata Tivraġiksaunmiglu

²⁹ Salumaruaguvlugu uqsruqtaaġusiuŋammiuq suli tivraġiksaunmik ikipkautiksramik, akułługu tivraġiksautitun.