Exodus 36 - Iñupiatun Mumiksat Uqalugiksuat

¹ “Bezalel-lu, Oholiab-lu, iluqaġmiglu allat savaktit Atanġum pisuġniksriñŋaraŋich kaŋiqsisiksrił̣ł̣ugiḷḷu, iḷisimaruat supayaanik qanuq savaaġiniaqtilaaŋiññik nappaisaqpata nalunaiqsauruamik Tupiġmik, savaglutiŋ Atanġum piraksriutipiaġataŋagun.”

Iñuich Qaġġirrirut Iñugiaktuanik Aitchuutinik

² Moses-gum ququaġaik Bezalel, Oholiab-lu, iluqaisalu savayuruat aŋutit Atanġum pisuġniksriñŋaraŋich suli ikayuġummatiqaqtuat, aasii Moses-gum savaksaquŋagaich.

³ Ilaata qaiñŋagaich aitchuutipayauraŋich Israel-gum kiŋuvaaŋich qaġġirraŋich nappaġniaġniŋanun ilaaguaqtauruam Tupqum. Iñuŋich Israel aglaan qaġġirrisimaaŋarut Moses-mun aitchuutimignik uvlaatuaġaġimman.

⁴ Tavraasii savayuruat aŋutit savaktuat ullautiniqsut

⁵ aasii uqallautivlugu Moses, “Iñuich marra qaġġirriraġaqtut qaaŋiulaaqługu atugaksraq savaamun Atanġum piraksriutigiraanun.”

⁶ Moses piraksriiŋaruq nullaummiruapayaanun aitchuiŋaiquvlugich ilaaguaqtauruamun Tupiġmun; aasii inuich qaġġirriraġaŋaiŋarut.

⁷ Qaġġisianiktaŋich qaaŋiulaaŋarut-unnii naanniksraŋannun savaaguniaqtuam.

Nappaġniŋagun Tupqanik Atanġum Nayuqtauniŋani

⁸ Sanatuniqtat aŋutit savaktuaguruaniñ nappaŋagaat Tupqa Atanġum Nayuqtauniŋata. Qulit talukiyaat savaŋagai ukiłhaaġiksaanik savaaguŋaruaniñ suŋauraaqtaamik, tigluuraaqtaamik, suli kaviqsuamik imnaim mitquanik suli miquqtanik qiñiyunaqsaŋaruanik cherubim-nik.

⁹ Talukiyaat ativlugich aktilaaŋich, akimiaġutaiḷatun (14) isagniġum avvaŋisun taktigivlutik aasii malġuktun isagniġum avvaŋiksun siḷiktigivlutiŋ.

¹⁰ Miquŋaġaich tallimat atautchimukługich talukiyaat; tainna-suli tallimauruat alġaiŋich.

¹¹ Niviŋŋaviḷiqsuiŋarut kalikumik suŋauraaqtaamik siñaagun siḷalliuruam aviktam atautchiigullaaruagni.

¹² Niviŋŋaviḷiqsuiŋarut malġukipiaq qulinik (50) sivulliġmun aviktamun atautchiiguruani suli malġukipiaq qulinik (50) ativlugich aqulliuruamun aviktamun igḷuiŋiññun.

¹³ Naktirviḷiuŋarut malġukipiaq qulinik (50) kaviqsuamik manigmik, atautchimullasaqługik malġuiguruak atausiŋŋuġlugik.

¹⁴ Qaliḷiuŋagaat Tupiq qulit atausiuruanik (11) kalikunik savaaguruanik nagrulgich mitquanniñ.

¹⁵ Atisivḷugich aktilaaŋich savaŋagaich, akimianik (15) isagniġum avvaŋiñik taktigivlugich aasii malġuk isagniġum avvaŋiktun siḷiktigivlugich.

¹⁶ Miquutiŋagaich tallimat atautchimun atautchiigusaqługich aasiiḷi allat itchaksrauruat iliŋisigun illasivḷugich.

¹⁷ Niviŋŋaviḷiŋagaich malġukipiaq qulinik (50) siñaagun aqulliuruam talukiyaam atautchiiguruani suli niviŋŋavigñik siñaatigun igḷuiŋisa.

¹⁸ Patukpagnik malġukipiaq qulinik (50) naktirviḷiuŋarut kasuqtillasaqługik malġuiguruak, atausiŋŋuqsaqługu qaliŋa.

¹⁹ Malġuiguruagnik suli qaliḷiuŋagaat, igḷua imnaich aŋusalluŋisa amiŋiñik kipitinŋaruanik kaviqsaamun aasiiḷi igḷua qisigiksaanik, siḷalliulugu taluusaqługu.

²⁰ Nappaaġiksivḷugich avaluksriuŋagaat acacia-m qiruanik Tupiq.

²¹ Avaluksrallaa qutchiksigiŋaruq akimiatun (15) isigagniqtun aasii iñuiññaq tallimat malġugnik (27) titiġniñik siḷiktigivluni,

²² malġugnik atiruagnik aniŋaruagnik, avaluksrat kasuqtillasivḷugich. Iluqaġmiŋ avaluksrat tainna turviqaŋarut.

²³ Iñuiññanik (20) avaluliuŋarut salliġmun

²⁴ suli malġukipianik (40) tunŋaviqaqhutiŋ qatiqtuanik manigñik ataaŋiññi, malġuuvlutiŋ alliŋich ataallaaŋiññi avalut tigummisauvlutiŋ paugaŋiññun.

²⁵ Avaluliuŋarut iñuiññanik (20) salliġmun Tupqum

²⁶ suli malġukipianik (40) qatiqtuanik manigñik tunŋavigñik, malġuullaavlugik avalullaani.

²⁷ Tunuksraŋanun aasii Tupqum, sanmiruam uanmun, itchaksranik avaluliuŋarut,

²⁸ malġugniglu avalugnik kaŋiġallullaaŋanun.

²⁹ Taapkua kaŋiġallugni avaluuruat kasuqtinŋarut ataatigun aasii kasuqtinŋavlugich qulaanunaglaan. Malġuk avaluk malġugnun kaŋiġaluugnun tainna savaŋagaich.

³⁰ Tavraasii tallimat piŋasut avalut suli akimiaq atausiq (16) qatiqtuat manigmik tunŋaviŋich, malġuuk ataani avaluuk.

³¹ Akimianik (15) sanniġutaliuŋarut acacia-m qiruanik, tallimaullaalugich avataani Tupqum,

³² tallimat avaluksrat igḷuani saniġaata, suli tallimat avaluksraŋiñun ualiñaaŋani, tunuani.

³³ Qitiqłiuruaq sanniġutaq, inillaŋaruaq avvaŋanunaglaan avalut, taktigiŋaruq Tupqum isullaaŋiññun.

³⁴ Qaaliŋagaich avaluuruat kaviqsuamik manigmik iviqtillugiasii kaviqsuamik manigmik tigummisiksraŋiñik sanniġutat, qaaliŋammiruat kaviqsuamik manigmik.

³⁵ Talukiyaaliuŋarut ukiłhaaġiksuamik, savaaguŋaruamik suŋauraaqtaamik, tigluuraaqtaamik, suli kaviqsaamik imnaim mitquanik suli qupakługu arriŋiñik cherubim-git.

³⁶ Sisamanik napaqsraliuġniqsut acacia-m qiruanik tigummisiksraŋiñik talukiyaam, qaaliqł̣ugich kaviqsaamik manigmik, suli niviŋŋaviḷiqsuqługich kaviqsaamik manigmik. Tavraasii sisamanik qatiqtaamik manigmik tunŋaviḷiuqługich naparuat.

³⁷ Paaŋa Tupqum talukiyaaliuŋagaat ukiłhaaġiksuamik savaaguruamik suŋauraaqtaamik, tigluuraaqtaamik, suli kaviqsaamik imnaim mitquanik qiñiyunaqutiqaqhutik miquqtanik.

³⁸ Taamna talukiyaaq tallimanik napaqsraḷiuġniġaat naktirviḷiqsuqługulu, kaviqsaamik manigmik qaaliqł̣ugich, talukiyaaqaġviŋich, suli tallimanik patukpagnik nappaviḷiqsuqługich.