Exodus 35 - Iñupiatun Mumiksat Uqalugiksuat

Maliġuagaksraŋich Sabbath

¹ Moses-gum ququaŋagai Israel-gum iñupayaaŋi, “Uvva inna Atanġum piraksriġaasi:

² Itchaksranik uvluksraqaqtusi savagviksravsiññik, aglaan tallimat malġuat uvlut ilaaguaqtauniaqtuq, nalunaiġḷugu uvluŋa unaŋuiqsiġvium ilaaguaŋalugu uvamnun, Atanġuruamun. Kiñapayaaq savagniqpan taaptumani uvlumi tuqutauruksrauruq.

³ Igniqsuġnasi aimmivivsiññi uvlumi Sabbath-mi.”

Aitchuutiksrat Nalunaiqsauruamun Tupiġmun

⁴ Moses uqaqtuq iñupayaaŋiñun Israel, “Uvva una Atanġum piraksriutaa:

⁵ Aitchuutiksriuġlusi Ataniġmun. Iluqaġmiŋ aitchuiyumaruat qaġġirrigisirut kaviqsuanik manigñik, qatiqtuanik manigñik, naakka patukpagnik;

⁶ ukiłhaaġiksuanik; suŋauraaqtaanik, tigluuraaqtaanik, suli kaviqsuanik imnaim mitquanik; ukił̣haalianiglu nagrulgich mitquanniñ;

⁷ imnaich aŋusalluŋisa amiŋiñik kaviqsaamik kipititanik, qisigiksuanik; acacia-m qiruanik;

⁸ uqsruksraŋannik nannich; avuuġutiksraŋiññik uqsruqtaaġutim suli tivraġiksuanun ikipkautinun;

⁹ carnelian-nik suli allanik uyaġagiksuanik iḷiraksraŋiñik aŋaiyyuliqsiqpaum kiapiġutaanun satqagutaanullu.

Suġautaksraŋi Tupqum Atanġum Nayuqtauniŋani

¹⁰ “Savayupayaaqtuat savaktit akunnavsigniñ qairuksraurut savagiaġlugich supayaurat Atanġum piraksriutigiraŋich:

¹¹ Tupiq, qaakutaŋiḷḷu taluŋiḷḷu, niksigauraŋich suli avaluŋich, ayagutaŋich, napaqsraŋich, tunŋaviŋiḷḷu;

¹² Sivunniuġutim Kiguunniŋa, akigaunnaŋich, matua, talukiyaaġlu ilaaguaġutausaġlugu;

¹³ niġġivik, akigaunnaŋik, suli iluqaisa suġautaŋich; punniq aitchuutauruaq God-mun;

¹⁴ Naparuaq naniqaġvik nannimun suġautaŋiñullu; nannich uqsruŋiḷḷu;

¹⁵ ikipkaivik ikipkaiviuruaq tivraġiksautinun suli akigautiŋich; uqsruqtaaġun; tivraġiksaun ikipkaun; talukiyaaksraŋalu paaŋata Tupqum;

¹⁶ ikipkaiviksraq ikipkautikun aitchuutinun, patukpaiḷḷu ikipkautim qaŋattatiŋich atalugich, akigautiŋich, suli suġautapayaaŋich; iqaqqiviglu alliġaŋalu;

¹⁷ talukiyaaŋiḷḷu avaluŋata, napaqsraŋiḷḷu, tunŋaviŋiḷḷu, avalum paaŋa talukiyaaqaqtuaq;

¹⁸ Tupquvlu paugaksraŋich akłunaaksraŋiḷḷu Tupqum avaluŋalu;

¹⁹ suli ukiłhaalluatalianik annuġarrianik aŋaiyyuliqsiqpauruat atuaksraŋiññik savallaġmiŋ Salumaruami Inimi—ilaaguaqtauruat annuġaaksraŋich Aaron-gum aŋaiyyuliqsiqpauruam suli iġñiŋisa.”

Iñuich Qaġġirrirut Aitchuutimignik

²⁰ Iluqaġmiŋ Israel-gum kiŋuvaaŋisa nayuŋaiŋagaat Moses,

²¹ iluqaġmiŋ aasii piyummatiqaqtuat qaġġirriŋarut aitchuutinik atugaksranik Atanġum Tupqani. Qaġġirriŋarut iluqaiññik pigiraksraġiraŋiññik nanġaigumiŋ suli aŋaiyyuliqsiqpauruat annuġarrisaġumisik.

²² Piyummatiqapayaaqtuat, aŋutillu aġnallu, qaġġirriŋarut qiñiyunaqtuanik kakkisinaqtuanik, siutiġutinik, qitiqłiaġutinik, quŋusiġutinik, qanusipayaaniglu kaviqsuanik manigñik qiñiyunaqutilianik aasii ilaaguaqtaġivlugich Ataniġmun.

²³ Iluqaġmiŋ piqaqtuat ukiłhaaġiksuanik, suŋauraaqtaanik, tigluuraaqtaanik, naakka kaviqsuanik imnaim mitquanik; ukił̣haaŋanik nagrulgich mitquaniñ; imnaich aŋusalluŋisa amiŋiñik kipititanik kaviqsaamik; naakka qisigiksaanik, qaġġirriŋarut.

²⁴ Aitchuiyumiñapayaaqtuat qatiqtuanik manigñik naakka patukpagnik qaġġisiŋagaich aitchuutitiŋ Ataniġmun, acacia-m qiruŋiñik atugaksraŋiñik nallipayaaŋiñun savaat qaġġirriŋarut.

²⁵ Sanaturuat aġnat qaġġirriŋaniqsut savaamignik ukiłhaagiksuanik ivalunik suli suŋauraaqtaanik, tigluuraaqtaaniglu, kaviqsuamiglu imnaim mitquanik.

²⁶ Ivaluliuŋammiñiqsut nagrulgich mitquŋiññiñ ukiłhaaliaksramignik.

²⁷ Aullarriuruat qaġġirriŋamarulli carnelian-nik suli uyaġagiksuanik iḷiraksraŋiññik aŋaiyyuliqsiqpaum kiapiġutaanun satqagutaanullu

²⁸ avuuġutillu uqsrullu nanniñun, uqsruqtaaġutiksramun, suli tivraġiksautinun ikipkautiksranik.

²⁹ Iluqaġmiŋ Israel-gum kiŋuvaaŋich piyummatiqapayaaqtuat qaġġirriŋarut aitchuutimignik Ataniġmun savaaksramun piraksriutigiraŋiññun Moses-mun.

Savaktiksrat Tupqanik Atanġum Nayuqtauniŋani

³⁰ Moses uqallaktuq Israel-gum kiŋuvaaŋiññun, “Atanġum naliġaktaaġigaa Bezalel, iġñiŋa Uri-m suli tutaalua Hur-m maŋŋuŋiñiñ Judah-m.

³¹ God-im immiŋagaa Iḷitqusiġiksuamiñik, pisuġniksrił̣ł̣ugu piḷḷaraŋanik, suli kaŋiqsimmatiksraŋanik qanusipayauramun savaaksramun,

³² pisuġniksrił̣ł̣ugu savaaġivlugich qiñiyunaqusiat kaviqsuamik manigmiñ, qatiqtuamik manigmiñ, suli patukpagniñ,

³³ sanaraksriuqłutik uyaġagiksuanik inillaktaksranik; sanavlutigḷu qirugmiñ; qanusiugaluaġmanlu qiñiyunaqtuaq savaaq.

³⁴ Ataniq qaitchiŋaruq iḷisaurriyumiñaqsivḷugik Oholiab-mun iġñiŋanun Ahisamach-gum, maŋŋuŋiñiñ Dan, savaaksranik allanun.

³⁵ Pisuġniġmik qaitchiŋagaich savaktiksrat qanusipayauranun savaaksranun—titiqtuqtit, tuvraaksriirit, suli ukiłhaaġiksuanik savaguuruat—suŋauraaqtaanik, tigluuraaqtaanik, suli kaviqsuanik imnaim mitquanik; suli allanik kalikunik. Savallaniaqtut qanusiugaluaqpan savaaq suli tuvraaksriisuqtuallu.