Exodus 33 - Iñupiatun Mumiksat Uqalugiksuat

Atanġum Piraksriġai Israel-gum Kiŋuvaaŋich Aullaquvlugich Mount Sinai-miñ

¹ Atanġum uqautigaa Moses, “Aullaġiñ uumaŋŋa inimiñ, iñuiḷḷu Egypt-miŋŋautiŋaratin, aullaġlusi nunamun unniqsuqłiisigiŋaramnun Abraham-mun, Isaac-mun, suli Jacob-mun, kiŋuvaaŋiññullu.

² Tilisiñiaqtuŋa isaġuligmik aullarriksraġnik, aasii aninniaġitka Canaan-miut, Amor-miut, Hit-miut, Periz-miut, Hiv-miut, Jebus-miullu.

³ Aullaġniaqtusi nunagiksuamun suli nauriḷguruamun. Aglaan aullaqatiginiaŋitkivsi, qanukkii uqayunaitchuagurusi iñuich, suli suksraunġiqpiaġivsi iglaullavsi.”

⁴ Iñuich tusaakamirruŋ taamna, isumaaliqpaŋaniqsut suli atuŋaiqhutik qiñiyunaqutinik.

⁵ Qanuq Atanġum piraksriŋagaa Moses uqallautitquvlugich, “Ilivsi iñuich uqayunaitchuagurusi. Aullaqatigillaksaġaluaġuvsi akkupauraq-unnii, tamatkiġḷusi suksraunġiġñiaġivsi. Piiqsigich qiñiyunaqutisi, aasii sivunniġñiaqtuŋa qanuq aŋalanniaqtilaavsiññik.”

⁶ Tavraasii aullaanikkamiŋ Mount Sinai-miñ, Israel-gum kiŋuvaaŋich qiñiyunaqutitullaiŋarut.

Tupiq Moses-gum Uqaqatigivia Ataniġmun

⁷ Iñuŋich Israel nullaġaġimmata, Moses-gum tupiq nappaġaġigaa uŋasiuraqługu nullaummivianniñ. Taiguusiqaŋaruq Tupqanik Atanġum nayuqtauniŋata, aasii kiñapayaaq uqaqatiqaġuktuaq Ataniġmik ullautiraqtuq tavruŋa.

⁸ Moses tupiġmuksaġaġimman, iñuich qikaġaqtut paaŋanni tupiġmiŋ aasii qiñiqtuaqługu Moses isiġataqtillugu.

⁹ Moses isianiŋman, nuviya atqaġaqtuq aasii upkuaŋani Tupqum itkaqsivḷuni, aasii Atangum uqaqatigiaqsivḷugu Moses nuviyamiñ.

¹⁰ Iñuich tautupqaġmarruŋ nuviya paaŋani Tupqum, purrutigillaaraqtut.

¹¹ Ataniġlu Moses-lu uqaqatigiigaqtuk tavrani, iñuk uqaqatiqaġmatun avilaitqatimiñik. Tavraasii Moses utiġaqtuq nullaummivigmun. Aglaan ikayuqtiŋa nukatpiaq, Joshua iġñiŋa Nun-gum, Tupiġmiittuaġaqtuq.

Ataniq Unniqsuqłiiruq Itqatiginiaġnivḷugich Iñugirani

¹² Moses uqallaktuq Ataniġmun, “Iḷumun ittuq uqautiŋagiŋma aullatitquvlugich ukua iñuich taiptumuŋa nunamun, aglaan uvva uqautiŋaitkigma kimik aullaqatiqaġniaqtilaamnik. Uqallaŋarutin iḷisimalluataġnivḷuŋa suli iviġaumaginivḷuŋa.

¹³ Iviġaumaginiġumŋa, uqautiŋŋa sivunniuġutignik, savautillayumagikpiñ suli iviġaksimaaġlutin. Itqaumalutin naliġaktaaġiŋagitin ukua nunaqpauruat pigisukługich.”

¹⁴ Atanġum kiugaa, “Aullaqatiginiaġikpiñ tutqiutiqaqtillutillu.”

¹⁵ Moses-gum kiugaa, “Aullaqatiginiaŋitkuvsigut, aullaqtinnasigut maaŋŋa.

¹⁶ Qanuġluni iñuk iḷisimaniaqpa iviġaumagitilaaŋich iñugiratillu uvaŋalu aullaqatigiŋitkuvsigut? Nayuqtauniqpich uvaptinnun iḷisimanaqtinniaġaa allautilaaptinnik allanin iñugniñ nunami.”

¹⁷ Atanġum uqautigaa Moses, “Apiqsriaġiran piñiaġiga, qanukkii iḷisimalluataġikpiñ suli iviġaumagivlutin.”

¹⁸ Tavra Moses uqallaktuq, “Tautuktillaguŋ qivliqtuaq qaumaniŋa nayuqtauniqpich.”

¹⁹ Atanġum kiuŋagaa, “Iluqaan qaumaniġa sivuġavsiguaqtinniaġiga suli taiḷugu takkuġni salumaruaq atiġa. Uvaŋa Atanġuruŋa, iḷunŋusuutiqaġniaqtuŋa naglikkutiqaġluŋalu kimupayaaq.

²⁰ Tautuktinniaŋitkiga kiiñaġa iliŋnun, qanukkii kia unnii qiñiġumiñaitkaaŋa aasii iñuuluni,

²¹ aglaan uvva ini saniġamni qikaġviksran uyaġak.

²² Qaumaniŋa nayuqtauniġma nalautchaaġutikpan, aŋmaruaŋanuktinniaġikpiñ uyaġaum aasii matulutin argamnik qaaŋiqsaaġuiġataqtilluŋa.

²³ Tavra argaga piiġñiaġiga, aasii tunuga tautugniaġiñ kiiñaġaŋił̣aaq.”