Exodus 32 - Iñupiatun Mumiksat Uqalugiksuat

Kaviqsuamiñ Manigmiñ Savaaq Aŋusalluq Nuġġaq

¹ Iñuich iḷitchuġikamirruŋ Moses atqakallaŋisilaaŋanik iġġimiñ, Aaron avałługu uqautiŋagaat, “Uvvauvagut nalurugut imma iñuk Moses sutilaaŋanik, aullarrikput Egypt-miñ; god-iliuqsigut aullarriksraptinnik.”

² Aaron-gum uqallautigai, “Piiġḷugich siutiġutiŋich kaviqsuat maniich tuvaaqativsiññiñ, iġñiġutiivsiññiñ, suli panivsiññiḷḷu, aasii qaġġisilugich uvamnun.”

³ Tavraasii iñuich piiŋagaich kaviqsuat maniich siutiġutitiŋ aasii Aaron-muutivlugich.

⁴ Siutiġutit pivḷugich, auktinŋagaich, kuvivḷuguasii niġrutiŋŋualiuġviŋmun, aasii kaviqsuamik manigmik aŋusallumik nuġġaŋŋualivḷutiŋ. Iñuich uqaqtut, “Israel kiŋuvaaŋich, uvva una god-ikput, aullarrigiŋaraqput Egypt-miñ!”

⁵ Tavraasii Aaron nappaiŋaruq ikipkaivigmik sivuġaanun aŋusallum nuġġaliam aasii uqaqhuni, “Uvlaaku niqinaqiniaqtut qutchiksiḷiqsaġlugu Ataniq.”

⁶ Uvlaatchaurami uvlaakumman qaġġirriŋarut niġrutinik ikipkautiksranik suli allanik niqiksranik iḷammiuġnikun aitchuutiksranik. Iñuich aquptaaŋarut niqinaqisaqhutiŋ, piuqłaanġipiaġataŋarut aglaan imiqhutiŋ.

⁷ Ataniq uqallaktuq Moses-mun, “Qilamiqsruġlutin atqatqigiñ, qanukkii iñuktin, aullatiŋaratin Egypt-miñ, piḷuusiqirut suli ayyakłuŋa.

⁸ Unisanikkaat apqun piraksriutigiraġa maliġitquvlugu; aŋusallumik nuġġaliuŋarut auktitamiñ kaviqsuamiñ manigmiñ suli nanġaqługu aitchuivigivlugulu ikipkautinik. Uqaqtut tavragguuq iliŋisa god-iŋat, aullarrigiŋaraŋat Egypt-miñ.

⁹ Iḷisimaruŋa qanutun uqayunaisilaaŋiññik taapkua iñuich.

¹⁰ Tavraasii, nutqaqtinniatagnaŋa. Qinnautigitka, suli suksraunġiġñiaġitka. Aasii ilivich kiŋuniitillu nunaqpaguqtinniaġivsi.”

¹¹ Aglaan Moses-gum iŋiulagaa Ataniq God-ini aasii uqaqhuni, “Ataniiq, summan uvva qinnautivigich iñugiratin, annautianiŋaratin Egypt-miñ sapiġñaqtuakun suli suaŋŋatikkun?

¹² Summan Egypt-miut uqaġumiñaġniaqpat aullatiniḷugich iliŋnun iñutin Egypt-miñ, sivuniqaqhutin tuqutchukługich iġġiñi suli suksraaġlugich tamatkiġḷugich? Qinnaŋaiġiñ; isummitqigiñ suksraunġiŋitchumagitin iñugiratin.

¹³ Itqaumalugich kivgatin Abraham, Isaac suli Jacob. Itqaumalugu iḷumutuuruaq unniqsuqłiisigiŋaran iliŋiññun kiŋuvaaksriññiaġnivḷugich uvluġiat iñugiaktilaaŋatitun suli kiŋuniiŋich nunaksriññiaġnivḷugich nanmiñiq nunaksraŋannik taimuŋaaglaan.”

¹⁴ Tavraasii Ataniq isummitqiŋaruq aasii iñuni suksraunġiŋił̣ł̣ugich anayasaaġutikkaluamisun.

¹⁵ Moses atqaġniqsuq iġġimiñ, tigumiaqługik uyaqqak aglagviik piraksriutinik aglaŋaruak iḷumikkullu siḷatimikkullu.

¹⁶ God-im ilaata aglagviḷiaŋik suli titiqtuutivlugich tavruŋa piraksriutini iliŋiññun.

¹⁷ Joshua-m tusaaŋagaich iñuich nipaalaruat aasii uqallautivlugu Moses, “Tusaaruŋaimma aŋuyakpaluktaqtuanik nullaummiviŋmi.”

¹⁸ Moses uqallaktuq, “Qanuq apkua nipanŋitpat akimaruatun naakkaunnii akiiñŋaruatun; amma attualaruat piut.”

¹⁹ Moses qalligami nullaummiviŋmun tautukkaa aŋusalluq nuġġaq suli iñuich kanaakkiuruat, qinnalipiaġataŋaruq. Tavrani natqani iġġim, miḷuqsautigaik aglagviik tigumiaqtagni aasii siqummalaaqługik.

²⁰ Tiguŋagaa aŋusalluq nuġġaq savaaŋat aasii auktiłługu, kaukługu avyuġuqługu, akułługuasii imiġmik. Aasii taimma Israel-gum kiŋuvaaŋich taaptumiŋa imiqtinŋagaich.

²¹ Uqallautigaa Aaron, “Immaipkua iñuich suraatin, tainna pigiisigiruamik piḷuusiqipkaġniqpigich?”

²² Aaron-gum kiugaa, “Qinnautinaŋa, iḷisimarutin qanutun makua iñuich pigiiḷḷiqisuguutilaaŋiññik.

²³ Uqautigaanŋa inna, ‘Nalurugut imma iñuk Moses sutilaaŋanik, aullarrikput Egypt-miñ, god-iliuqsigut aullarriksraptignik.’

²⁴ Apiġiŋagitka qaġġirritquvlugich kaviqsuanik manigñik aasii qiñiyunaqutaiyaŋarut, aasii qaił̣ł̣ugich uvamnun. Iginŋagitka qiñiyunaqutit igniġmun aasii tavra taamna aŋusalluq nuġġaq nuiruq!”

²⁵ Moses iḷitchuġiŋaruq iñuich piaqłaanġiqsitilaaŋiññik Aaron-mun, isumalluaġiiḷivḷutiŋ sivuġaanni allat akiḷḷiimiŋ.

²⁶ Tavraasii qikaqhuni paaŋani nullaummiviŋata nipatuvluni uqaŋaruq, “Kiñapayaaq savaurriruaq Ataniġmun uvuŋa qaiḷi!” Tavraasii Levi-m kiŋuvaaŋich ullautiŋarut avałługu,

²⁷ aasii uqallautigai, “Ataniq God-auruaq Israel-mun piraksriiruq iluqasi savikpasi kaluglugich nullaummivikuaġlusi aasii utiqtaġlusi paaŋaniñ uumaŋŋa allamullu aasii tuqullugich aniqatiisi, iḷauraasi, suli siḷalliisi.”

²⁸ Levi-m kiŋuvaaŋich kamaksriŋarut, aasii tuqułługich 3,000-tun iñugiaktigivalliqsuat aŋutit taaptumani uvlumi.

²⁹ Moses uqaqtuq Levi-m kiŋuvaaŋiññun, “Uvlupak nalunaiqsaurusi aŋaiyyuliqsiqpauniġmun savautivlugu Ataniq tuqutchikavsi iġñivsiññik aniqatiivsiññiglu, tavraasii Atanġum quviasaaġutiksritkaasi.”

³⁰ Uvlaakumman Moses-gum uqautigai iñuich, “Savaŋarusi piaġiitchuamik piḷuunmik. Aglaan uvva mayuvsaaġniaqtuŋa iġġimun Ataniġmun; suagguuq suliqutigiŋaiḷḷaniaġaa piḷuusiqiaqsi.”

³¹ Tavraasii Moses utiŋaruq Ataniġmun uqaqhuni, “Ukua uvva iñuich piaġiipiaġataqtuamik piḷuusiqiŋarut. Savaŋarut god-iliuqhutiŋ kaviqsuamik manigmik aasii aŋaiyyuvigivlugu.

³² Apiġigikpiñ suliqutigiŋaiquvlugu piḷuutaat; aglaan suliqutigiŋaiġumiñaitkupkich, atiġa piiqsaġiñ aglaaġniñ atiŋiññiñ iñugiraqpich.”

³³ Atanġum kiugaa, “Taipkua piḷuusiqiŋaruat akiḷḷiġivluŋa atiŋich piiġñiaġitka makpiġaamniñ.

³⁴ Ki aullaġiñ, aullatisaqtukkich iñuich inimun quliaŋaramnun iliŋnun. Itqaumalutin isaġuligma aullatiniaġaatin, aglaan piviksraq tikiññiaqtuq tatavsaiviksraġa taapkuniŋa iñugnik piḷuusiqiaŋisigun.”

³⁵ Tavraasii Atanġum naŋirrutiqpak iñugnun qaipkaŋagaa, qanukkii Aaron kavisuamik manigmik aŋusallumik nuġġaġmik piḷiuqtinŋagaat.